Албан тушаалын тохироон дээр МАН, МАХН-ын нэгдэл тогтож байгааг өчигдрийн МАН-ын Бага хурлын шийдвэр харуулав. МАН-ын удирдлагууд МАХН-ыг нэгтгэж, Ерөнхийлөгчийн сонгуульд санал хуваагаагүйн төлбөрөө өчигдөр өгч, Н.Энхбаярын хүүг СХД-ийн нөхөн сонгуульд нэр дэвшүүлэхээр боллоо.
МАХН-ын дарга асан Н.Энхбаяр “Бид нэг үзэл бодолтой, асуудлуудад адилхан байр суурьтай байгаа. Нөхөн сонгуульд хэн дэвшихийг би мэдэхгүй байна. Нөхөн сонгууль болох үед МАН-ын гишүүнтэй ярилцаж, хамгийн өндөр ялах магадлалтай хүмүүсийг дэмжиж ажиллана. Миний хүү орох эсэх нь арын хаалга, тодорхой яриа хэлцэл хийхгүй. Хэн ч нэр дэвшсэн бид дэмжээд явна” хэмээн хоёр нам нэгдэхийн өмнө ярьж байв.
Гэтэл намынхаа Бага хурлын өмнөх өдөр намын удирдлагууд албан бус уулзалт хийж СХД-ийн нөхөн сонгуульд Н.Энхбаярын хүү Батшугарыг нэр дэвшүүлэхээр тохирсон гэх. МАХН-ынхны авах албан тушаал, тохироо үүгээр зогсохгүй. МАН-ын Бага хуралд МАХН-аас найман хүнийг оруулсан. Түүнчлэн МАХН-ын ерөнхий нарийн бичгийн даргаар ажиллаж байсан Б.Тулгыг МАН-ын нарийн бичгийн даргаар томилоод байгаа. Тэгвэл Б.Тулга намынхныгаа албан тушаалд томилуулахаар яам, агентлаг, төрийн өмчит компаниудаар анкетыг нь бариад явж байгаа сурагтай. Тухайлбал, нийслэлийн МАХН-ын дарга асан Э.Эрдэнэжамъяныг “Эрдэнэс Метан” компанийн захирлаар, МАН-ын Бага хурлын гишүүн болоод байгаа А.Энхболдыг “Эрдэнэс монгол” компанийн дэд захирлаар томилуулахаар зүтгүүлж байгаа аж.
Энэ бол МАХН-ынхны албан тушаалд очих хүсэл хийгээд тохирооны өчүүхэн хэсэг. Учир нь МАХН татан буугдах хүсэлтээ Дээд шүүхэд илэрхийлсэн өдрөө МАХН-ын 2200 хүн албан тушаалд очно гэдгийг Н.Энхбаяр дарга өөрөө хэлж байв. Тэрээр “МАХН-ын гишүүдээс Удирдах зөвлөлд найм, Бага хуралд 110 хүн, нийслэл, аймаг, намын хорооны тэргүүлэгч гишүүнээр зургаан хүн оруулна гэх мэтээр ярилцсан зүйл бий. Улсын хэмжээгээр МАХН-ын төлөөлөл 2200 орчим хүн намын албан тушаалд очно” гэж ярьсан юм.
МАН МАХН-д тохирсноо өгч, хүмүүсийг нь албан тушаалд томилсоор байна. Гэхдээ Н.Энхбаярын хүү Батшугар СХД-т гурав дахь удаагаа нэр дэвшээд ялагдвал яах вэ гэдэг тохироог мөн л хийсэн биз ээ.
