Словакийн Ерөнхий сайд Игорь Матович болон түүний Засгийн газар ОХУ-аас коронавирусийн эсрэг “Sputnik-V” вакцин худалдаж авах тухай нууц хэлэлцээрээс үүдэлтэй улс төрийн хямралыг намжаах зорилгоор мягмар гаригт бүрэн бүрэлдэхүүнээрээ огцорлоо.
Ингэснээр Словакийн Засгийн газар цар тахлын улмаас огцорсон Европын холбооны анхны Засгийн газар боллоо. Тус улсын Ерөнхийлөгч Зузана Капутова Ерөнхий сайдын огцрох хүсэлтийг хүлээн авсан бөгөөд Игорь Матовичийн Энгийн Хүмүүс намаас Эдуард Хегерийг Ерөнхий сайдын албан тушаалыг түр орлон гүйцэтгэгчээр томилж, цаашид шинэ Засгийн газар байгуулж, удирдахыг хүссэн байна.
Эдуард Хегер нь парламентын олонхийг бүрдүүлэгч гурван намын эвслээс бүрдсэн өмнөх Засгийн газарт Сангийн сайд болон Шадар сайдын албыг хашиж байсан юм. Тэрээр Игорь Матовичийн хичээл зүтгэлд талархал илэрхийлээд, түүний Ерөнхий сайдаас огцорч Засгийн газраа бүрэн бүрэлдэхүүнээр нь буулгасан явдал нь Словакийн улс төрд урд өмнө нь гарч байгаагүй хариуцлагын том дохио боллоо гэсэн байна.
Игорь Матовичийн Засгийн газар эвслийн гишүүдтэй зөвшилцөлгүй ОХУ-аас хоёр сая тун “Sputnik-V” вакцин худалдан авахаар нууц хэлэлцээр байгуулсан нь өнгөрөгч гуравдугаар сарын эхээр ил болсон нь тус улсын өнөөгийн улс төрийн хямралыг эхлүүлсэн юм. Популист улстөрч гэж тодорхойлогддог Игорь Матович эвслийн санал зөрөлдөөнийг үл харгалзан ОХУ-аас вакцин худалдан авсан явдал нь Европ тив дэх “COVID-19”-ийн халдварт хамгийн ихээр өртсөн тус улсын дархлаажуулалтын үйл явцыг түргэсгэх зорилготой байсан гэж мэдэгдэж байв. Словак улсад өнөөдрийн байдлаар “COVID-19”-ийн халдвар авсан батлагдсан 359 мянган тохиолдол, 9600 гаруй нас баралт бүртгэгдээд байгаа юм.
Гэвч Засгийн газрыг бүрдүүлэгч нөгөө хоёр нам болох Эрх чөлөө ба эв нэгдэл болон Ард түмний төлөө намууд цар тахлын эсрэг хэрэгжүүлж буй хариу арга хэмжээний асуудлаар Игорь Матовичийн эвслийг тэргүүлэгч Энгийн Хүмүүс намыг хүчтэй эсэргүүцэж, зөрчилдсөөр ирсэн. Харин эвслийн зөвшилцөлгүйгээр ОХУ-аас “Sputnik-V” вакцин худалдан авсан явдлын дараа тэд Игорь Матовичийг огцруулах, эс бөгөөс Засгийн газар болон парламентын эвслээс гарч олонхийн бүлгийг тараана гэж мэдэгдсэн юм.
Эвслийн Засгийн газар дахь Эрх чөлөө ба эв нэгдэл намын төлөөлөл болох Словакийн Гадаад хэргийн сайд Иван Коркок энэ асуудлаар “Sputnik-V вакцин бол ОХУ-ын барууны орнуудын эсрэг ашиглаж буй дайны хэрэгсэл. Тиймээс Игорь Матович уг вакциныг худалдан авсан явдал нь түүний барууны талыг баримтлагч эсэхийг тодорхойлоход эргэлзээ төрүүлж байна” гэх байр суурийг илэрхийлж байв. Мөн тэрээр Игорь Матович онгоцны буудал дээр хүрэлцэн очиж Оросын вакциныг өөрийн биеэр хүлээн авсан хэрнээ барууны вакцинууд ирэх үед огт очиж байгаагүй явдлыг гайхсан гэжээ.
Эрх чөлөө ба эв нэгдэл намын хувьд Европын Эмийн агентлагийн зөвшөөрөл олгосон вакцинаар ард иргэдээ дархлаажуулах байр суурийг хатуу хамгаалж байгаа аж. Харамсалтай нь, Европын Эмийн агентлаг “Sputnik-V” вакцинд хараахан зөвшөөрөл олгоогүй байгаа юм.
