Шатахууны үнийн асуудлаар Ашигт малтмал, газрын тосны газраас шатахууны үнийн нэмэгдлийн талаар мэдээллээ.
– Монгол Улсын газрын тосны импортын хэмжээ 2020 онд 1,4 сая тонн импортолсон ба эхний хагас жилийн байдлаар үүнээс 700 орчим тонныг хэрэглээд байна. Газрын тосны үнэ өсөх дараах хэд хэдэн шалтгаан байдаг. Бусад орны эдийн засгийн өсөлт нөлөөлдөг. Өнөөдрийн байдлаар ОХУ-д АИ-92 бензиний 1 литр нь 1950 төгрөгөөр зарагдаж байна. Мөн БНХАУ-ын зах зээлд нэг литр нь 3000 төгрөгөөр худалдаалагдаж байна. Он гарснаас хойш тус улсын зах зээлд түүхий газрын тосны эдийн засгийн өсөлтөөс шалтгаалж шатахууны үнэ 12 удаа өссөн. Олон улсын зах зээл дээрх брэнд тосны үнийн хэлбэлзэл нөлөөлнө. Өнгөрсөн 2020 онд түүхий газрын тосны үнэ нэлээн унасан.
Дөрөвдүгээр сард 19,5 ам.доллар буюу хамгийн доод цэгтээ хүрч байв. 2021 оны нэгдүгээр сард АИ-92 1830 төгрөгөөс 4-5-р сарын хугацаанд 3 удаагийн давтамжаар 1320 төгрөг хүртэл буурч доод түвшинд хүрч байсан.
ОХУ-ын Роснефьт компаниас авдаг нэг тонн АИ-92 бензиний үнэ 2020 оны 6-р сард 292 ам.доллар байсан бол яг нэг жилийн дараа 661 ам.доллар хүрч үнийн зөрүү 369 ам.доллар болов. Монгол Улсын хэмжээнд шатахууны 12,7 мянган тонн нөөц бий. Засгийн газраас авч хэрэгжүүлж буй арга хэмжээгээр АИ-92-ын 30 мянган тонн нөөц бүрдүүлэхээр сонгон шалгаруулалт явуулж байна. Бензиний үнэ нь шилэн, ямар ч тохиолдолд нээлттэй байдаг. Одоо импортоор 661 ам.доллароор орж ирж байна. Долларын ханш 2850 дээр харьцангуй тогтвортой байгаа. Мөн онцгой албан татварын хэмжээг тэглэсэн. Тиймээс өөрийн өртөг 1980 төгрөг дээр тогтож байгаа юм. Өөрөөр хэлбэл ОХУ-аас шууд худалдан авч байгаа үнэ болон ам.долларын ханшаас шалтгаалан тавигдаж байгаа үнэ юм.
