Өнгөрөгч долоо хоногт хэд хэдэн айл угаарын хийнд хордож улмаар дөрвөн иргэн амь насаа алдсан харамсалтай хэрэг гараад байгаа билээ.
Үүнтэй холбогдуулан өнгөрөгч 5-6-нд шилжих шөнө Нийслэлийн онцгой комисс яаралтай хуралдаж нийслэлийн Засаг дарга С.Амарсайхан сайжруулсан түлш хэрэглэсний улмаас угаартаж, амь насаа алдсан байж болзошгүй асуудал болон үүссэн шалтгааныг яаралтай тогтоох, сайжруулсан түлшний нарийвчилсан дүн шинжилгээ хийлгэхийг холбогдох албан тушаалтнуудад үүрэг болгосон юм.
Үүний дагуу хийгдсэн хэд хэдэн шинжилгээний хариуг өнөөдөр /2019.10.07/ холбогдох албан тушаалтнууд танилцууллаа.
НИЙСЛЭЛИЙН ОРЛОГЧ ДАРГА Ж.БАТБАЯСГАЛАН:
-Баянгол, Чингэлтэй, Баянзүрх, Хан-Уул дүүргийн 23 цэгээс дээж авч, гурван лабораторид шинжилгээнд хамруулсан. Мөн барьцалдуулагч буюу холбогч бодисыг Гаалийн төв лабораторид шинжлүүлсэн. Ажлын хэсэгт 98 албан хаагч дээж авч, гурван газар шинжлүүлсэн. Өнөөдөр өглөө Нийслэлийн Засаг даргын шуурхай хуралдаж, Нийслэлийн онцгой комиссын шийдвэр, иргэдэд чиглэсэн сэрэмжлүүлгийг хүргэх, зөв мэдээллийг хүргэх, түлш хэрэглэх заавар зэргийг зөвлөх ажил өрнөж байна.
МХЕГ-ЫН ДЭД ДАРГА Н.ДАВААСҮРЭН:
-МХЕГ-аас хордлогод өртсөн айлуудын хэрэглэж байсан түлшинд шинжилгээ хийсэн. Шинжилгээний дүнг үндэслэж, улсын байцаагч нар дүнгээ гаргана.. Геологийн төв лабораторид есөн дээж шинжлүүлсэн. Тодруулбал, Чингэлтэй дүүрэгт нас барсан болон угаартсан таван иргэн, Баянзүрх дүүргийн нэг, Хан-Уул дүүргээс нэг, Сонгинохайрхан дүүргээс хоёр дээж авч, шинжлүүлсэн.
Нэр бүхий 9 айлаас авсан дээжийн чийглэг нь стандартын хэмжээ хангасан. 10 буюу түүнээс доош байх ёстой бөгөөд шинжилгээний хариугаар 3,2-9 байсан.
-Үнслэг нь 29 буюу түүнээс бага байх ёстой байхад 23-24
-Дэгдэмхий чанар 22 буюу түүнээс бага байх ёстой байхад 18.9-20.3
-Хүхэр нь 1 буюу түүнээс бага байх ёстой 0.95-1,4 /Чингэлтэй дүүргийн 12 дугаар хорооны нэг иргэнийхээс авсан дээж ийм илүү гарсан/
-Илчлэг 6000 буюу түүнээс бага байх ёстой байхад 4200 гарсан.
Мөн Тавантолгой түлшний угаасан нүүрс болон бэлдцэд шинжилгээ хийсэн нь стандартын шаардлага хангасан гэсэн шинжилгээний хариу гарсан. Эдгээр үзүүлэлтүүд нь угаартаж амиа алдсан болон угаартсан айл өрхүүдийн хэрэглэж байсан түлшинд шинжилгээ хийсэн бөгөөд өмнө нь бидний хийж байсан шинжилгээтэй таарч байгаа юм.
Түүнээс гадна Гаалийн төв лабораторид хийсэн шинжилгээгээр цардуул болон шаварлаг элс агуулагдаж байна гэсэн дүнг ирүүлсэн. Химийн бодис бус органик цардуул, шаварлаг элс. Энэ гурван хариуг үндэслэж улсын байцаагчийн дүгнэлт гарч, нийслэлийн онцгой комисст хүргүүлнэ. Мөн өчигдөр угаартсан гэсэн дуудлага нэмэгдэж ирсэн. Тодруулбал, Хан-Уул дүүргийн 10 дугаар хорооны нутаг дэвсгэрт нэг өрхийн хоёр хүүхэд угаартсан гэсэн дуудлага ирсний дагуу, хүүхдүүдэд хордлого тайлах эмчилгээ хийгээд гаргасан. Нэг хашаанд нэг цэгээс, нэг ижил түлш авсан хоёр айлын нэг айлынх нь хоёр хүүхэд хордсон байхад нөгөө айлынх нь зүгээр байсан. Харин хүүхэд угаартсан айлаас тодруулга авахад орой унтахдаа түлшээ хийгээд, байшингийн яндангаа хаагаад унтсан гэдэг тайлбар өгсөн. Тэгэхээр түлшнээс бус хэрэглээгээ анхаарахгүй бол ийм байдал цаашид үргэлжилж магадгүй байна.
