МАХН-ын дарга Н.Энхбаяр: Бид нэг үзэл бодолтой, нэг зорилготой, үүх түүхийн хувьд нэг учир тус тусдаа үйл ажиллагаагаа явуулах нь үр дүн муутай, цаг хугацаа алдсан. Иймд бид нэгдэж нэг үйл ажиллагаанд орохоор шийдвэрлэсэн. Уг шийдвэрийг гаргахаас өмнө анхан шатны байгууллагын бүх гишүүдээсээ саналыг нь авсан. Ингээд МАХН татан буугдаж байгаа талаар бичиг баримтаа Улсын дээд шүүхэд албан ёсоор гардууллаа.
Монголд Улс төрийн хүчин байгуулагдсаны 100 жилийн ой болж байна. Үүнийг хүндэтгээд цаашид залуучууддаа эх орноо сайн сайхан болгохын төлөө үүд хаалгаа нээж өгөхийн тулд нэгдэхээр шийдсэн. Энэ бол Монгол Улсын хөгжлийн шинэ эхлэлийн гараа. Хямралыг давж сүүлийн 30 жилийн ололт амжилтыг бататгах үйл хэрэг.
Бид МАН-тай нийлэхдээ хэд хэдэн зүйлийг баримталсан. Нэгдүгээрт, МАН, МАХН нэг гарал үүсэлтэй нам. Хоёрдугаарт, Оюу толгойн гэрээг засахтай холбоотой нэгдмэл байр сууринд хүрсэн. Гуравдугаарт, Дубайн гэрээг хүчингүй болгох ёстой гэдгийг бид олон жил илэрхийлсээр ирсэн. МАН-ын удирдлага Дубайн гэрээг хүчингүй болгоно гэдгээ албан ёсоор зарлаж байгаа. Мөн Эрдэнэтийн 49 хувийг авах үйл ажиллагаа хууль бус байсан гэдгийг би мэдэгдсээр ирсэн. Иймээс хууль шүүхийн байгууллагын гаж тогтолцоог засахын тулд нэгдэхээр болсон.
МАХН МАН-тай нэгдсэнээр Удирдах зөвлөлд 8, Бага хуралд 110, аймаг нийслэлийн тэргүүлэгчдэд 6, дүүрэг сумын намын тэргүүлэгчид 4, нийслэл дүүргийн намын хороонд 4 хүнийг МАХН-аас ажиллуулахаар тохиролцсон. Улсын хэмжээнд намын албан тушаалд МАХН-ын төлөөлөл болсон 2100 орчим хүн ажиллана.Энэ бол намын дотоод асуудал. Төр засгийн асуудлын хувьд орон сууцны төсөл, өргүй монгол, бага хүүтэй зээл олгох зэрэг ажилд МАХН-ын хүмүүс дайчлагдана. Тухайн асуудлыг шийдэхэд ямар хүмүүс ажиллах вэ гэдгийг хоёр талын ажлын хэсэг гарч шийднэ. МАХН, МАН-аас тус тус 5 хүнтэй ажлын хэсэг бий. Манай намаас би даргална. МАН-аас мөн намын дарга нь даргална. У.Хүрэлсүх Ерөнхийлөгчөөр сонгогдвол дараагийн дарга нь ажлын хэсэгт орно” гэлээ.
