Сонгуулийн ялагдлаас хойш АН-ын дарга С.Эрдэнэ өөрийн хүсэлтээр огцорч, шинэ удирдлага шинэчлэл хийж эхлээд байгаа билээ. АН-ын залуу гишүүдийн гишүүнчлэлийг сэргээж эхлээд байна.
Тухайлбал АН-ын Хэрэг эрхлэх газрын дарга П.Нүрзэд Ардчилсан намын даргын тушаал дагуу Д.Сүндий, Н.Соёмбо, П.Галиндэв, М.Батжаргал, Э.Мөнхсайхан, Б.Хайдавмөнх нарын гишүүнчлэлийг сэргээжээ. Дээрх нэр бүхий хүмүүсийн гишүүнчлэлийг сэргээж, Ардчилсан намаас сонгуульд нэр дэвших эрхтэй гишүүнээр өөрчлөн бүртгэжээ.
Энэ үеэр “Ардчилсан нам бодит шинэчлэлийг хийж, залуусаа дэмжиж, ахмадаа сонсч, гишүүдээ дэмжиж байна. Ардчилсан намын дотоод ардчилал, үзэл баримтлал, итгэл үнэмшил сэргэж, олон мянган гишүүд дэмжигчдийн талархлыг хүлээсэн шийдвэр боллоо” хэмээн АН-ын гишүүн Э.Мөнхсайхан онцолсон юм.
Харин Нийслэлийн Ардчилсан намын даргын үүрэг гүйцэтгэгч Д.Пүрэвдаваа, “Хувь улстөрчдийн хувийн харилцаанаас болоод залуучууд бид үзэл санаа, үйл хэргээсээ хойш сууж, намаасаа хөндийрч болохгүй юм. Бид бүхэн алдаа дутагдал байгаа бол богино хугацаанд залруулж, Ардчилсан нам нэгдсэн байр суурьтай, ардчиллын үнэт зүйлийг хамгаалж оролцоно” гэлээ.
