С.Баярцогт: ҮТЕГ-ын байцаагч нар гэрээний талаар мэдлэггүй учир “ноцтой зөрчил гаргасан” гэж дүгнэлт гаргасан

УИХ-ын дэд дарга, Сангийн сайд асан С.Баярцогт өнөөдөр сэтгүүлчдэд мэдээлэл өглөө. Тэрээр энэ удаад дуугүй суугаад байх нь буруу юм байна, Оюутолгой төсөл алдаатай болоогүй, дуугүй сууснаар буруугаа хүлээсэн явдал сэтгэгдлийг төрүүлж байгаа учир “Оюутолгой төслийн 2009 оны гэрээ, холбогдох бичиг баримтууд” гэсэн 500 гаруй хуудастай ном гаргасан хэмээн тайлбарлалаа.
С.Баярцогт “Одоогоос 30-аад хоногийн өмнө Оюутолгойн гэрээ байгуулсны 10 жил өнгөрлөө. Энэ ойн талаар Монголын төр засаг ч, Оюутолгой компани ч дуугүй өнгөрөөсөн. Энэ гэрээг хэлэлцэж баталсан 2008-2012 оны УИХ-ын бүрэлдэхүүн, С.Баяр болон Сү.Батболдын Засгийн газрын гишүүдэд баяр хүргэх нь зүйтэй.
Намайг 2018 онд Оюутолгойн гэрээтэй холбоотойгоор Авилгатай тэмцэх газраас Эрүүгийн хэрэг үүсгэж 73 хоног хорьсон. Яллагдагчаар татсан гол үндэслэл нь Оюутолгойн гэрээний Монголд ашигтай нэг заалт, Оюутолгойн үр ашгийг 434 тэрбум төгрөгөөр нэмэгдүүлснийг буруутгасан. Надад зарим хууль хүчний байгууллага энэ гэрээний зүйл заалтыг ойлгохгүй байгаа юм байна гэсэн бодол тухайн үед төрсөн.
АТГ-аас дөрвөн бүлэг шинжээч томилж Оюутолгойн гэрээг хянасан. Уг дөрвөн бүлэг шинжээчдээс гурав нь Оюу толгой төслийн 2009 онд байгуулсан Хөрөнгө оруулалтын гэрээ, Хувь нийлүүлэгчийн гэрээ, 2011 онд байгуулсан Нэмэлт өөрчлөлт оруулж, дахин тодотгосон хувь нийлүүлэгчийн гэрээтэй холбоотой сөрөг дүгнэлт гаргаагүй.
Харин энэ гэрээний хэрэгжилтийг хангах ёстой Татварын ерөнхий газрын байцаагч нар ноцтой зөрчсөн гэсэн дүгнэлт гаргасан. Эдгээр байцаагчид гэрээний талаар мэдлэггүй байгаа нь харагдсан. Т.Аюурсайхан гишүүн мөн УИХ дээр шинжээчдийн дүгнэлтийг ярьсан. УИХ-ын гишүүд мөн буруу мэдээллийг аваад шийдвэр гаргах эрсдэл байгаа нь харагдсан.
Шинжээчдийн дүгнэлтэд дурдсан асуудлуудын 97 хувь нь алдаатай болон гэрээний хэрэгжилтийг хангахтай холбоотой.
Хэрвээ шинжээчдийн дүгнэлтэд үндэслэн шүүх шийдвэр гаргавал “Оюу толгой” төслөөс төсөвт орох татварын орлого үлэмж хэмжээгээр буурахаас гадна “Оюу толгой” ХХК олон арван жилийн турш их хэмжээний татварыг дутуу төлөх боломж олгоно.
Тиймээс энэ тухай сэрэмжлүүлж, соён гэгээрүүлэх үйл ажиллагаа явуулан, шийдвэр гаргагчдыг бодитой мэдээллээр хангах зайлшгүй хэрэгтэй гэж үзэн энэхүү тохимолыг гаргаж байна. Энэ тохимол монголчуудад хэрэгтэй гэдэгт итгэлтэй байна” хэмээн тайлбарлав.
Би маш удаан хугацаанд бүх зүйл шийдэгдэх байх гэж хүлээсэн. Одоо намайг ганцхан Монгол Улсад шалгаж байгаа юм биш. Швейцарт ч яг адилхан хэрэг үүсгэчихээд зэрэг шалгаж байгаа бөгөөд шалгалтын ажиллагаа 2016 оноос хойш явж байна” гэсэн юм.