ОХУ-ын гаргаж авсан “Спутник-V” хоёр тун вакциныг 1942 рублиэр олон нийтэд худалдаалах бөгөөд ОХУ өөрсдийн иргэддээ сайн дурын үндсэн дээр үнэ төлбөргүй хийхээр болсон байна.
ОХУ-ын Шууд хөрөнгө оруулалтын сан, Гамалеин нэрэмжит төвтэй хамтран зохион бүтээсэн “Спутник-V” вакцин бусад оронд борлуулагдахдаа 10 ам.доллароос багагүй байна хэмээн мэдэгдсэн. Уг вакцин нь хоёр тунтай тул нийт үнийн дүн ойролцоогоор 20 ам.доллар байхаар төлөвлөгдсөн байна.
ОХУ-ын Шууд хөрөнгө оруулалтын сангийн тэргүүн Кирилл Дмитриев Спутник V вакцин нь барууны орнуудын үйлдвэрлэж буй вакцинтай харьцуулахад хоёр дахин хямд байгаа гэв.
ОХУ-д энэ сарын 7-ны өдрөөс эхлэн иргэдээ вакцинжуулалж эхэлсэн бөгөөд эхний ээлжинд эмнэлгийн ажилтан, багш, нийгмийн ажилтан, хуулийн байгууллагын ажилтнууд хамрагдана.
Вакцин хийлгэж болохгүй хүмүүс:
- 18 нас хүртэлх хүүхэд.
- Жирэмсэн болон хөхүүл хүн.
- Хүнд хэлбэрийн харшилтай хүн.
- Цочмог халдварт өвчинтэй хүн.
- Цусны хорт хавдар болон хавдартай хүн.
