АНУ-ын алдарт сагсан бөмбөгчин Леброн Жеймс 2021 оны долдугаар сард мэргэжлийн сагсан бөмбөгийн “NBA”-ын түүхэнд тоглогч байх хугацаандаа тэрбумтан болсон анхны тамирчин болсон. Тэрээр “NBA”-д 18 улирал тоглохдоо мэргэжлийн тамирчны гэрээнээс 300 сая ам.доллар, зар сурталчилгаа, брэндийн нүүр царайны лиценз, хэвлэл мэдээллийн хэрэгслийн гэрээ болон өөрийн нэрийн пүүзнээс 700 сая ам.долларын орлого олсон байна.
Фенүүдийнх нь хувьд “Хаан Жеймс”-гүй цуврал давсгүй хоолтой ялгаагүй юм. Бизнесийн талаасаа ч Леброн финалд тоглохгүй гэдэг нь “NBA”-ын удирдлагуудад ашиг орлого буурах хамгийн хүнд үед тооцогддог байна. Тэгвэл Леброн Жеймсийн Америкийн эдийн засагт үзүүлсэн нөлөөг судалсан сонирхолтой статистик баримтуудаас хүргэж байна.
-“Black Enterprise”-ийн тайланд, Жеймсийн тоглох хуваарьтай ордон, цэнгэлдэх хүрээлэнгээс нэг милийн зайд байрлах хоолны газар, баарны тоо дунджаар 13 хувиар өссөн бөгөөд үүнийг дагаад тус байгууллагуудын ажил эрхлэлт 24 хувиар нэмэгджээ.
Жеймс 2014 онд Кливлендэд эргэн ирснээ зарлах үед тийзний борлуулалт 15 дахин нэмэгдэж, 25 доллараас дунджаар 386 доллар болж, улирлын тасалбар хэдхэн цагийн дотор зарагдаж дууссан байна. Түүний эргэн ирэлт Кливленд хотын төвд хэдэн зуун сая долларын эдийн засгийн өсөлтийг бий болгожээ.
“Forbes” –ийн мэдээлснээр, 2010 онд Жеймсийн Кливлендээс явсны дараа зөвхөн франчайзын үнэ нэг жилийн дотор 476 сая доллараас 355 сая доллар болж буурахад хүргэжээ. Түүнчлэн, өөр нэгэн судалгаанд Леброн Жеймсийн Майами, Кливленд хоёрыг хэсэг хугацаанд орхин, буцаж ирсэн үйл явдал нь Америкийн эдийн засгийн байдалд хамгийн их нөлөө үзүүлсэн гэж тогтоогджээ.
FormSwift-н судалгаанд, Леброн Жеймс Кливленд Кавальерис, Майами Хит болон Лос Анжелес Лейкерс гэх багуудад тоглохдоо тухайн хот бүрийнхээ эдийн засагт дунджаар 400 сая ам.долларын шууд нөлөөг үзүүлж, 3000 орчим ажлын байр шинээр бий болгож, 29 сая долларын татварын орлого бүрдүүлдэг гэжээ.
ESPN-ийн мэдээлснээр, Жеймсийн шинэ “LA” өмсгөлийг нийтэд зарласнаас хойш 40 минутын дараа худалдаанд гарсан бөгөөд борлуулалтын эхний гурван цагийн дүн 2014 оны “Кавалвьерс” өмсгөлийн борлуулалттай харьцуулахад 600 хувь нэмэгджээ.
Үүнээс гадна “StubHub” дээр Лейкерсийн улирлын тийзний хамгийн доод үнэ 3499 доллараас 6500 доллар болж өссөн байна.
“НБА”-ын багийн өмчлөлийн бүлгийн гишүүд Леброн Жеймсийг зөвхөн гарын үсэг зурснаар франчайзын чиглэлд жилд 65 сая доллар олох боломжтой гэсэн дүгнэлтийг гаргасан байна.
Жеймсийн Лейкерстэй хийсэн дөрвөн жилийн хугацаатай 153 сая долларын гэрээний цалин жил бүр нэмэгдэж 2021-2022 оны улиралд буюу гэрээнийх нь сүүлийн жилд цалингийн хэмжээ нь 41 сая долларт хүрчээ.
