Монгол улсын Ерөнхий сайд Ж.Эрдэнбат Орхон аймагт ажиллалаа. Ерөнхий сайдын хувьд 19.30 цагаас \”Уурхайчин” соёлын ордонд Эрдэнэтийн иргэдтэй хийх уулзалтын зарын дагуу иргэд чолноор цугласан байсан. Харин эрхэм зочид маань 21.20 цагийн үед хүрэлцэн ирж уулзалт эхэлсэн юм. Уулзалтын эхэнд Ерөнхий сайд Ж.Эрдэнэбат танхимд цугласан иргэдээс хоцорч ирсэн шалтгаанаа тайлбарлаад, уучлалт хүссэн билээ. Эрдэнэтчүүд ч эцгийгээ санасан хүүхэд адил Ерөнхий сайдын уулзалтыг тэвчээртэй нь аргагүй хүлээж, Монголын төр, засгаас \”Эрдэнэт үйлдвэр”-ийн талаар ямар шийдвэр гаргаж байгаа тухай хийх мэдээллийг нь сонсохыг үнэхээр хүсэж байсан. Ерөнхий сайд Ж.Эрдэнэбат уулзалтын эхэнд Монгол улсын нийгэм эдийн засгийн талаарх өнөөгийн байдлыг танилцуулаад, цаашид эдийн засгийн хүндрэлээс гарах чиглэлээр засгийн газрын зүгээс хийхээр төлөвлөж байгаа ажлаасаа мэдээлсэн юм. Үүний дараа иргэд асуулт асууж эхэлсэн. Асуулт асуусан эхний иргэд \”Эрдэнэт үйлдвэр”-ийн 49 хувийн талаар сонирхож байсан учраас Ерөнхий сайд \”Энд санал бодлоо хэлэх гэж байгаа хүмүүс бүгд л Эрдэнэт үйлдвэрийн талаар сонирхож байна. Тиймээс би Эрдэнэт үйлдвэрийн талаар Засгийн газраас гаргасан шийдвэрийнхээ талаар эхлээд дуулгая” гэсэн юм.
Тэрбээр \”Сангийн сайдаар ахлуулсан таван сайдын бүрэлдэхүүн багтсан ажлын хэсэг ажиллаж санал, дүгнэлтээ гаргасан. Ажлын хэсэг байгуулагдахдаа үндсэн зургаан чиглэлээр ажиллах үүрэг авсан. Үүнд 1-д худалдан авсан процессыг шалгах, 2-т УИХ-аас тухайн үед ямар шийдвэр гарсан , 3-т худалдсаны дараа ямар шийдвэр гаргаж байв, 4-д санхүүжилтээс хаанаас босгов, 5-д 49 хувийг зарах саналыг Оросууд Засгийн газарт гаргахад яагаад татгалзав, 6-д санал дүгнэлт гэсэн чиглэлээр ажилласан. Ажлын хэсгийн дүгнэлтийг сонсоод Засгийн газрын зүгээс дараах шийдвэрийг гаргасан.
Нэгдүгээр, \”Эрдэнэт үйлдвэр”, \”Монголросцветмет” нэгдлийн 51 хувийн хувьцааны харьцааг алдагдуулсан Сангийн сайд Г.Болорын 255, 256 тоот тушаалыг хүчингүй болгохыг Б.Чойжилсүрэнд даалгасан. Ийм шийдвэр гарснаар өнөөдөр бий болоод байгаа ТУЗ-тай холбоотой шийдвэр хүчингүй болж байна.
Хоёрдугаарт, \”Эрдэнэт” үйлдвэр, \”Монголросцветмет”-ийн дүрмийг шинэчилж, ТУЗ-ийг шинээр томилж, гүйцэтгэх удирдлагын багийг зааглан, шинээр томилох шийдвэр гарлаа.
Гуравдугаарт, \”Эрдэнэт” үйлдвэр, \”Монголросцветмет” –ийг хувьчилсан Улсын нууцын зэрэглэлтэй 2016 оны зургаадугаар сарын 13-ний Засгийн газрын Оросын талын саналаас татгалзсан хуралдааны тэмдэглэлийг ил болгохоор боллоо.
Дөрөвдүгээрт, \”Эрдэнэт” үйлдвэр”-ийг худалдан авсан Худалдаа хөгжлийн банктай холбоотой асуудлыг шалгана. Хуулиар ХХБ-ыг шалгах эрх нь Монголбанкинд байдаг. Энэ чиг үүрийг Б.Чойжилсүрэн сайд, Монгол банкын удирдлагад өгсөн Засгийн газрын шийдвэр гарсан.
Өнөөдөр бид Засгийн газраас гаргасан шийдвэрийнхээ талаар УИХ дахь МАН-ын бүлэг дээр танилцууллаа. Энэ ажлаас болоод миний Эрдэнэтэд ирэх цаг хожимдсон. Та бүхнээсээ хүлцэл өчиж байна. УИХ дахь МАН-ын бүлгээс Засгийн газрын гаргасан шийдвэрийг сонсоод зарим нэг санал гаргасан. Тухайлбал, \”Эрдэнэт” үйлдвэр, \”Монголросцветмет”-ийг худалдан авах асуудлыг эхнээс нь нууцалсан өмнөх Засгийн газрын Гадаад харилцааны сайд, Сангийн сайд нар ямар учраас Оросын талын тавьсан саналаас татгалзах болсныг шалгаж тогтоох хэрэгтэй гэсэн. УИХ-ын зарим гишүүдээс Эрдэнэт үйлдвэрийн 49 хувийг авах саналыг ч гаргаж байсан.
Уулзалтад ирсэн та бүхний зүгээс ч Оросын талын 49 хувийг монголчууд өөрсдөө, эрдэнэтийн иргэд ч худалдан авмаар байна гэсэн санал дэвшүүлж байна. Би нэг л хариулт өгсөн. Түүнийгээ ч та бүхэндээ дуулгая. Эрдэнэт үйлдвэрийн 49 хувийн худалдаж авсан талд үүнийгээ төрд худалдаач гэсэн саналыг Ерөнхий сайдын хувьд тавьсан. Түүнээс биш тэрхүү 49 хувийг дээрэмдэх эрх байхгүй. Буруу шийдвэрийн улмаас Монголын төр, монголчууд хохирдог. Өмнөх Засгийн газрын Хан ресурстэй холбоотой гаргасан буруу шийдвэрийн улмаас Монгол улс их хэмжээний торгууль төлж байгаа. Бид дээрэмчин биш. Тиймээс төрд худалдаач гэсэн саналаа л тавьсан байгаа.
Мөн Эрдэнэт үйлдвэрийн 51 хувийн эрх мэдлийг шат шатанд нь Монголын тал хэрэгжүүлнэ. Өнөөдрөөс эхлэн Эрдэнэт үйлдвэр өмнөхөөрөө ажиллана. Төр ”Эрдэнэт” үйлдвэрийн ТУЗ-өө томилж, удирдлагын эрхээ хэрэгжүүлнэ” гэсэн юм
Ерөнхий сайдтай хийх уулзалтад хүрэлцэн ирсэн иргэд \”Одоо л бүтэн нойртой хонох нь” гэсээр уулзалт өндөрлөсөн юм.
Эх сурвалж: Erdenetnews.mn
