Сонгуулийн сурталчилгаа өнөөдөр хаана

Сонгуулийн
тухай хуульд заасны дагуу бүх шатны сонгуулийн сурталчилгааг санал хураалт
явуулах өдрөөс 24 цагийн өмнө зогсоодог. Тиймээс өнөөдөр 00.00 цагт сум,
дүүргийн ИТХ-ын сонгуулийн сурталчилгаа хаалтаа хийнэ. Сум дүүргийн ИТХ-ын
сонгуулийн сурталчилгаа энэ сарын 1-ний өдөр эхэлж, 17 хоногийн туршид
үргэлжиллээ.

Энэ
удаагийн сонгуулиар 21 аймгийн 1613 баг, нийслэлийн 9 дүүргийн 152 хорооны нийт
7282 төлөөлөгчийг сонгох юм. 7282 мандатын төлөө 15212 нэр дэвшигч өрсөлдөж
байна. ИТХ-ын сонгуульд МАН, АН, ИЗНН, Ногоон нам, БНН, МАХН, Эх орон, МҮАН,
ХҮН, АН-МАХН-ын хамтарсан \”Төв нутаг” эвсэл оролцож байна. Мөн 723 бие даагч
өрсөлдөж байгаа юм.

Сонгуулийн
сурталчилгаа хаах болсонтой холбогдуулан аймаг, нийслэлийн Засаг дарга нар \”архи
согтууруулах ундаа худалдаалахыг хориглох тухай захирамжаа гаргаж эхэллээ. Тодруулбал,
Нийслэлийн Засаг дарга бөгөөд Улаанбаатар хотын Захирагч С.Батболд
\”Сонгуулийн тухай хуулийн хэрэгжилтийг хангах зарим арга хэмжээний тухай”
А/722 дугаар захирамж гаргалаа.

Захирамжаар
Сум, дүүргийн иргэдийн Төлөөлөгчдийн Хурлын ээлжит сонгуулийн санал авах өдөр
буюу 2016 оны 10 дугаар сарын 19-ний өдөр нийтийг хамарсан арга хэмжээг
бүртгэж, зөвшөөрөл олгохгүй байхыг нийслэл, дүүргийн Засаг даргын Тамгын
газарт, соёл урлаг, үзвэр, спортын арга хэмжээ зэрэг олныг хамарсан
аливаа арга хэмжээ зохион байгуулахгүй байхыг нийслэлийн Соёл, урлагийн газарт
тус тус даалгасан байна.

 

Мөн
сонгуулийн санал авах болон техникийн тооллого хийх өдөр буюу 2016 оны 10
дугаар сарын 19, 20-ны өдрүүдэд архи, согтууруулах ундаа худалдах, түүгээр
үйлчлэхийг түр зогсоолоо.

 

Түүнчлэн
энэ өдрүүдэд гарч болзошгүй гэмт хэрэг зөрчлөөс урьдчилан сэргийлэх, замын
хөдөлгөөний ачааллыг бууруулах зорилгоор нийслэлийн нутаг дэвсгэрт үйл
ажиллагаа явуулж байгаа хүнс, барилгын материал, мод, модон материал, түүхий
эд, техникийн захууд болон худалдааны төвүүдийн тухайн 7 хоногийн амралтын
өдрийг сонгуулийн санал авах өдөр буюу 2016 оны 10 дугаар сарын 19-ний өдөр
шилжүүлэхийг аж ахуйн нэгж, байгууллагын удирдлагуудад үүрэг болгосон байна.