Зураг төслийн архитектор: Марине Рос
Төслийн нэр: Олон талт ашиглалттай хөлбөмбөгийн стадион
Төслийн байршил: Монгол, Улаанбаатар
Төрөл: Хөлбөмбөгийн стадион, худалдаа үйлчилгээ, оффис, зочид буудал
Газрын хэмжээ: 33340м2
Барилгын нийт хэмжээ: 131436м2 (газар дээрх талбай 81103m2, газар доорх талбай 50333m2)
Барилгын өндөр: 37м
Дизайны баг: \”Аркетайп Монголиа” ХХК
1. Ерөнхий
Энэхүү стадионы байршил нь хотын төвд харьцангуй маш ойрхон бөгөөд нийт 33340м2 талбайг хамрах юм. Талбайн эргэн тойронд Улсын Төв Цэнгэлдэх Хүрээлэн, Бейсболын талбай, Олимпын Хороо гэх мэт өөр бусад спортын байгууламжууд байрлана. Захиалагчийн талын гол зорилго нь худалдаа, оффис, зочид буудал, энтертайнмент зэрэг олон нийтэд зориулагдсан бүхий л үйлчилгээг агуулсан олон талт ашиглалттай хөлбөмбөгийн стадион байгуулах явдал юм. Төслийн талбай нь төв зам дагуу 190м, мөн хойд зүгт 217м талбайд үргэлжилсэн харьцаатай газар болно.
2. Төслийн зорилго
Энэхүү төслийн үндсэн санаа нь хөлбөмбөгийн стадион, плаза, оффис, спорт, зочид буудал, тамирчдын хэсэг, академи, усан бассейн, VIP үзэгчид, спортын танилцуулгын хэсэг, худалдаа үйлчилгээ гэх мэт олон талт ашиглалттай орон зайнуудаас бүрдсэн нэг том цогцолбор юм. Хөдөлгөөний урсгалыг зохицуулах зорилгоор стадион ба плаза гэсэн хоёр функцыг төлөвлөсөн. Плаза, стадион нь уг комплекс барилгын гол цөм нь байх болно.
Төв замд ойр байрлах энэхүү олон талт ашиглалттай хөлбөмбөгийн стадионы барилга нь гаднаасаа хэд хэдэн орцоор хуваагдсан блокуудын нийлбэр мэт харагдахаар төлөвлөгдсөн. Хүмүүсийн нүдэнд нэгэн цогц барилга мэт харагдаж, түүний дотор хэсэгт стадион байрлах нь энэхүү төслийн маркетингийн гол бодлого юм.
Дээрх санаан дээр үндэслэн цогцолборын хамгийн их талбай эзэлж буй хэсгүүд болох оффис, зочид буудал, тамирчдын байрлах хэсэг, академи, усан бассейн, VIP хэсэг, Олимпын танилцуулах хэсэг болон олон талт ашиглалттай спортын танхим зэргийг хөгжүүлэх төлөвлөгөөтэй байна. Гүйлтийн зам, атриум, шат, пандус зэргээр Плаза болон хөлбөмбөгийн талбайтай холбогдож, хөдөлгөөний чөлөөтэй урсгал, эргэлттэй байхаар төлөвлөсөн.
Барилгын бүрэлдэхүүн хэсгүүд:
Блокууд:
1) \”ПЛАЗА” – төслийн гол цөм болох энэхүү хэсэгт хоккей, сагсанбөмбөг, жудо бөхийн тэмцээн, худалдаа, үйлчилгээ, спортын арга хэмжээ, концерт гээд олон төрлийн үйл ажиллагааг бүтэн жилийн турш зохион байгуулах боломжтой.
2) \”ОФФИС” блокийг 1-6 давхарт төлөвлөсөн ба плаза болон стадионы хэсэгтэй холбогдоно.
3) \”ЗОЧИД БУУДАЛ”-ын блокийг 1-8 давхарт төлөвлөсөн ба олон улсын стандартад нийцсэн, спортын арга хэмжээнд оролцож буй гадна, дотны хүмүүст зориулсан болно.
4) \”ТАМИРЧИД”-ын блок нь хувцас солих хэсэг болон бусад спорт орон зайтай холбогдсон байхаар төлөвлөсөн.
5) \”АКАДЕМИ” буюу хөлбөмбөгийн академийн блок нь стадионы тоглолтын талбай руу шууд холбогдох юм.
6) \”УСАН БАССЕЙН” блок нь олон талт ашиглалттай заалны хамт байрлана.
7) \”VIP” блок нь хүндтэй зочид, үзэгчдэд зориулж төлөвлөсөн.
8) \”СПОРТ” блок нь бусад спортын үйл ажиллагаатай холбогдоно.
Үзэгчдийн суудалтай хөлбөмбөгийн талбай:
Үзэгчдийн суудлын хэсэг рүү нэгдүгээр давхраас пандус болон шатаар холбогдох юм.
Үзэгчдийн суудлын тоо: 15 000
Хөлбөмбөгийн талбай нь FIFA-ийн стандарт хэмжээгээр төлөвлөгдсөн.
Барилга доторх хөдөлгөөний схем:
Бүх барилгууд онцгой элементүүдээр хоорондоо холбогдсон. Үүнд:
Хоккейн хоёр пандус: Плаза болон Зоорийн B1 давхрын хооронд
Гол хоёр пандус (нэгдүгээр давхраас гуравдугаар давхар): Энэхүү пандуснууд нь уг төслийн анхаарал татах гол хэсэг болох юм. Учир нь плаза, стадионы үзэгчдийн хэсэг, гадна талбай зэргийг холбож өгөх чухал үүрэгтэй.
Гол зургаан шат: нэгдүгээр давхраас гуравдугаар давхар хүртэл үргэлжлэх ба нийтийн зориулалттай бүх хэсгүүдийн хооронд хил зааг үүсгээд зогсохгүй, тэдгээрийг хооронд нь холбох чухал бүтээц юм.
Галын зориулалттай пандус нь тоглолтын талбайгаас гадагшаа шууд холбогдоно.
3. Төслийн зорилго
Дараах үндсэн таван зарчимд тулгуурлан, энэхүү төслийг хэрэгжүүлэх болно. Үүнд:
Уг барилгын зорилгыг хотын иргэдэд харуулах
Барилгажих бүх талбайг спорт болон бусад арга хэмжээнд зориулан ашиглах (фасад, дээвэр, коридор)
Бүх үйл ажиллагаа хоорондын уялдаа, холбоог бий болгох
Эрчим хүчний хэмнэлт, байгальд ээлтэй байдлыг бодолцох (гэрэл, эрчим хүч хэмнэлт, материал гэх мэт)
Бүхий л насны иргэдэд тохирох спортын үйл ажиллагааг хөгжүүлэх зэрэг багтана.
Зураг төслийн архитектор Марин Рос
Mарин Рос нь архитектур ба хотын дизайны чиглэлээр Вьетнам, БНХАУ, Итали, Франц болон Монгол улсад 12 жил ажилласан туршлагатай, концепц дизайн, барилга болон барилгын ажлын хяналтын чиглэлээр нарийн мэргэшсэн мэргэжилтэн юм. Түүний гэр бүл дөрвөн үеэрээ архитекторууд байсан гэнэ. Тэрбээр захиалагчдын сэтгэл ханамж, төслийн амжилт болон компанийн өсөлт дэвшилтийг эрхэмлэж ажилладаг нэгэн юм.
Архитектур дизайн, архитектурын өв уламжлал болон интерьер дизайны чиглэлээр боловсрол эзэмшиж, 2004-2006 онд БНХАУ-д оффис болон орон сууцны төслүүд дээр Дизайн ба төслийн менежмент, чанарын хяналт, хотын дизайн, дизайн боловсруулалт, зочид буудал болон амралтын газрын дизайн, тогтвортой загвар чиглэлээр ажилласан. 2006-2014 онд Вьетнам улсад Европ болон Азид хэрэгжүүлэх томоохон төслүүд дээр Төслийн боловсруулалт ба менежментийн чиглэлээр ажилласан. 2014 оноос хойш Монгол улсад \”Аркетайп Монголиа” компанид Архитектур дизайны менежерээр ажиллаж, 2016 онд Удирдах захирлын албан тушаалд томилогдон ажиллаж байгаа туршлагатай, ирээдүйтэй мэргэжилтэн юм.
Эх сурвалж: Барилга.МН сэтгүүл
![\"\"](http://undesten.mn/uploads/posts/2016-09/1474510011_14445508_10207354196876120_1354412241_n.jpg "\\"\\"")
