Монгол улсад багийн спорт хөгждөггүй гэх шүүмжлэлийг үгүйсгэсэн тохиолдол удаа дараа гарч байгаа билээ. Тэдгээрийн нэгэн илрэл болох “гурвын эсрэг гурав” сагсан бөмбөгийн төрөлд монгол залуусын баг нэгэн шинэ амжилт үзүүлж ард түмнээ баясгалаа.
Өнгөрөгч долоо хоногт улирлын сүүлийн дэлхийн гран при тэмцээн БНСУ-д амжилттай зохион байгуулагдлаа. Энэхүү тэмцээнд Э.Дөлгөөн, Э.Цэрэнбаатар, Г.Цэнгүүнбаяр, Д.Дэлгэрням нарын бүрэлдэхүүнтэй “Улаанбаатар ММС Энержи” баг оролцож, өндөр амжилт үзүүлсэн нь дэлхийн сагсан бөмбөг сонирхогч, мэргэжилтнүүдийн анхаарлыг ихээр татсан юм.
Манай багийн залуус шөвгийн наймын тоглолтод Сербийн алдарт “Земун”-ыг 17:16-ийн харьцаатай буулган авч тэмцээний хагас шигшээд шалгарсан юм. Тус багтай өмнө нь дөрөв тоглохдоо гурав хожигдож, нэг хожил аваад байсан.
Харин хагас шигшээгийн тоглолтод Оросын хамгийн хүчтэй хоёр багийн нэг болох “Нева”-г цаг сунгалтын үеэр холын шидэлтээ амжилттай гүйцэтгэн 14:12-оор хожсон. Энэхүү хожлыг авснаар манай залуус анх удаагаа дэлхийн гранприн шигшээ тоглолтод шалгарахаас гадна энэхүү амжилтыг үзүүлж буй Ази тивийн анхны баг болон тэмдэглэгдэн үлдлээ.
Ингээд шигшээ тоглолтод Словенийн тэргүүн баг болох “Пиран”-ыг 13:10-ын харьцаатай хожин Дэлхийн сагсан бөмбөгийн холбооноос зохион байгуулдаг дэлхийн гран при тэмцээнд түрүүлж буй Ази тивийн анхны төлөөлөл болсон юм. Манай залуусын хувьд энэхүү амжилтыг үзүүлснээр Токиогийн олимпод оролцох эрхийн оноогоо нэмэгдүүлээд зогсохгүй Монголын багийн ахлагч, олон улсын хэмжээний мастер Д.Дэлгэрням “Чэжү”-гийн гранпригийн MVP буюу хамгийн үнэ цэнтэй тоглогчийн шагнал хүртэж ард түмнээ баясгалаа.
Тэднийг ийнхүү өндөр амжилтыг үзүүлж байгаатай зэрэгцэн мөн л сагсан бөмбөгийн 3×3 төрлийн 23 хүртэлх насны дэлхийн аварга шалгаруулах тэмцээнд Монголын охид, хөвгүүд түүхэн өндөр амжилтаа үзүүллээ.
Өмнөд хөрш болох Хятадын Ланьжоу хотноо зохион байгуулагдсан сагсан бөмбөгийн 3×3 төрлийн U23 насны баг дэлхийн аварга шалгаруулах тэмцээнд Монголын охид, хөвгүүдийн баг оролцсон юм.
Хөвгүүдийн баг Нидерланд, Сербийн багт хожигдсон хэдий ч Литва, Солонгосын багийг хожин тэмцээнээ өндөрлөсөн юм. Хэдийгээр хэсгээс шалгарч чадаагүй хэдий ч манай багийн А.Анандыг дэлхийн топууд онцолсон нь сайшаалтай.
Тэгвэл тус тэмцээний үеэр дэлхий нийтийн тааварлаагүй амжилт үзүүлсэн охидын тоглолт нэлээн шуугиан тарьсан юм. Тэдний хувьд Германы багтай хийсэн тоглолтод тааварлаагүй амжилт үзүүлж дэлхийн мэргэжилтнүүдийн анхаарлыг ихээр татсан.
Манай охидын багийн бүрэлдэхүүнд Г.Минжин, М.Цэрэнлхам, Б.Ариунцэцэг, О.Хулан нар багтсан бөгөөд тэдний хувьд Румыны багт 21:22-оор хожигдсон ч Ираныг 21:15, Германыг 13:11, Угандаг 19:17-гоор хожиж шигшээ наймд шалгарсан юм.
Харин хасагдах шатанд Беларусьтай тоглон хожигдол хүлээн тэмцээнээ өндөрлөсөн хэдий ч Монголын сагсан бөмбөгийн тамирчид дэлхий нийтийн анхаарлыг хамгийн ихээр татсан нь сагсчдаараа бахархах сэтгэгдлийг өөрийн эрхгүй төрүүлж байлаа.
