Коронавирусний цар тахлын эсрэг тэмцэлд дэлхийн хамтын нийгэмлэгийн ахиц дэвшил гарч байгаа ч маш аюултай үе шатандаа байна гэж Дэлхийн эрүүл мэндийн байгууллагын Ерөнхий захирал Тедрос Аданом Гебрейесус мэдэгджээ.
Тэрээр “Цар тахлын эсрэг тэмцэлд ахиц дэвшил гарч байгаа ч маш аюултай үе шатандаа байна” хэмээн цар тахлын эсрэг ACT-Accelerator олон улсын түншлэлийн зөвлөлийн хуралдааны үеэр хэлсэн байна. ДЭМБ-ын тэргүүн “энэ нөхцөлд “цорын ганц гарц” нь улс орнуудад хамгаалах хэрэгсэл, шинжилгээний болон эмнэлгийн хэрэгсэл, вакциныг тэгш хуваарилах явдал” гэв.
Одоогийн байдлаар вакцинтай улс орнууд цар тахалтай холбоотой хязгаарлалтыг сулруулж байна. “Харин хангалттай хэмжээний хангамж авч чадахгүй байгаа улс орнуудад өвчтөнүүд нь нас барах, эмнэлэгт хэвтэх “давлагаатай” нүүр тулж байна” гэжээ.
“Бид Ковид-19-өөс суралцах хэрэгтэй” гээд “дараагийн цар тахалд бэлтгэхийг” уриалсан байна.
Тэрээр мягмар гарагт НҮБ-ын Эдийн засаг, нийгмийн зөвлөлийн Улс төрийн форумд хэлсэн үгэндээ дээрх сэдвийг мөн хөндсөн байна.
Африк, Ази, Америк дахь өвчлөл огцом өсөлттэй байна хэмээгээд “Үнэндээ эдгээр тохиолдлоос зайлсхийх боломжтой” гээд дэлхийн хамтын нийгэмлэгт “халдвар дамжихаас урьдчилан сэргийлэхийн тулд боломжтой бүх хэрэгслийг ашиглахыг” уриалжээ. “Бид Ковид-19-өөс суралцах хэрэгтэй” гээд “дараагийн цар тахалд бэлтгэхийг” уриалсан байна.
ДЭМБ-ын мэдээлснээр цар тахал эхэлснээс хойш дэлхий дахинд коронавирусний халдварын 183.934.913 тохиолдол бүртгэгдэж, 3.985.022 хүн нас баржээ. Өнгөрсөн хоногт халдвар авсан хүмүүсийн тоо 326,231-ээр, нас баралт 6347-ээр нэмэгджээ.
ACT-Accelerator олон улсын түншлэлийг ДЭМБ, Европын Холбоо, Франц болон Билл, Мелинда Гейтс нар хамтран 2020 оны дөрөвдүгээр сарын 24-нд албан ёсоор эхлүүлсэн байна. ДЭМБ-аас “Ковид-19 өвчнөөс урьдчилан сэргийлэх, оношлох, эмчлэх аюулгүй, үр дүнтэй технологийг хөгжүүлэх, үйлдвэрлэх, ашиглах ажлыг хурдасгах дэлхийн хамтын ажиллагаа, түншлэл юм” хэмээн тайлбарлажээ.
Эх сурвалж: ТАСС
