Дараах гурван зарчмыг МАН-ын удирдлагуудтай ярилцаж, хамтран хэрэгжүүлэхээр тохиролцсон байна.
1. Шинэ Үндсэн хуультай болно. Төрийн гаж тогтолцолцоог засаж, залруулж зөв тогтолцоотой болохоор санал бодлоо солилцож байна.
2. Байгалийн баялаг ард түмний өмч болох ёстой гэж үзэж байгаа. У.Хүрэлсүх дарга Засгийн газар удирдаж байхдаа уул уурхайн ордууд цөөхөн хэдэн хүний өмчлөлд шилжсэнээс болж хээл хахууль луйвар булхай их байна, тэндээс ирэх орлого ард түмэнд ирэхгүй байгааг байр сууриа илэрхийлж, зарим ордууд газруудыг хураах талаар идэвхтэй санаачилгатай ажилласан. Энэ талаар бид үргэлжлүүлэн хамтран ажиллана.
3. Нийгмийн чиг баримжаатай Бүгд найрамдах улсыг байгуулахыг зорьж байгаа. Дэлхийн хамгийн өндөр хөгжилтэй Норвеги, Швед, Англи, ОХУ зэрэг улсууд Үндсэн хуульдаа ямар улс байгуулахыг зорьж байгаа бичдэг. Тэнд нийгмийн чиг баримжаатай Бүгд найрамдах улс болно гэсэн байдаг. Ниймгийн чиг баримжаатай гэдэг нь залуучуудыг бүгдийг нь боловсролтой, нарийн мэргэжилтэй болгох. Эрүүл мэндийн асуудалд төр засаг нь илүү оролцдог, ажлын байрыг бий болгоход төр засаг нь тусалъя, хүмүүсийн хөдөлмөрийг шинээр үнэлж, цалин хөлсийг нэмэх зэрэг асуудлыг маш тэгш шударгаар тусгасан байдаг.
Дээрх гурван асуудлаар МАН-ын удирдлагууд буюу У.Хүрэлсүх, Д.Амарбаясгалан, Г.Занданшатар, Л.Оюун-Эрдэнэ нар хамтран ажиллах эр зориг, бодлого, хүсэл эрмэлзэл байгаа учраас хоёр нам нэгдэн нийлэхээр болсон. Мөн Монголын эрх ашгийн төлөө нэгдэж, дээрх асуудлыг зайлгүй хийх ёстой. Нэгэнт нэгдэж байгаа учраас МАН-аас Ерөнхийлөгчийн сонгуульд нэр дэвшиж байгаа нэр дэвшигчийг дэмжиж, сонгуульд ялах ёстой. Ерөнхийлөгч нь Засгийн газартайгаа зөрчилдөөд нэг нэгийгээ тараана гэсэн мэдэгдэл Сүхбаатарын талбай дээр уншаад, хууль шүүхийн байгууллыг талалцуулж байгаа нь Монголын өнөөгийн гаж тогтолцооны сүүлчийн илэрхийлэл. Тиймээс үүнийг таслан зогсоохын тулд Ерөнхийлөгчид МАН-ын нэр дэвшигч У.Хүрэлсүхийг ялуулахын төлөө МАХН-ын бүх шатны улс төрийн байгууллага, албан тушаалтнуудыг идэвхтэй ажиллана, ард түмэн маань дэмжээрэй гэдгийг МАХН-ын дарга Н.Энхбаяр онцоллоо.
МАХН МАН-тай нэгдсэний хариуд улс төрийн ямар албан тушаалыг авахаар тохиролцоо хийсэн бэ гэдэг сэтгүүлчийн асуултад Н.Энхбаяр “Үнэн хэрэг дээрээ яам, сайдын суудал тохирсон зүйл байхгүй. Мэдээжийн хэрэг хоёр нам нэгдэж байгаа учраас манай намын олон чадвартай хүмүүс орж ажиллаж болно. Гэхдээ энэ хүн тэр албан тушаалд очно гэж тохироогүй шүү. Энэ ажлыг хийнэ, энийг хийхэд тохирсон боловсон хүчнийг томилж ажиллуулна шүү гэдгийг тохирсон. Түүнээс нэр заагүй. Нөхөн сонгуулийн тойргийн хувьд хэн нэр дэвшиж ялах магадлал өндөр байна тэр хүн нэр дэвшинэ. Тэрийг хэн байхыг бид яриагүй. Хэрвээ Согинохайрханы нөхөн сонгуулийн судалгаагаар Батшугар өндөр рейтингтэй, ялах магадлал өндөр байвал дэвшүүлнэ. Миний хүү гээд дэвших, дэвшихгүй гэж хавчигдах нь шударга бус. Нөхөн сонгуульд 10 сард болох байх. Одоо бид бүх анхаарлаа Ерөнхийлөгчийн сонгуульд хандуулна” гэв.
Хэрвээ Ерөнхийлөгчийн сонгуульд МАН-ын нэр дэвшигч ялагдвал нэгдэл яах вэ гэдэг асуултад Н.Энхбаяр “Ерөнхийлөгчийн сонгуульд У.Хүрэлсүх ялагдсан ч МАХН энэ нэгдэлдээ үнэнч байж, үзэл баримтлалаа тууштай хэрэгжүүлэхийн төлөө бат зогсоно. Хүрэлсүхийн нэг давуу чанар бол хэлсэндээ байдаг хүн. Бид ч гэсэн хэлсэндээ байна” гэлээ.
Дашрамд дурдахад МАХН МАН-тай нэгдсэнээр Удирдах зөвлөлд 8, Бага хуралд 110, аймаг нийслэлийн тэргүүлэгчдэд 6, дүүрэг сумын намын тэргүүлэгчид 4, нийслэл дүүргийн намын хороонд 4 хүнийг МАХН-аас ажиллуулахаар тохиролцсон байна. Одоогоор энэ тоог эцэслэн тохирсон бөгөөд нэр зааж тохироогүй аж.
