Улсын онцгой комиссын хурал дуусаж, Төрийн ордны А танхимд мэдээлэл хийлээ.
Шадар сайд С.Амарсайхан дараах мэдээллийг өглөө:
1. Бүх нийтийн хөл хорио тогтоохгүй байхаар шийдвэрлэлээ. Өөрөөр хэлбэл гамшгийн 4 түвшний шар зэрэглэлдээ бид шаардлагатай газруудад хэсэгчилсэн хязгаарлалт хийх замаар одоогийн байгаа дэглэмээ мөрдөж ажиллана. Гэхдээ ААН, иргэд халдвар хамгааллын дэглэмээ сайтар сахиж, өөрсдөөс шалтгаалах бүхий л эрсдэлгүй орчныг бүрдүүлж ажиллах шаардлага байна.
2. Вакцинжуулалт маргааш буюу 9-ний өдрөөс өргөн хүрээтэй эрчимжиж эхэлнэ. Өдөрт 16-20 мянган иргэнийг 85 цэгт вакцинжуулна. Хоёр сарын хугацаанд буюу 3, 4-р сард нийслэлийн насанд хүрсэн 1 сая иргэнийг дархлаажуулах ажлыг бүрэн хийж дуусгана.
3. Халдвар хамгааллын дэглэм, түүнд тавих хяналтыг сайжруулах тал дээр холбогдох байгууллагуудад зөвлөмж зөвлөгөө хүргүүлэх үүрэг даалгавар өглөө. Үзвэр үйлчилгээний байгууллагууд түр журмын хүрээнд халдвар хамгааллын дэглэм сахин ажиллаж байна. Дэглэм сахихгүй байгаа байгууллагуудад холбогдох хууль журмын хүрээнд хариуцлага тооцож ажиллах шаардлагатай гэж үзлээ. Халдвар гарсан газруудыг бүсчлэн хязгаарлах байдлаар явж ирсэн. Үүнээс гадна “Нэг хаалга-нэг шинжилгээ” үр дүнгүй болсон гэж олон нийт үзэж байх шиг байна. Энэ арга хэмжээ тодорхой хэмжээнд үр дүнгээ өгсөн. Энэ арга хэмжээг зохион байгуулаагүй бол халдварын тохиолдол 6500 буюу өнөөдрийн халдварын тохиолдлоос 2 дахин өндөр байх эрсдэл байсныг голомтыг хумьж, 37 нуугдмал голомтыг илрүүлсэн. Түүнээс гинжин хэлхээгээр явж байгаа тархалтуудыг тогтоож байна. Өнөөдөр гарч байгаа халдварууд энэ голомтуудаас илэрсэн.
4. Олон нийтийг хамарсан арга хэмжээ, урлаг соёлын тоглолтууд, үзвэр үйлчилгээний газрын үйл ажиллагааны цагийн хуваарилалтын зохион байгуулалтыг хийх эрх үүргийг нийслэл аймаг орон нутгийн удирдлагуудад өгч байна.
5. Хотоос гарах иргэд орон нутаг руу чиглэхэд тухайн орон нутаг өөрсдийн эрсдэлийн үнэлгээг хийж, нийслэлээс иргэдийг хүлээж авах үгүйгээ шийдвэрлэнэ. Очсон иргэд эрсдэл үүсгэхгүй байхаар зохион байгуулалт хийж ажиллана. Энэ хүрээнд хот хоорондын зорчигч тээврийг нийслэлээс гарах гарахгүй гэдэг хязгаарлалтыг хийхгүй, Төв аймагт өчигдрөөс эхлэн хэсэгчилсэн хязгаарлалт хийж байгаа. Үүнтэй адил тухайн орчиндоо өөрсдөө арга хэмжээ авч ажиллана.
Сэтгүүлчдийн асуултад хариулт өглөө:
-Урлагийн тоглолт, үзвэр үйлчилгээ, караокений үйл ажиллагааг хязгаарлах уу?
-Гуравдугаар сарын 4-нөөс дөрөвдүгээр сар гартал нийт 17 тоглолт төлөвлөсөн байна. 90 гаруй хувь буюу 14-15 тоглолтыг хойшлуулж цуцалсан. Урлаг, уран сайхныхан нийгмийн хариуцлагаа ухамсарлаж, нөхцөл байдлыг мэдэрч, тоглолтоо хойшлуулсан. Халдвар хамгааллын дэглэмээ бариад, 50 хүртэл хувийн дүүргэлттэйгээр мэргэжлийн байгууллагуудтай хамтран ажиллаж байгаа урлагийн тоглолт, үзвэр үйлчилгээний газрууд бий. Цаг үеийн нөхцөл байдлыг гадарлаад дийлэнх нь тоглолтоо цуцалсан.
