ЭМЯ-ны 11:00 цагийн ээлжит мэдээллээр сэтгүүлч “Орон нутаг явах гэсэн иргэд шинжилгээний хариугаа 8-9 хоног хүлээж байна. 119.mn сайт ажиллахгүй байгаагаас гадна шинжилгээ авч байгаа лабораториуд ачаалалтай байгаагаас болоод шинжилгээний хариу гаргахгүй удаашруулж байна уу?” гэсэн асуултад ХӨСҮТ-ийн Тандалт судалгааны албаны дарга А.Амбасэлмаа хариулт өглөө.
Тэрбээр “Иргэдээс авч байгаа шинжилгээнд ямар нэг саатал гараагүй, цаг тухайд нь хийж байгаа, харин 119.mn сайтад шинжилгээний хариу оруулахад доголдол гарч байгаа” хэмээн ярьсан юм.
ЭМЯ-ны Тандалт, шуурхай албаны дарга Д.Нарангэрэл “Нийслэлд “Нэг өрх-Нэг шинжилгээ” үргэлжлэн явагдаж байгаа. Шинжилгээний хуваарийг хэвлэл мэдээллийн хэрэгслээр өргөн сурталчилж байна. Өнөөдрийн байдлаар 12 мянга гаруй хүний шинжилгээг авсан. ХӨСҮТ, ЗӨСҮТ-ийн лабораториуд өндөр ачаалалтай ажиллаж байгаа хэдий ч иргэдийг чирэгдүүлээгүй. Ирсэн бүх сорьцоо шинжилж байна” гэлээ.
ХӨСҮТ-ийн Тандалт судалгааны албаны дарга А.Амбасэлмаа “PCR шинжилгээний лабаораторийн шинжилгээ хийж байна. 119.mn сайтад шивэх, хариу оруулах тал дээр саатал байх шиг байна. ХӨСҮТ-ийн хоёр лаборатори, ЗӨСҮТ-ийн лаборатори хоногтоо 27-30 мянган шинжилгээ хийх хүчин чадалтай. Өнгөрсөн шөнө гэхэд 27 мянга гаруй хүний шинжилгээ хийсэн. Тэр дотроос хавьтлын шинжилгээ нь 1600 гаруй байна. 25-26 мянга гаруй шинжилгээг бид гурван лабораторит хангалттай хийж байна. Гарсан хариу хүндээ очтолоо сааталтай байна. Манай бүх лаборатори 24 цаг тасралтгүй ажиллаж байна. ЗӨСҮТ-ийн өөрийнх нь лабораториос гадна хоёр авто лаборатори ажиллаж байна.
Замын-Үүдэд урд шөнө 1000 гаруй шинжилгээ авсан. Түрүүчийн шинжилгээний хариунууд сөрөг гарсан. Сэлэнгэ аймагт сүүлийн 24 цагийн дотор гарах тохиолдол буурч байна. Өвчлөлийн тохиолдлын тоо буурах хандлагатай байна.” гэлээ.
