Боловсролын зээлийн сангаас зээл авч, дотоодын их дээд сургуулийг төгссөн 13 мянга гаруй хүн зээлээ төлж, дипломоо аваагүй байгаа аж. Тиймээс Боловсролын зээлийн сангийн 2008-2016 онд хөнгөлөлттэй зээлээр сурч төгссөн төгсөгчиийг арваннэгдүгээр сарын 15-ны дотор төлбөрийн үлдэгдлээ төлж дипломоо аваагүй тохиолдолд Монголбанкны зээлийн мэдээллийн сангийн муу зээлдэгч ангилалд оруулахаар болжээ.
Монгол Улсын Засгийн газрын 2004 оны 22 дугаар тогтоолоор 2003 оноос өмнө Сургалтын төрийн сангийн зээлээр суралцаж диплом болон бакалаврын боловсрол эзэмшсэн төгсөгчдийг зээлээс чөлөөлж диплом олгох, мөн 2004-2007 онд Сургалтын төрийн сангийн зээлээр суралцаж дипломын болон бакалаврын боловсрол эзэмшсэн төгсөгчид голч дүн 2.8-аас дээш, мэргэжлээрээ хоёр жил ажилласан бол чөлөөлж диплом олгох шийдвэр гаргаж байсан. Тэгвэл 2008 оноос хойш зээл авч, сурч төгссөн төгсөгчид ирэх сарын 15-ны дотор зээлээ төлөхгүй бол Монголбанкны зээлийн мэдээллийн санд оруулах юм байна.
Боловсролын зээлийн сангийн захирал Ж.Ариунболд: 1993-2016 оны хооронд дотоодын их дээд сургуульд суралцаж байсан оюутнууд дипломоо барьцаанд тавьдаг байсан бол гадаадын их дээд сургуульд суралцаж байгаа оюутнууд үл хөдлөх хөрөнгө барьцаанд тавьж зээл авдаг байсан. Энэ хугацаанд нийт 40 гаруй тэрбум төгрөгийг 30 орчим оюутанд хөнгөлөлттэй зээлийг олгосон байдаг. Одоо Боловсролын зээлийн сан дээр дотоодын их дээд сургууль төгссөн сурагчдын 13650 диплом байна. 2008-2016 оны хооронд төгссөн оюутнууд төлбөрөө төлөөд дипломоо авах хэрэгтэй. Хэрвээ зээлээ төлөхгүй бол Монголбанкны муу зээлдэгч ангилалд оруулна” гэсэн юм.
