“Монголын сэтгүүлчдийн нэгдсэн эвлэл” (МСНЭ)-ийн Ерөнхийлөгч Х.Мандахбаярын зүгээс хийж буй үйлдлүүдтэй холбогдуулан нэр бүхий сэтгүүлчид хэвлэлийн хурал зарлан, мэдээлэл өглөө.
“Ноцтой мэдээ” сонины эрхлэгч Б.Галсансүх: “Уул уурхай гэдэг бол монголчуудын хувьд хамгийн эмзэг сэдэв нь. Энэхүү эмзэг сэдэв дээр дөрөөлөн зарим хүмүүс эх орончийн дүрд тоглож, олонд танигдах гэж зүтгэж эхэллээ. Х.Мандахбаяр гэдэг хүн бол эх орон, газар шороондоо тийм их хайртай хүн яавч биш. Тэрээр өөрөө Өмнөговь аймагт “Их шижир баялаг” гэдэг нэртэй уул, уурхайн компанитай. Бас хувьдаа нүүрс зөөдөг машинтай. Тэдгээр машинаараа Монгол улсын баялгийг өдөр, шөнөгүй Хятад руу зөөж байгаа мөртлөө худлаа эх оронч болж жүжиглэж буй нь гутамшигтай. Уул, уурхайг би хаалгасан гээд “Ардын баатар” болоод яваа хүн үнэндээ шоудаж байгаа шүү. Уул уурхайг хаагаагүй. Үнэндээ Тосон бумбын нуруунд хятад эзэнтэй уурхайнууд одоо хүртэл ажиллаж байна. Бүх уурхайг хаалгаад, уул усаа аварчихсан гэж бодож байгаа бол эндүүрэл.
Энэ хүн бие муутай. “Өнөөдөр харвалаа, албан тушаалаа өглөө” гэснээ маргааш нь “Би уул, уурхайг хаалгачихлаа, буцаад Ерөнхийлөгчийн ажлаа авлаа” гэж мэдэгддэг. Х.Мандахбаяр эрүүл хүн мөн үү? Энэ хүн МСНЭ-ээр тоглож болсон. Одоо сэтгүүлчдийн Онц их хурал зарлаж, түүний энэ увайгүй үйлдлийг таслан зогсооцгооё” гэсэн юм.
“Тв4” телевизийн мэдээний албаны дарга З. Бадар-Ууган: “Сэтгүүлчдийн нэгдсэн эвлэлийн хуралдааны үеэр түүнийг Ерөнхийлөгчөөр томилохыг эсэргүүцэн мэргэжлийн бүх холбоод хурлыг орхин гарсан байдаг. Харин түүний тойрон хүрээлэгчид, гар хөл бологчид л тэнд үлдэж түүнийг МСНЭ-ийн Ерөнхийлөгчөөр томилж байсан.
Энэхүү албаг тушаалд томилогдсоны дараа Х.Мандахбаяр нь улс төртэй нилээд холбогдсон баримтууд байдаг. “Улс төрч, сэтгүүлч хоёр хэзээ ч нэг хөнжилд орж болохгүй” гэсэн үг байдаг. Энэхүү зарчмыг эрхэм Ерөнхийлөгч маань алдагдуулан өнгөрсөн хугацаанд улс төрд чиглэсэн үйл ажиллагаануудыг явуулж ирсэн. Үндсэндээ Сэтгүүлчдийн нэгдсэн эвлэл гэх байгууллагыг удирдаж байгаа тэргүүний хувьд сэтгүүлчдийн эрх ашиг, сэтгүүл зүйн салбартаа голлон анхаарах биш хувийн карьерийг өсгөх, өөрийн нэр хүндийг улс төрд хэрхэн ахиулах вэ гэдэгт хүч хөдөлмөрөө зориулж байна. Сүүлийн үед өөрийн мэдлийн хэвлэл мэдээллийн хэрэгслээр болон хүрээллийн байгууллагуудтайгаа хамтран дайрч, доромжлох, гүтгэх зэрэг үйл ажиллагааг эрчимтэй явуулж байгааг зарим нэг хэвлэл мэдээллийн байгууллагаас өгч байна.
“Хатуу мэдээ” сайтын найруулагч Б.Мөнхтөр: “Тосон бумбын нулимс” нэвтрүүлэг 2017 оны дөрөвдүгээр сард хийгдсэн. Түүнээс хойш хоёр жил өнгөрөхөд Х.Мандахбаяр юу ч хийгээгүй, зүгээр л боломжийг хараад сууж байсан. Өөрөөр хэлбэл тухайн үед уурхайн үйл ажиллагаа эхлээгүй, хэрүүл тэмцэл хийхэд ямар ч ашиггүй байсан гэсэн үг. Яг цагаан сарын үеэр уурхайг ухаж эхэлсэн байдаг. Тэгэхэд нутгийн иргэд эсэргүүцэл үзүүлж, зам харгуйг нь хааж, хагалгаанд орсон хүн хүртэл өвлийн хүйтэнд тэмцээд явж байсан. Энэ үед Х.Мандахбаяр 11 өрөө байрынхаа найрыг хийгээд, баярлаад сууж байсан. Ер нь бол их баярлаж, наргиж, цэнгэх дуртай. Хэрэв үнэхээр эх оронч юм бол Х.Мандахбаяр тэр үед ухаж эхлээгүй байхад тэмцэх нь яасан юм. Тэгэхээр эндээс ганц л дүгнэлт хийж болно. Ухуулаад, сенсааци үүсэхэд бэлэн болсны дараа араас нь “сэлэм барьж” дайрсан.
Үүнээс гадна нэг ноцтой мэдэгдэл өөрийн цахим хуудастаа бичсэн байдаг. Сэтгүүлчид МСНЭ-д татвар төлөөгүй бол БНХАУ руу сурвалжлага бэлтгэхээр явах эрхгүй гэсэн байсан. Үүнийг юу гэж ойлгох вэ. МСНЭ-ийг БНХАУ-ын суртал, ухуулгын хэлтэс хянаж байна гэсэн үг үү. Одоо Өмнөд Солонгосын визэнд ороход татвар төлөөгүй бол тодорхойлолт гаргаж өгөхгүй гэж байна. Монгол сэтгүүлчийн гар, хөлийг мухарлах, явах замыг өөрөөрөө дамжуулах ийм л арга хайж байна. Тэгэхээр ийм хүнээр бид удирдуулаад явах шаардлага байна уу. МҮОНТ-ийн сэтгүүлч А.Бүрэнбаатартай бид нэгдэж байна” хэмээн мэдэгдлээ.
