Цар тахлын тархалт нэмэгдсэнээс эрүүл мэндийн салбарынхны ажлын ачаалал ихсэж, хүний нөөцийн дутагдал орж эхэлжээ. Ийм хүнд нөхцөлд эрүүл мэндийн салбарт резидент эмч нарын үүрэг оролцоо чухал хэрэгтэй байгааг ЭМЯ-наас мэдээлсэн билээ.
Энэ талаар ЭМЯ-ны Эмнэлгийн тусламжийн газрын дарга Б.Буянтогтох, Эмнэлгийн ажилчдын хомсдол үүсэх 2-3 шалтгаан байна. Нэгдүгээрт, Эмч, мэргэжилтнүүд халдварт өртөж байна. Нийт халдварын 2.3 хувийг эрүүл мэндийн салбарынхан эзэлж байна. Халдвар гарснаас хойш 50 мянга гаруй эмч, ажилчид халдварт өртсөн нь нөлөөлсөн. Эмнэлгийн ажилчид гадуур, эмнэлгийн бус орчноос халдвар авах нь улаан бүсэд ажиллахдаа халдвар авахаас өндөр байна.
Эрүүл мэндийн салбарын 50 мянга гаруй эмч, ажилчид ковидын халдварт өртсөн нь хүний нөөцийн хомсдол үүсэхэд нөлөөлсөн.
Хоёрдугаарт, Орон нутгийн эмнэлгүүдэд орны хүрэлцээ маш бага байна. Улаанбаатар хоттой харьцуулахад орон нутагт байрны нөөц боломж муу байдаг. 9-р сарын 10-ны мэдээгээр орон нутгийн эмнэлэгт 15320 хүн хэвтэн эмчлүүлж байгаагийн 12700 нь хөнгөн хэлбэрийн өвчтөн байна. Олон улсын зөвлөмжийн дагуу хөнгөн хэлбэрийн өвчтөн гэрийн тусгаарлалтад байж, эмчлүүлэх заалттай. Тэгэхээр хөнгөн өвчтөнүүд эмнэлгийн ор дүүргэн, эмнэлгийн ажилчдын ачааллыг нэмэгдүүлж байна гэлээ.
ЭМЯ-ны хэлтсийн дарга Б.Бумдэлгэр, Халдварын тархалт өндөр байгаа энэ үед тангараг өргөсөн эмч нар хамаг хүчээ шавхан ажиллаж байна. Эрүүл мэндийн тухай хуульд заасны дагуу “Резидент эмч гэж анагаах ухааны боловсрол олгох их, дээд сургуульд зургаан жил суралцаж, эмчлэх эрхийн зөвшөөрөл авсан, мэргэжил дээшлүүлэх шалгалтад хамрагдаж, нарийн мэргэжил эзэмшихээр суралцаж байгаа суралцангаа ажиллах статустай эмч нар юм. Улсын хэмжээнд сургалт эрхлэх 22 байгууллагад 1900 орчим резидент эмч суралцаж байна. Тэдний тал хувь нь II дамжаанд суралцаж байна. II дамжааны оюутнууд ирэх аравдугаар сард төгсөх учир дайчилгаанд хамруулаагүй. Ковидын эсрэг хариу арга хэмжээнд I дамжааны резидент эмч нарыг дайчилж байна.
2020 оны 1-р сарын 1-нээс резидент эмч нар цалннтай болсон. 2020 оны гуравдугаар сараас хойш тусгаарлах байр, дүүргийн эмнэлгүүд, 119 тусгай дугаарт эрүүл мэндийн зөвлөгөө өгөх, тандалт вакцинжуулалт, өрхийн эмнэлгүүд зэрэг анхан шатны тусламж үйлчилгээнд ажиллаж байна.
Одоогийн нөхцөлд резидент эмч нараас гадна эрүүл мэндийн салбарын 30 мянга гаруй албан хаагч ажиллаж байна. Мөн хувийн эмнэлгүүдийн эмч, эмнэлгийн ажилтнуудын ковидын эсрэг хариу арга хэмжээнд сайн дураараа ажиллахыг уриалж байна. Одоо коронавирусийн делта хувилбарын 3-р давлагаа дэгдэж, эрүүл мэндийн салбарынхан өндөр ачаалалтай ажиллаж байгаа энэ үед резидент эмч нарын хүч, үүрэг оролцоо чухал хэрэгтэй байна. Эх орон чинь дуудаж байна гэлээ.
2021 оны есдүгээр сарын 12-ны байдлаар нийслэлийн 156 өрхийн эрүүл мэндийн төвд 225, тусгай дугаарын 119 утасны оператораар 21 резидент эмч ажиллаж байна. Мөн Монголын өрхийн эмч нарын холбооноос сурган бэлтгэсэн 200 гаруй сайн дурын идэвхтэнүүд нийслэлийн өрхийн эмнэлгүүдийн хариу арга хэмжээнд дэмжлэг үзүүлэн ажиллаж байна.
Резидент эмч нар суралцах явцдаа Эрүүл мэндийн тухай хууль болон Резидент эмчийн ажиллах журмын дагуу Хөдөлмөрийн гэрээ байгуулан ажилладаг. Резидент эмчийн хөдөлмөрийн гэрээнд нийтийг хамарсан гамшиг осол, халдварт өвчин, цар тахал гарах, онц байдал, гамшгийн үеийн бэлэн байдал зарласан үед Эрүүл мэндийн асуудал хариуцсан Засгийн газрын гишүүний шийдвэрээр дайчлагдан ажиллах үүрэгтэй байдаг аж.
Резидент эмч нар ажиллах явцдаа нарийн мэргэжлийн үндсэн сургалтаасаа хоцрох асуудал гарч байгааг ЭМЯ-наас зохицуулалт хийн ажиллахаа мэдэгдсэн билээ.
ЭРҮҮЛ МЭНДИЙН САЛБАРТ САЙН ДУРЫН АЖИЛТНУУДЫГ СУРГАН АЖИЛЛУУЛНА
Коронавируст халдварын хариу арга хэмжээний хүний нөөцийн хомсдолыг арилгах, хүний нөөцийг нэмэгдүүлэх талаар ЭМЯ, ЭМХТ, НЭМГ, ХХЭМБНХолбоо хамтран өчигдөр шуурхай хурал зохион байгууллаа. Хурлаар өрхийн эрүүл мэндийн төвд шаардлагатай хүний нөөцийг хэрхэн шийдвэрлэх асуудлыг хэлэлцэж, зарим шийдвэр гаргажээ. Тухайлбал Эрүүл мэндийн сайдын тушаалаар өрхийн эмнэлэг болон тусгай дугаарын 119 лавлах утсан дээр ажиллаж байгаа резидент эмч нарын тоог нэмэгдүүлж, ажиллах үүрэг даалгавар өгчээ.
Мөн Улаан загалмай нийгэмлэгийн бэлтгэгдсэн сайн дурын ажилтнуудыг өрхөд дайчлагдахыг эрчимжүүлэн ажиллана. Цаг алдахгүй сайн дурын ажилтнуудыг дайчилж, өрхийн эмнэлгийн эмч нарын эмчилгээ, хяналтад зарцуулах цагийг нэмэхээр болжээ. Энэ хичээлийн жилд эрчимт эмчилгээ судлал, яаралтай тусламж судлал, дотрын анагаах судлал, эмнэлзүйн эмгэг судлал чиглэлээр үндсэн мэргэжлийн сургалтыг 2021 оны наймдугаар сарын 15-нд төгссөн эмч нарыг ажлын байранд зуучлах ажлыг эрчимжүүлэхээр болжээ.
Ингэснээр зарим эмнэлэгт шаардлагатай хүний нөөцийг бүрдүүлэх юм. 2021 оны аравдугаар сард эхлэх төрөлжсөн мэргэжлийн эмчийн сургалтад хамрагдагчдаас НЭМГ харьяа эмнэлгүүдэд түр хугацаагаар дүйцүүлэн дайчлах ажлыг мөн зохион байгуулах шийдэлд хүрсэн байна. Хан-Уул дүүргийн эрүүл мэндийн төвийн харьяа 145 ортой эмнэлэг болон МҮИС-ийн харьяа 300 ортой тусгаарлан ажиглах байранд хувийн хэвшлийн сайн дурын эмч, эмнэлгийн ажилчдыг дайчлан ажиллуулах, цалинг үндсэн байгууллага, илүү цагийг ЭМЯ-наас олгох асуудлыг шийдвэрлүүлэхээр боллоо.
Өмнөх хугацаанд ковидын хариу арга хэмжээнд оролцсон, дайчлагдан ажилласан хувийн хэвшлийн эмнэлгийн эмч эмнэлгийн ажилчдад урамшууллыг нөхөн олгох асуудлыг шийдвэрлүүлэх ажлыг холбогдох хүмүүст үүрэг болгов. УОК-ын ээлжит хурлаас өгсөн үүрэг даалгаврын дагуу Анагаах ухааны боловсрол олгох их дээд сургуулиудын оюутнуудыг ковидын хариу арга хэмжээнд ажиллуулах талаар БСШУЯ-тай зөвшилцөж ажиллуулах ажлыг зохион байгуулна.
