Шинэ коронавирусийн халдвар манай улсад бүртгэгдсэнтэй холбоотойгоор иргэдийг хүлээн авч уулзах, олноороо цугласан хурал цуглааныг зохион байгуулах боломжгүй байгаа тул Хотын дарга долоо хоног бүр 1-2 удаа цаг үеийн асуудлаар олон нийтэд хандан цахим хэлбэрээр мэдээлэл хийж, нийслэлийн иргэд, оршин суугчдын өмнө тулгамдаж буй асуудал, санал хүсэлтийг сонсож, иргэдийн сонирхсон асуултанд хариулж байхаар болсон юм.
Бүх төрлийн баар, фитнесс, саун, дэн буудал, биллиард, спорт заал зэрэг спорт, соёл урлагийн газруудын үйлчилгээг түр зогсоосон, ресторан паб, цэнгээний газруудын үйл ажиллагааг 22:00 цаг хүртэл болгосон хугацааг дөрөвдүгээр сарын 30-ныг хүртэл сунгахаар болсон талаар Нийслэлийн Засаг дарга С.Амарсайхан мэдээллээ.
Дээрх газруудыг хэсэгчлэн, цөөн тоогоор нээхээр судалсан боловч эрсдэл өндөр байгаа тул ийнхүү хугацааг сунгахаар болсон тул иргэд, аж ахуйн нэгжүүдийг шийдвэрийг ойлгохыг хүссэн юм.
Мөн тэрээр “Дэлхийн хотуудад шинэ коронавирусийн тархалт буурахгүй байна. Улаанбаатар хотын хувьд цаг алдалгүй яаралтай арга хэмжээ авч ажилласан. Хотын иргэд ч бидэнтэй хамтран ажиллаж байна. Гэвч тайвширч, назгайрч, хорио цээрээ тавих ёстой гэсэн санал их байгаа учраас бид эрсдэл гаргахгүй байхын тулд анхаарах ёстой цаг үе ирсэн байна. Хөл хориог сунгах асуудлаар Ерөнхийлөгчийн зарлиг, Засгийн газрын шийдвэр хэрэгжиж байна” гэлээ.
“Иргэдээс ууланд алхах замуудыг хэсэгчлэн нээх боломжтой юу” хотын даргад хүргүүлсэн. Тэгвэл тэрээр энэ асуултанд “Ууланд, агаарт алхах асуудлыг нээлттэй болгож өгнө гэж бодож байна. Гэхдээ олон хүн цуглаж болохгүй. Зөвхөн гэр бүлийн хүрээнд салхинд гарч болох бөгөөд хоорондын зайг барьж байх нь зүйтэй” гэж хариуллаа.
