УИХ-ын Хууль зүйн байнгын хорооны өнөөдрийн хуралдаанаар, Монгол Улсын шүүхийн тухай хуулийн шинэчилсэн найруулгын төслөөр УИХ дахь АН-ын бүлэгт гурав хоногийн завсарлага өгөв.
Төслийг анхны хэлэлцүүлэгт бэлтгэсэн талаар УИХ-ын гишүүн, ажлын хэсгийн ахлагч Б.Энхбаяр танилцуулсан. УИХ-ын даргын захирамжаар байгуулагдсан Ажлын баг 6 удаа олон нийтийн хэлэлцүүлэг, бүх шатны шүүхийн төлөөлөл болсон 150 гаруй шүүгч оролцсон хэлэлцүүлэг зохион байгуулсан бөгөөд төсөлтэй холбоотой санал авчээ. Мөн УИХ-ын Тамгын газрын Парламентын судалгааны хүрээлэн болон судлаач, эрдэмтдээр холбогдох судалгаа хийлгэжээ. Ажлын дэд баг сүүлийн нэг сарын хугацаанд 21 удаа хуралдсан. Харин Ажлын баг 90-ээс дээш хувийн ирцтэйгээр 8 удаа хуралдаж, санал дүгнэлтээ боловсруулжээ. Зарчмын зөрүүтэй 75 саналын томьёоллыг бэлтгэсэн байна.
Ажлын баг Үндсэн хууль, түүнд оруулсан нэмэлт, өөрчлөлтийн үзэл баримтлалыг хатуу чанд баримтлан төслийг холбогдох хэлэлцүүлгэд бэлтгэх зарчмыг баримтлан ажилласан гэв. Мөн хуулийн төслийг боловсруулахдаа судалгаа шинжилгээ, олон улсын дэвшилтэт чиг хандлагыг нутагшуулах, одоо тогтсон буруу практикыг засах, сайжруулах, шүүх эрх мэдлийн хараат бус, бие даасан байдлыг хангах замаар шударга ёсны үйл явцыг биежүүлэх зарчмыг баримтлан ажилласан байна.
Ажлын багийн танилцуулгын дараа УИХ-ын гишүүн, УИХ дахь АН-ын бүлгийн дарга Д.Ганбат тав хоногийн засварлага авах горимын саналаа хэлж, холбогдох үндэслэлээ танилцуулсан. УИХ-ын чуулганы хуралдааны дэгийн тухай хуульд шийдвэрлэх хугацааг тусгайлан заасан асуудлаар нам, эвслийн бүлэг завсарлага авах бол хуралдаан даргалагч завсарлагын хугацааг хуулиар тогтоосон хугацаанд шийдвэрлэх боломжтой байхаар тогтооно хэмээн заасан. Уг заалтыг Байнгын хорооны дарга С.Бямбацогт танилцуулаад, гурав хоногийн завсарлага өгөхөөр шийдвэрлэв.
