Сүхбаатарын талбайд ХӨСҮТ болон ЗӨСҮТ-ийн Шуурхай хариу арга хэмжээний баг ажиллаж байна. Тэд иргэдийг бүртгэхийн сацуу Сүхбаатарын талбай орчимд ариутгал хийж эхэлжээ. Учир нь халдвартай иргэний ойрын хавьтал (нэг үү эсвэл хоёр хүн үү гэдэг нь тодорхойгүй байна) жагсаалд оролцсон тул цугласан иргэдээс шинжилгээ авч байна. Халдвартай иргэний ойрын хавьтал жагсаалд оролцсон тухай ХӨСҮТ-аас ЦЕГ-т мэдэгдсэнээр цагдаа нар ирж, ажиллаж эхэлжээ.
Өнөөдөр УИХ-ын гишүүн С.Ганбаатар өлсгөлөн зарласан. Иймд түүнийг дэмжсэн, гарын үсэг зурах гэсэн олон тооны иргэн цугласан юм. Иймд Төв талбайд олон тооны цагдаа ажиллаж, хамгаалалт гарган, иргэдийн бичиг баримтыг шалгасны үндсэн дээр шинжилгээнд хамруулах ажлыг эхлүүлжээ. Харин хамгаалалтын гадна талд буюу талбайн захад зогсож буй иргэдээс тарахыг, гэртээ очоод өөрсдийгөө долоо хоногийн турш гэрийн тусгаарлалтад байлгахыг чанга яригчаар анхааруулж байна.
Шинжилгээ авах шийдвэрийг хаанаас гаргасан талаар ЭМЯ-ны Хэвлэлийн албанаас асуухад “Бидэнд мэдээлэл байхгүй” гэв.
Иргэдийн гэрийн хаягийг бүртгэсний дараа гэрт нь очиж, PCR шинжилгээ авна гэх мэдээлэл байна.
