![\"\"](http://undesten.mn/uploads/posts/2016-08/1472524579_467.jpg "\\"\\"")
Улс даяар автомашины нэгдсэн үзлэг эхэллээ. Үзлэг оношлогоо хийлгээгүй автомашиныг торгох арга хэмжээ авч байгааг албаныхан мэдэгдсэн билээ. Тэгвэл жолооч та үзлэгт бэлэн үү? Галын хоргүй, эмийн сангүй явж байгаад торгуульчихаж байгаа юм биш биз. Тэгвэл дараах зөвлөгөөг таньд хүргэж байна.
– Автомашинаа улсын үзлэгт оруулахдаа юуг анхаарахыг нийтлэлч Н. Өсөхбаяр зөвлөж байна –
Жолооч бид автомашинаа улсын үзлэгт оруулах гэж уламжлалт ёсоор хаврын улиралд нөр их ажил болдог. Авто тээврийн хэрэгслийн үзлэгийн хуучин журмаар жил бүрийн 4-6 сард автотээврийн хэрэгслийн үзлэгийг кампаничилсан хэлбэрээр явуулж байсан нь энэ үед үзлэгийн ачааллыг дээд цэгт нь хүргэж байлаа.
Гэхдээ эдийн засгийн талаас нь тооцоолоод үзэхэд хавар зуны улиралд автомашины борлуулалтын оргил үе таардаг тул бүртгэл хийлгэсний дараа дараагийн үзлэг яг энэ үедээ л таардаг нь ачааллыг төдийлөн бууруулахгүй байгаа юм.1999 онд батлагдсан автотээврийн тухай хуульд автомашиныг жилийн турш үзлэгт оруулдаг болгон өөрчилсөн нь энэхүү ачааллыг бага ч гэсэн бууруулах алхам хийсэн. Бидний ярих гэж байгаа гол зүйл бол энэ их ачаалалтай цаг завгүй үед автомашиныхаа үзлэгийн бэлтгэлийг хэрхэн бэлтгэж үзлэгт амжилттай тэнцэхэд зөвлөгөө өгч, таны цаг зав аюулгүй байдалд туслах явдал юм. Жолооч та үзлэгт орохоор ирэхдээ автомашиныхаа өнгө үзэмж, тоормос гэрэл дохио, хөдөлгүүрийн ажиллагаа, хорт утааны хэмжээ гэх мэт автомашины эд ангиуд хэвийн ажиллаж байгааг шалгаж эвдрэл гэмтэлтэй бол засуулах арга хэмжээ аваарай.
Үүнээс гадна судалгаагаар үзлэгт тэнцэхгүй байгаа гол шалтгаанууд нь бичиг баримтын зөрчил, галын хор, эмийн сан, ослын тэмдэг гэж гарсан байдаг. Эдгээр зүйлүүд автомашинд болон жолооч нарт заримдаа байдаг заримдаа байдаггүй, харин техникийн үзлэг эхлэнгүүт бүрэн болгож бүрдүүлэх гэж яарцгаадаг. Уг нь бол зөвхөн шалгагч байцаагчид үзүүлэх зориулалттай бус таны автомашинд заавал байж зарим тохиолдолд аминд орох зүйлүүд юм шүү.
Эмийн сан: Автомашины эмийн сан нь анхны тусламж үзүүлэхэд шаардагдах боолт, цэвэрлэгээний материал, зарим төрлийн өвчин намдаах эм байх нь тохиромжтой байдаг. Ослын зогсолтын тэмдэг: Монголд стандартаар нарийвчлан заагаагүй байдаг боловч ослын тэмдэг нь тулгууртай бөгөөд зам дээр босоогоор байрлуулах боломжтой, гэрэл сайн ойлгож байх ёстой. Галын хор: Галын хор нь нунтаг, манометртэй, 2 литрийнх байвал зүгээр. Ажиллагаатай байгаа эсэхийг манометрийн заалтаар шууд тодорхойлчихно. Харин энэхүү зөвлөмжийн дагуу галын хорыг автомашины багажинд байрлуулахгүй байхыг сануулж байна.
Бичиг баримтын бүрдэл: Тээврийн хэрэгслийн гэрчилгээ, жолооны үнэмлэх: Мэдээж энэ хоёр таны автомашинд зайлшгүй байх зүйл бөгөөд бичиг баримтын ямар нэгэн өөрчлөлт хийлгэсэн бол зохих журмын дагуу тэмдэглэл хийлгэсэн эсэхээ шалгаарай. Татвар төлсөн байх: Харьяа дүүргийнхээ татварын албанд Автотээврийн хэрэгслийн албан татвар, хорт утааны татвар, зам ашигласны татвар зэрэг 3 төрлийн татварыг төлж зохих тэмдэглэгээг хийлгэсэн байх ёстой. Жолоочийн хариуцлагын даатгал хийлгэсэн байх: Тухайн автомашиныг жолоодох эрх бүхий хүмүүсийн нэр дээр энэхүү даатгал заавал хийлгэсэн байх ба хүчинтэй хугацаа дуусаагүй байгаа эсэхийг шалгаарай. Ингээд техникийн үзлэгт ороход бэлэн болсон уу? Хөдөлгүүрийн аль хэсэгт дугаар нь бичээстэй байгааг олж аваад сайхан арчаад цэвэрлэчхээрэй.
Эхний оролтоор техникийн үзлэгтээ тэнцэхийг хүсье, АМЖИЛТ!
Эх сурвалж: Зарулем Монгол сэтгүүл
