УИХ-ын чуулганы танхимд гишүүдийн ширээг тусгаарлаж шилэн хаалт хийсэн байсан нь олон нийтийн шүүмжлэлд өртсөн учраас тус хаалтуудыг өнөөдөр хураагаад байсан юм. Тэгвэл энэ асуудалд УИХ-ын дарга Г.Занданшатар байр сууриа илэрхийллээ.
УИХ-ын дарга Г.Занданшатар: Дэлхийн парламентууд шилэн хаалт тавиад хурлын үйл ажиллагаагаа зохион байгуулж байна. Энэхүү жишгээр дэлхийн эдийн засгийг уналтад оруулахгүйн тулд үйлчилгээний газрууд шилэн хаалт хийж, урьдчилан сэргийлэх хамгаалалтыг чанд баримтлан ажлаа үргэлжлүүлж байна. Хатуу хөл хорионоос илүү урьдчилсан сэргийлэлтээ сайн хийгээд хэвийн ажиллаж болно гэдгийг харж байгаа. Энэ жишгээр үлгэрлэх үүднээс УИХ шилэн хаалт тавьсныг зарим хүн эсэргүүцээд байна. Урьдчилан сэргийлэх хамгаалах бүхий л ажиллагааг олон улсын туршлага дээр тулгуурлаж нэвтрүүлэх хэрэгтэй. Гэвч эсэргүүцлийн улмаас шийдвэрээсээ эргэж буцаж байна. Халдвар тархаж, УИХ-ын үйл ажиллагаа тэг зогсолтод орж эдийн засаг унавал хэн хариуцах вэ? Шилэн хаалт, амны хаалт, зай барих зэрэг урьдчилан сэргийлэх арга хэмжээг аваад үйл ажиллагаагаа хэвийн үргэлжлүүлж болно гэдгийг дэлхийн нийтийн туршлагаас харж болно. Сайн туршлагыг суралцаад хэрэгжүүлж байгаа юм. Эргэж буцсан шийдвэрүүд их эрсдэл дагуулдаг гэдгийг шилэн хоргыг авсан хүмүүс анхаараарай” гэлээ.
