Канадын хамгийн олон хүн амтай бүс нутаг болох Онтарио мужид коронавирусний тархалт хумигдахгүй байгаатай холбогдуулан хатуу хязгаарлалт тогтоохоор болжээ.
“Онтариод халдвар авсан хүмүүсийн тоо өссөөр байна. Хэрэв одоо л арга хэмжээ авахгүй бол үр дагавар нь сүйрэлд хүргэнэ. Онтарио муж даяар 12 дугаар сарын 26-ны 00:01 цагаас эхлэн хорио цээрийн хатуу дэглэм тогтооно” гэж тус мужийн захирагч Даг Форд мэдэгдсэн байна. Гэхдээ Оттава, Торонто зэрэг хотууд оршдог мужийн өмнөд хэсэгт хязгаарлалт 28 хоног, хойд хэсгээр 14 хоног үргэлжлэх аж.
Хатуу хязгаарлалтын хүрээнд хүнс, нэн шаардлагатай бараа бүтээгдэхүүний дэлгүүрүүдээс бусад бүх дэлгүүр, спорт танхим, кафе, зоогийн газруудыг хаана. 12 дугаар сарын 21-нд эхэлсэн сургуулийн өвлийн амралтыг бага ангийн сурагчдын хувьд нэгдүгээр сарын 11 хүртэл, ахлах ангийн сурагчдынхыг нэгдүгээр сарын 25 хүртэл сунгахаар болжээ. Мужийн оршин суугчдад онцын шаардлагагүй тохиолдолд гэрээсээ гарахгүй байхыг зөвлөж байна.
Онтарио мужид сүүлийн долоо хоногт өдөр бүр халдварын 2000 гаруй тохиолдол илэрсэн бөгөөд дийлэнх нь Торонто болон түүний ойролцоох хотуудад бүртгэгджээ. Даваа гаргийн байдлаар Оттава хотод 31 шинэ тохиолдол илэрсэн байна. Мужийн захирагчийн мэдээлснээр, коронавирусний халдвар авч, эмнэлэгт хүргэгдсэн хүмүүсийн тоо сүүлийн долоо хоногт 70 хувиар өсжээ.
Цар тахал дэгдсэнээс хойш Канадад 507 мянга гаруй хүн халдвар авснаас 14200 нь нас барж, 416 мянган өвчтөн эдгэрсэн байна.
Америкийн “Pfizer”, Германы “BioNTech” компаниудын гарган авсан вакциныг Канадад 12 дугаар сарын 13-наас нийлүүлж эхэлсэн бөгөөд 12 дугаар сарын 14-ний өдрөөс тус улсад хүн амын вакцинжуулалт эхэлжээ.
