Улсын онцгой комиссын 28 дугаар хуралдаанаар хэлэлцсэн асуудал болон гаргасан шийдвэрийн талаар мэдээлэл хийв.
Энэ үеэр наймдугаар сард эх орондоо ирэх хүсэлт гаргасан иргэдийг татан авах асуудалтай холбогдуулан дараах мэдээллийг өглөө.
ГХЯ-ны Консулын газрын захирал Л.Мөнхтүшиг “УОК-ын хурлаас наймдугаар сард хийх тусгай үүргийн нислэгийн хуваарийг баталлаа.
Наймдугаар сард нийт 14 удаагийн нислэг үйлдэнэ. Үүнээс БНСУ-д байгаа иргэдийн татан авах гурван нислэг, Европын орнуудад байгаа монголчуудыг татан авах Франкфуртын гурван нислэг, Токио руу хоёр удаа, Австрали руу нэг удаа, Энэтхэг болон Вьетнамд байгаа иргэдийг татан авах нислэгийг нэг удаа, Туркэд байгаа иргэдийн татах авах нислэг нэг удаа, АНУ руу нэг удаагийн нислэг хийнэ.
Мөн Олон улсын шилжилт хөдөлгөөний байгууллагын шугамаар Чех улсад байгаа нутаг буцах хүсэлт гаргасан 100 гаруй иргэнийн татаж авах Чехийн онгоцын хүлээж авах шийдвэрийг гаргалаа. Ингэснээр нийт найман чиглэлд 14 нислэг үйлдэж, 3,460 иргэнийг татаж авах урьдчилсан тооцоо гаргалаа.
Долоодугаар сард нийтдээ 14 удаагийн нислэг үйлдэхээр төлөвлөсөн. Энэ давтамжийг наймдугаар сард хадгалах, тусгаарлах байрны нөөц бололцоог харж байгаад наймдугаар сарын дундуур, сүүлээр нэмэлт нислэг хийх боломжийг дахин судална” гэв.
Мөн “Дэлхийн улс орнууд тухайн улсад нэвтрүүлэх боломжтой визийн ангилалаа маш тодорхой тогтоож өгсөн байгаа. Өнөөдрийн байдлаар улс орнууд хилээ хэсэгчлэн нээж байгаа ч ихэнх улс хилээрээ нэвтрүүлэх гадаад улсын иргэдэд тавьж байгаа хязгаарлалт хэвээр байгаа.
Солонгос, Япон, Европын улс орнуудын хувьд зөвхөн тухайн улсад байнга оршин суух буюу гурван сараас дээш хугацааны визтэй иргэдийг нэвтрүүлж байгаа. АНУ руу явах иргэдэд ч мөн адил шаардлага тавьсан.
БНХАУ-д манай улсын 12 мянга гаруй оюутан, сурагч сурдаг. Тус улс өнөөдрийн байдлаар манай оюутнуудыг хилээрээ нэвтрүүлэхтэй холбоотой шийдвэр гаргаагүй байна.
Холимог гэр бүр болон БНХАУ-д байнга оршин суудаг хүмүүсийн өргөлөл сүүлийн үед тасралтгүй ирж байгаа. Энэ мэдээллийн дагуу тус улсын Элчин сайдын яамтай холбогдож, албан ёсны хариу авсан. БНХАУ энэ оны гуравдугаар сарын 28-нд гадаадын иргэдийг нэвтрүүлэхгүй байх журам гаргасан. Түүнээс хойш энэ шийдвэр хүчинтэй хэвээр байгаа” гэлээ.
2020 оны наймдугаар сард хийгдэх тусгай үүргийн нислэгийн хуваарь:
1 БНСУ Сөүл 250 2020.08.01
2 АНУ Сиатлл 250 2020.08.05
3 БНЭУ Шинэ Дели/Ханой 170 2020.08.06
4 Япон Токио 250 2020.08.07
5 ХБНГУ Франкфурт 250 2020.08.08
6 БНЧУ Прага 170 2020.08.10
7 БНСУ Сөүл 250 2020.08.14
8 БНСУ Сөүл /транзит/ 250 2020.08.15
9 БНТУ Истанбул 250 2020.08.20
10 ХБНГУ Франкфурт 250 2020.08.21
11 БНСУ Сөүл 250 2020.08.22
12 Япон Токио 250 2020.08.24
13 ХБНГУ Франкфурт 250 2020.08.26
14 Австрали Сидней Австрали, Зүүн Өмнөд Ази 2020.08.27
