Шадар сайд С.Амарсайхан ХӨСҮТ-д барьж буй хүчилтөрөгчийн үйлдвэртэй танилцаж байна. Тус үйлдвэрийг энэ долоо хоногт ашиглалтад оруулахаар ажиллаж буй юм.
ХӨСҮТ-ийн хүчилтөрөгч дамжуулах төв нь одоогоор өдөрт өндөр даралтын 100 ширхэг баллон буюу 600 шоо метр хүчилтөрөгч нийлүүлж байгаа ба ханган нийлүүлэлт тасалдах, өндөр даралттай баллон зөөвөрлөдөг.
Тус үйлдвэр ашиглалтад орвол өндөр даралттай баллон зөөвөрлөхгүй, газар доогуурх сүлжээгээр дамжуулан сэхээн амьдруулах, эрчимт эмчилгээний тасаг болон ковидын эмчилгээний өрөөнүүдэд хананы холбоосоор хүчилтөрөгчийг шууд дамжуулах нөхцөл бүрдэж, хүчилтөрөгчийн дутагдалд орохгүй нөхцөл бүрдэх юм байна.
Уг үйлдвэрийн барилгыг Меди Газ компани нийгмийн хариуцлагын хүрээнд барьж байгуулжээ
Халдварын тархалт нэмэгдэж байгаагаас хүчилтөрөгчийн хэрэглээ 4-5 дахин нэмэгдэж, хүчилтөрөгч тасалдах, өндөр даралттай баллон зөөвөрлөх шаардлага тулгарч байгааг өмнө нь хэлж байв.
ХӨСҮТ-ийн хүчилтөрөгчийн жилийн хэрэглээ 400 орчим сая төгрөг байдаг бол энэхүү зардлыг багасгах боломж бүрдэж байна гэдгийг тус төвийн захирал хэллээ.
Эмнэлэг түшиглэсэн хүчилтөрөгчийн хамгийн том үйлдвэрийг 10 хоногт барьж ашиглалтад оруулж байгаа бөгөөд үйлдвэр баригдсанаар ХӨСҮТ-ийн хүчилтөрөгчийн хэрэгцээг бүрэн хангаад зогсохгүй, цагт 5 баллон хүчилтөрөгч нөөцлөх, бусад эмнэлгийг хүчилтөрөгчөөр хангах боломж бүрдэж байна. Энэ сард 30 сая, жилд 360 гаруй сая төгрөг хэмнэх юм байна.
Энэ талаар ХӨСҮТ-ийн дарга Б.Баттөр “Анх хуучин үйлдвэрээ ашиглаж хийхээр төлөвлөж байсан ч шаардлага хангахгүй байсан тул тусад нь барилга барих шийдвэрийг гаргасан. Ингээд барилгын ажлыг 7 хоногт багтаан барьж, үйл ажиллагаа 5-6 хоногт жигдрэн өнөөдөр үйл ажиллагаа явуулахад бэлэн болоод байна” гэлээ.
Уг үйлдвэрийн барилгыг Меди Газ компани нийгмийн хариуцлагын хүрээнд барьж байгуулжээ.
