Улс орноороо цар тахалтай тэмцэж, цагдаа, онцгой, мэргэжлийн хяналт, эрүүл мэндийн байгууллагын ажилтнууд халдвар тархаахгүйн төлөө цаг наргүй ажилласаар байна.
Тэд нойр хоолоо хасан, халдвар тээгчийг олж тогтоон тусгаарлахыг эрмэлзэхээс гадна төрөөс өндөр өртөгтэй ПГУ-ын шинжилгээний зардлыг хариуцан ажиллаж байгаа. Гэтэл салбарынхаа нэр хүндийг унагаж, хувийн өчүүхэн эрх ашгийг дээгүүрт тавьсан ХӨСҮТ-ийн албан тушаалтнуудын талаарх ноцтой мэдээлэл бидэнд олдлоо.
-ХӨСҮТ-ийн вирус судлаач Н эмнэлгийнхээ гадаа автомашиндаа нэг иргэнээс 40.000-60.000 төгрөгөөр удаа дараа шинжилгээ авсан.
-ХӨСҮТ-ийн удирдах албан тушаалтан Э, Д нар ДЭМБ, ЭМЯ-аас тус төвд хуваарилсан оношлуур, хэрэгслийг худалдан авснаар бүртгэж хувьдаа ашиг олсон, мөн хаана үйлдвэрлэсэн нь тодорхой бус 74.400 ширхэг ПГУ-ын оношлуур, түргэвчилсэн 8160 ширхэг оношлуурыг захиалан авсан.
-ХӨСҮТ-ийн хариу арга хэмжээний багийн гишүүн Н тусгаарлах байранд ороогүй халдвартай иргэнийг ес хоногийн турш тусгаарлах байранд байгаа гэх бүртгэлийг гаргасан.
-Унгар улс руу зорчсон иргэн З-ийн ПГУ-ын шинжилгээний хариу ЭЕРЭГ гарсан байтал СӨРӨГ гэсэн хариу өгч Европ руу нисгэсэн.
-Хариу арга хэмжээний багт ажилладаг О хөдөө явах ажилтай найз Л-ын нэрийн өмнөөс ПГУ-ын шинжилгээг өгсөн гэх мэдээллүүд бидэнд ирлээ.
Улсын төсвөөс ПГУ-ын оношлуурыг мэргэжлийн байгууллагуудад үнэгүй олгож, иргэдээс ПГУ-ын шинжилгээг төлбөргүй авах дүрэм журам хүчин төгөлдөр хэрэгжиж байсаар атал дээрх нэр бүхий хүмүүс тус шинжилгээг үнэтэй болгож иргэдээс мөнгө авах, шинжилгээний сорьцыг лабораторид оруулан үр дүнг нь үзэлгүй хариуг нь СӨРӨГ гаргах зэрэг хууль бус үйлдлийг үнэхээр гаргасан уу гэдгийг, мөн холбогдох ямар дүрэм журам зөрчсөн эсэхийг хууль хяналтын байгууллага эцэслэн тогтоохоор шалгаж байна.
Магадгүй дээрх албан тушаалтнуудын амин хувиа бодсон, хууль зөрчсөн увайгүй үйлдлээс болж өнөөдөр цар тахлын халдвар нийслэл, хөдөө орон нутагт хяналтгүй тархах үндэс болсон юм биш биз гэдгийг хуулийн байгууллага давхар шалгах шаардлагатай байна.
