Америкийн түүхэнд хамгийн удаан хүлээгдсэн шүүх хурлуудын нэг болох 1996 онд гарсан рэппер Тупак Шакурын аллагын хэргийн шүүх хурал Даваа гарагт эхэлжээ.
Энэ үеэр хэргийг мөрдсөн прокурор Бину Пилал аллага гарах болсон шалтгааныг шүүгчдэд танилцуулсан байна.
Тухайлбал 1990-ээд оны үед Лос-Анжелес хотод үйл ажиллагаа явуулдаг байсан гэмт хэргийн бүлэглэлүүдийн нэг болох “South Side Compton Crips”-ийн босс “Keffe D” хочит Дуэйн Дэвис өрсөлдөгч бүлгийнхэнд зээ дүүгээ зодуулсны дараа уг аллагыг захиалсныг тэр танилцуулжээ.
“1996 оны есдүгээр сарын 7-ны өдөр Дуэйн Дэвисийн зээ дүү Орландо Андерсоныг камерын өмнө ичгүүртэйгээр зодсон үйл явдалд Тупак Шакур оролцсон байна. Үүнээс хойш хоёр цаг, хагасын дараа өшөө авах зорилгоор цагаан өнгийн Кадиллак автомашинаас Тупакыг буудаж хөнөөсөн” гэж тэр мэдүүлсэн байна.
Дэвис энэ үеэр өөрөө гох дараагүй ч арын суудалд байсан хэн нэгэнд буу өгч, буудах тушаал өгснийг Пилал батасан юм.
Уг аллагад ямар үүрэгтэй оролцсоноо Дэвис эхлээд цагдаагийн байцаалтын үеэр хүлээж, сүүлд хэвлэлд ярьж, хувийн дурсамждаа хүртэл оруулсныг прокурор шүүгчдэд танилцуулсан юм.
“Харин одоо 30 жилийн дараа бид та бүхнээс Дуэйн Дэвисд хариуцлага тооцохыг хүсэж байна” гэж Пилал шүүгчдэд хандан хэлжээ.
63 настай Дэвис өчигдөр өөрт нь тулгасан бүх хэргийг үгүйсгэсэн байна. Нэг сар гаруй хугацаанд үргэлжлэх төлөвтэй байгаа энэ шүүх хурлаар хэрвээ түүнийг буруутайг тогтоовол бүх насаар хоригдох ял сонсох юм.
2рac нэрээр алдаршсан Шакурын аллага нь Америкийн хамгийн дуулиантай гэмт хэргүүдийн нэг бөгөөд учир шалтгааны талаар эцэс төгсгөлгүй мэтгэлцээн шүтэн бишрэгчдийнх нь дунд өрнөсөөр байдаг.
Алагдахдаа 25 настай байсан рэппер Америкийн зүүн, баруун эргийн хип хоп өрсөлдөөний нэг гол дүр байв.
“California Love”, “All Eyez on Me” хит дуунуудыг бүтээсэн Шакур нь Нью-Йоркийн Харлем дүүрэг, Балтиморт өссөн боловч Лос-Анжелест үйл ажиллагаа явуулдаг Death Row Records студитэй гэрээ байгуулснаар баруун эргийн рэппер болж байжээ.
Энэ шүүх хурлаар Death Row болон зүүн эргийн Bad Boy Records студийн хооронд тухайн үед өрнөж байсан зөрчил тэмцлийн асуудлыг дахин сөхөх юм.
Bad Boy Records-ийг Шон “Дидди” Комб үүсгэн байгуулж, 1997 оны гуравдугаар сард алагдсан алдарт рэппер “The Notorious B.I.G” Уоллостой гэрээ байгуулж байсан түүхтэй.
Death Row Records нь Лос-Анжелесын гэмт хэргийн бүлэглэл Моб Пиругийн хамгаалалтад байсан, үүсгэн байгуулагч Мэрион Найт нь тус бүлэгтэй холбоотой байсныг прокурорууд баталсан байна.
Харин Bad Boy Records нь тэдний өрсөлдөгч бүлэглэл South Side Compton Crips-ээс бие хамгаалагчдыг хөлсөлдөг байжээ.
Найт, Шакур нар боксчин Майк Тайсоны тулааныг үзэхээр Лас Вегаст ирээд байхдаа студийнх нь ажилтныг зодсон нь Дэвисийн зээ дүү Орландо Андерсон байж.
Энэ зодооны дараа Дэвис өшөө хонзонгийн сэдлээр хариу арга хэмжээ авсны улмаас Шакур алагдсаныг прокурорууд тогтоожээ.
Уг хэргийн мөрдлөг хангалттай баримт нотолгоо байхгүй үндэслэлээр олон жил зогсоод байсан нь 2019 онд Дэвисийн дурсамж ном хэвлэгдсэний дараа дахин сэргэж байв.
Уг дурсамж номдоо Дэвис өөрийгөө цагаан Кадиллак автомашины урд суудалд байсан, арын суудалд байсан хүнд гар буу өгснөө хүлээж байжээ.
Гэхдээ тэр хэн Шакурыг буудсан талаар дурдаагүй байна. Тухайн үед Кадиллакт сууж явсан бүх хүмүүсээс өнөөдөр амьд сэрүүн үлдсэн ганц хүн Дэвис юм.
Сүүлд тэр өөрийн бичсэн зүйлийг номоо зарах зорилгоор нэмсэн “хачир” байсныг тайлбарлаж, Шакурын аллагад оролцсоноо үгүйсгэж байжээ.
Эх сурвалж: AFP
