Ерөнхий сайд асан Н.Алтанхуяг өнөөдөр МАНАН бүлэглийн талаар мэдээлэл хийлээ. Тэрбээр “2016 оны дөрөвдүгээр сарын 4-нд МАНАН бүлэглэлийг би зарлаж байсан. 2016 сонгуулиар хуйвалдааны төрийг зохион байгуулах гэж байна хэмээн мэдэгдэж байсан. МАНАН-гийн цаана Ц.Элбэгдорж байгаа. Ерөнхийлөгчийн албан тушаал дээрээс МАН, АН-ыг холбосон өөрийн үгэнд ордог, “бөлдөгддөг” хүмүүсээр МАНАН-г байгуулж, Монголын төрийг самарч эхэлсэн. Хүчний байгууллагуудад өөрийн хүмүүсийг байршуулсан. Хоёр дахь хүн нь М.Энхболд. Энэ хоёр гол толгойлогч нь.
Би ойр хавийн хамаг хүмүүсээ шорон гяндангаар явуулсан хүний хувьд Монголын ард түмний төлөө хэлэхээс өөр аргагүй алга. Харин энэ бүхний хэрэгжүүлэгч нь Улсын Дээд Шүүхийн Ерөнхий шүүгчээр найман жил ажилласан Д.Зоригт. Д.Зоригт шүүгч нь С.Зоригийн хэргийн нууц шүүх хуралдааныг даргалсан. Улсын Ерөнхий прокурор асан Д.Дорлигжав өөрийнхөө дараа Ерөнхий прокуророор бас л өөрийн хүнээ тавьсан. Н.Ганболдыг Ц.Элбэгдорж АТГ-ын даргаар тавьсан. М.Энхболдыг Ерөнхий сайд байхад Тагнуулын ерөнхий газрын дарга байсан. Б.Хурцыг АТГ-ын орлогч даргаар тавьсан. Дараа нь Тагнуулын ерөнхий газрын дарга болгосон. Ингэж хууль хүчний бүх байгууллага МАНАН-д үйлчилсэн” гэв.
Мөн энэхүү мэдэгдлийнхээ үеэр МАНАН бүлэглэлд багтах гишүүдийг танилцуулсан юм.
МАНАН бүлэглэлийн толгойлогч:
Ц.Элбэгдож, М.Энхболд нар
Гардан гүйцэтгэгч хуулийн байгууллагын ажилтанууд:
-Улсын дээд шүүхийн ерөнхий шүүгч асан Ц.Зоригт
-Ерөнхий прокурор асан Д.Дорлигжав
-ТЕГ-ын дарга асан Б.Хурц
-Ерөнхий прокурор асан Б.Энх-Амгалан
-АТГ-ын дарга асан Н.Ганболд
-АТГ-ын дарга Х.Энхжаргал
-ЦЕГ-ын дарга асан Ө.Энхтөр
Бүлэглэлийн гишүүн улстөрчид:
-Хотын дарга асан Э.Бат-Үүл
-АН-ын дарга С.Эрдэнэ
УИХ-ын гишүүн Д.Эрдэнэбат
-Ерөнхий сайд асан Ч.Сайханбилэг
-Ерөнхий сайд асан Ж.Эрдэнэбат
-УИХ-ын гишүүн асан Т.Бадамжунай
-УИХ-ын гишүүн С.Бямбацогт
-УИХ-ын гишүүн Д.Хаянхярваа
Мөн тэрээр “Э.Бат-Үүл бид хоёр бол найз. Бид хоёрын найзаас илүү улс эх орны эрх ашиг чухал. Э.Бат-Үүл МАНАН-гийн гар хөл. Монголын нийгэмд маш их гай тарьсан. С.Эрдэнэ толгойлогч нарынхаа гарын үзүүрээр ажилладаг. МАНАН бүлэглэл маш их мөнгөтэй учраас тэдний өмнөөс үг хэлэх хүн байдаггүй. Манай “Нэгдмэл монгол хөдөлгөөн” хандив цуглуулж, МАНАН бүлэглэлийг устгахад зарцуулна. Би цаашид эдний асар их мөнгө хаанаас бий болоод байгааг баримттайгаар дэлгэнэ” хэмээн нэмж мэдэгдлээ.
