Одоогоос 21 жилийн өмнө бусдын гарт амиа алдсан Ардчилсан хувьсгалын анхдагч нарын нэг, УИХ-ын гишүүн С.Зориг агсаны хөшөөнд хүндэтгэл үзүүлж цэцэг өргөлөө. Энэхүү уламжлалт цэцэг өргөх ёслолд түүний ах С.Баяр болон УИХ-ын нэр бүхий гишүүд оролцож хөшөөнд хүндэтгэл үзүүлсэн юм.
Цэцэг өргөх ёслолын үеэр , түүний ах С.Баяр “Энэ аллага үйлдэгдээд 21 жил боллоо. Энэ хугацаанд ар гэрийнхэн бид хэргийг шуурхай шийдвэрлэх талаар хүсэлтээ төр засагтаа гаргасаар ирсэн. Бид энэ хэргийг захиалагч, зохион байгуулагчид олдохоос нааш бидний санаа амрахгүй. Бидний гомдол тайлагдахгүй. Хэрэг илэрнэ гэж бид итгэсээр ирсэн. Хэрэг илэрч байж Монголын ард түмний хүндэтгэдэг хүүгийн харамсалтай тавилангийн эцсийн хариуг сонсоно гэж бодож байна” хэмээсэн юм.
Өнөөдрөөс яг 21 жилийн өмнө буюу 1998 оны аравдугаар сарын 2-ны өдөр Дэд бүтцийн сайд Санжаасүрэнгийн Зориг бусдын гарт амиа амиа алдаж улс орныг цочроосон билээ. Талийгаачийн дурсгалыг хүндэтгэж 1999 онд уран барималч Б.Дэнзэнгийн эх загварын дагуу хүрэл хөшөөг АН-ын төв байрны хажууд босгосон байдаг. Зүүн хойд зүгт харуулан босгосон түүний хөшөөг нэг гартаа дипломат цүнх барьж, нөгөө гартаа янжууртайгаар дүрсэлсэн байдаг юм.
