УИХ-ын чуулганы өнөөдрийн нэгдсэн хуралдаанаар Л.Оюун-Эрдэнийг Ерөнхий сайдаар томилох асуудлыг хэлэлцсэн юм. Чуулганы хуралдааны үеэр зарим гишүүд ахын хувиар Л.Оюун-Эрдэнэд захиас хэллээ.
УИХ-ын гишүүн Ц.Даваасүрэн: Төрийг залуу насны аагиар удирддаггүй. Төрийн удирдахад ухаан, зориг, чин сэтгэл, туршлага, дутагдлыг чинь нөхдөг баг хэрэгтэй. Хэрвээ чи өөрийгөө пальдигуудаар хүрээлүүлбэл магтсаар байгаад улс төрийн насыг чинь багасгана. С.Ганбаатарын амь насаа эрсдээд байгаа асуудлыг нэн яаралтай шийдэх ёстой гэж бодож байна. Бидний эхэлсэн шударга ёсонд харшлах зүйл байхгүй. Бид ч талбайд гарсан. Тэр үед цахилгаан тасалж, микрафоныг нь хааж новшроогүй шүү дээ. Тийм учраас миний дүү энэ асуудлыг хурдан шийдээрэй. Шинэ үе ам мэхэнд хууртахаа больсон. Чи өөрөө залуу үеийн төлөөлөл. Нийгэм ухаажиж хэрсүү болж байна. Бид сонгуулиар 65-уулаа гарч ирсэн. Бидэнд өгсөн итгэлийг зүтгэлээр хариулах ёстой. Улс төрийн үүрэг хариуцлагыг хэрэгжүүлэх нь Засгийн газрын үүрэг. Тийм учраас шинэ Засгийн газарт олон түмэн итгэл хүлээлгэж байна.
УИХ-ын гишүүн Н.Алтанхуяг: Хүнд хэцүү цаг үед Ерөнхий сайд болж байна. Урмын хугалахаар ууцын хугал гэдэг амжилт хүсэе. Цар тахлын үед дэндүү зохион байгуулалтгүй ажиллаж, асуудлыг хүндрүүллээ. Үүнийг цэгцлээрэй. Засгийн газар мөнгөө дураараа зарцуулдаг болсон УИХ-д би ороод ирсэн. Гайхаж байна. Мөнгөөр санал худалдаж авдаг асуудлыг шийдсэнгүй, нэг нам гээд нэгнээ хаацайлаад үлддэг асуудал ч хэвээрээ байна. Ийм их асуудал өөрийг чинь хүлээж байна даа. Зориг гаргаад ажилдаа дурлаад хийгээрэй. Шударга ёс тогтоож өгөөрэй би өөрөө орж ажиллана гэж хэлсэн. Манайхан нэг юм буруу ойлгоод байна. Шүүхийн тухай хууль баталчихаар шударга болчихдог юм биш. Нью-Йоркийн шүүхэд гаргасан нэхэмжлэлээ буцаасныг дахин гаргая. С.Ганбаатарынхаа өлсгөлөнг болиулъя. Хэдүүлээ нэг айлын хүүхдүүд шиг ажиллая. Чиний, миний гэх юм байхгүй.
УИХ-ын гишүүн Х.Болорчулуун: Сүүлийн үед сонгогдсон Ерөнхий сайдуудаас хамгийн залуу нь болж байна. У.Хүрэлсүхийн Засгийн газрын сайн үйлсийг нь буухиалж, залгамж болгон үргэлжлүүлэх үүргийг Л.Оюун-Эрдэнийн Засгийн газарт хүлээлгэж байна. Итгэлийг дааж ажиллана гэж найдаж байна. Өөрийг чинь олон сорилт хүлээж байна. Оюутолгойн асуулт давааг давах хамгийн том шалгуурын нэг. Өөрөө ч бас энэ асуудлаар Засгийн газрын ажлын хэсгийг ахалж байсан. Дубайн гэрээг уншиж ойлгох тусам гадныхан миний Монголын ард түмнийг дэндүү доромжилсон байна гэдгийг өөрөө хэлж байсан. Үүнийг цааш нь засаж залруулах том хариуцлага оногдож байна. Гадныхан үе үеийн Засгийн газрыг залилж ирсэн. Харин энэ удаа Л.Оюун-Эрдэнийн Засгийн газрыг аргалж, залилж чадахгүй гэдгийг харуулах хэрэгтэй шүү.
УИХ-ын гишүүн Т.Доржханд: 1980-аад оны төлөөлөл Засгийн газрын тэргүүн болж байна. Энэ бол сайны салхи салхилж байгаагийн илрэл. Тийм болохоор залуучуудыг төлөөлөөд эр зоригтой, эрч хүчтэй ажиллаарай. Миний нэг үнэлж явдаг зүйл бол Л.Оюун-Эрдэнэ сайд нам харгалзахгүй мэдлэгтэй, туршлагатай, мэргэжлийн хүмүүсийг Засгийн газартай урьж ажиллуулж байгаа. Танхимаа мэргэжлийн хүмүүсээс бүрдүүлээрэй гэж хэлмээр байна. У.Хүрэлсүхийн Засгийн газар хийсэн сайн ажлууд бий. Энэ ажлуудыг нэр төртэйгөөр авч яваарай.
УИХ-ын гишүүн Ж.Ганбаатар: Цар тахалтай, эдийн засаг хүндэрсэн, том сонгууль дөхсөн хүнд үед Ерөнхий сайд болох гэж байна. Л.Оюун-Эрдэнээс их юм гарна. Ийм хүнд үед түүний нэрийг харлуулах вий гэж айж байна. Хамаг цагаа улс төрийн маргаан руу зарцуулчих вий гэж санаа зовж байна. Улс төрийн маргаан биш эдийн засгаа өөд нь татахад цагаа гаргаарай.
УИХ-ын гишүүн Ц.Анандбазар: Монголын ард түмэн таныг залуу, шударга сайд гэдгээр нь сайн танина. Албан тушаал хүнийг эвддэг учир та шударга зангаа битгий гээгээрэй. Энэ бол таны ирээдүйн улс төрийн карьерын хамгийн сайн анд шүү.
