Дэлхийн хамгийн өндөр ашигтай компани 12 дугаар сард IPO гаргана

Саудын Арабын Засгийн газраас төрийн өмчит газрын тосны “Saudi Aramco” компанийнхаа хувьцааг анхдагч зах зээлд гаргах болсноо зарлалаа.
Тус компанийн хувьд дэлхийн нийт газрын тосны олборлолтын 10 хувийг дангаараа эзэлдэг бөгөөд цэвэр ашгийн үзүүлэлтээрээ дэлхийн бүхий л салбарын компанийн нэгдүгээрт жагсдаг. Зөвхөн 2018 онд л гэхэд 111 тэрбум ам.долларын ашигтай ажилласан нь “Apple”, “Alphabet”, “Exxon Mobil” зэрэг гурван компанийн ашгийн нийлбэрээс ч илүү ашигтай болж байгаа юм.
Саудын Арабын эрх баригчдын зүгээс 2018 онд IPO гаргах талаар мэдээллэхдээ компанийн 5 хувийг хөрөнгийн зах зээлд зарж, $100 тэрбумыг босгох төлөвлөгөөтэй болохоо мэдэгдэж байсан.
Гэхдээ зарим эх сурвалжийн мэдээлснээр тус компани IPO-ийг амжилттай гаргахын тулд дээрх тооноос арай бага буюу 1.6-1.8 их наяд ам.долларын үнэлгээг зөвшөөрөхөд бэлэн байж болзошгүй байгаа.
Тус компани өнгөрсөн дөрөвдүгээр сард 12 тэрбум ам.долларын бонд гаргахаасаа өмнө анх удаа жилийн санхүүгийн тайлангаа нийтэд танилцуулахад эхний есөн сарын байдлаар “Saudi Aramco” компани 244 тэрбум ам.долларын орлоготой ажилласнаас 68 тэрбум ам.доллар нь цэвэр ашиг хэмээн тайлагнажээ.
Компанийн хувьцааг 12 дугаар сараас эхлэн тус улсын Эр-Риядын Хөрөнгийн биржээр дамжуулан захиалах боломжтой болохыг мэдэгдсэн байна. Хөрөнгө оруулагчдыг татахын тулд “Saudi Aramco” Саудын Араб улсад явуулж байгаа газрын тос боловсруулах үйлдвэрлэлийн татвар одоо 50-80 хувь байгааг ирэх оноос бууруулан 20 хувь болгоно гэдгээ онцоллоо.