3 сая төгрөгөөр Европ тивээр аялсан тэмдэглэл

$\"\"$

Дэлхийг тойрон аялах мөрөөдөл тээн алхаж яваа уншигчдадаа зориулан Д.Ундралын тэмдэглэлийг хүргэе. Түүнээс зөвшөөрөл авч, хувийн зургуудынх нь хамт тэмдэглэлийг нь нийтэллээ.

Намайг Ундрал гэдэг. Би энгийн л нэг айлын охин. Надад дэлхийг тойрон аялах агуу мөрөөдөл, халаас нимгэн зовлон давхцан байдаг. Гэхдээ юу гээч би мөнгөгүй гээд гэртээ суулгүй, нэг арга сэдээд 3 сая төгрөгөөр Европийн 5 улсаар аялаад ирсэн тэмдэглэлээ та бүхэнтэйгээ хуваалцаж байна….. 🙂

Ажилд орсноосоо хойш хамгийн эхний ээлжийн амралтаа авахаар болж, энэ хооронд юу хийж амрах вэ гэдэг бодол толгойноос салахгүй байв. Гэртээ зүгээр байлаа гэхэд, хоёр гуравхан хоног унтаад л уйдаж эхлэх байсан биз. Харин би 14 хоногийн амралтаа үр бүтээлгүй, цаг нөхцөөж өнгөрүүлэхийг хүссэнгүй. Тэгээд би аялалд гараад ирье гэж шийдсэн. Хаашаа гээч? Европ тив рүү.

Гэхдээ надад энэ зорилгоо биелүүлэхэд маань хүрэлцэх хэмжээний их мөнгө байсангүй. Бас мөнгөгүй гээд хойш суухыг ч бодсонгүй. Голомт банкнаас цалингийн зээл авахад шаардагдах материалуудыг бүрдүүлэн очоод л гурван сая төгрөгийн цалингийн зээл авчихлаа. /2 жилийн хугацаанд төлж дуусгана. Одоо ч гэсэн төлсөөр л байгаа./

Нэг мөсөн явсных Шведэд амьдардаг ахындаа, Нидерландад амьдардаг найз Cher-ийндээ, Германд амьдардаг ах Хосоогийндоо, бас мөрөөдлийн Франц улс, Балтийн тэнгис, Хойд мөсөн далай гээд бүх газраар явахыг хүсэж байлаа. Ингээд л хамгийн хямд зардлаар хэрхэн явж, аль болох олон улс үзэх вэ гэж бодсоор, интернэтээр хайсаар, хүмүүсээс асууж сурагласаар хамгийн хямдхан, хамгийн хурдан аялах төлөвлөгөөгөө гаргаадахлаа.

Онгоцны билетээ явахаасаа нэг сарын өмнө захиалсан учраас харьцангуй хямд үнээр буюу 1.600.000₮-өөр Air Market-аас дүү Сарнайгаасаа авав.

Харин бусад улс хооронд явах билетээ олон улсын билет борлуулдаг сайтуудаас худалдан авсан юм. Энэ нь харьцангуй хямд байдаг. Учир нь Монголын билет борлуулалтын цэгүүдээс захиалга өгвөл улс дамжин, өөр өөр авиа компаниудаас үнийн саналыг авах тул маш үнэтэй болох юм.

Мөн Европын улсууд хоорондоо ойрхон байдаг тул заавал нисэх ч шаардлагагүй. Герман улсаас Нидерланд улс руу гэхэд 3 цаг гаран хурдны замаар нисэх шахуу явсаар байгаад л оччихно.

HALLO? GERMANY

Ингээд аялал маань эхэлж, Улаанбаатар хотоос 7 цаг гаруй тасралтгүй ниссэний эцэст Герман улсын нийслэл Берлин хотод ирлээ. Эндээс л миний туршлагагүй аялагч гэдэг нь мэдэгдэж эхэлсэн. Учир нь Европ тивийн борооны улирал эхэлж, сэрүүхэн, чийгтэй цаг агаар намайг угтаж авсан юм. Харин би хавар намрын нимгэн цув өмсчихсөн бас даарчихсан ирлээ.

Онгоцны буудлаас гараад хамгийн түрүүнд нүдэнд тусаж, намайг алмайруулсан нэг зүйл бол цайвар шаргал өнгийн Бенз машинууд таксинд явж байх юм.

Эндээс Хосоо ах намайг тосон авч, Берлин хоттой танилцууллаа. Берлин хотын заавал үзэх, орох хэрэгтэй гэсэн алдарт Бранденбургийн хаалга, Александрын талбай, Райхстаг зэрэг газруудаар очиж, сонирхлоо. Энэ бүгдийг үзэхэд мөнгө төлөх шаардлагагүй. Харин Бранденбургийн хаалганы урд зогсож байсан цэрэг залуутай дурсгалын зураг татуулахад 2 евро төлсөн. Бидний цаг давчуу бас оройтсон байсан учир Хосоо ахын гэр байдаг Бремен хот руу явлаа. Танил ахынхаа буянаар Герман улсад мөнгө үрэлгүй аялчихсан юм даа.

AMAZING AMSTERDAM!

Герман улсаас Хосоо ахын машинтай Нидерланд улсын нийслэл Амстердам хотыг зорилоо. Хурдны замаар 3 цаг гаран давхисны эцэст үд дунд Амстердам хотноо ирлээ. Эндээс би найз Cher-тэй уулзаж, аяллаа үргэлжлүүлэх байсан юм. Хосоо ах харин өөр хот руу нь явлаа.

Би найзтайгаа Dam-ын талбайд уулзахаар тохирсон боловч намайг очиход тэр хараахан ирээгүй байлаа. Эртний уран хийц бүхий бор намхан байшингууд, энд тэндгүй холхилдох олон хүмүүс, үе үехэн чанга гэгч нь дугарах хонхны дуу, метро, олон янзын дэлгүүрүүд, юунд ч юм дараалан зогсох хүмүүс, Dam-ын талбай дээр тоглох явуулын жүжигчид, дуу дуулах эмэгтэй, жагсаал хийх жагсагчдыг харан зогсож байтал, найз бүсгүй маань UUUKAAA гэж чанга дуудсаар ирлээ.

Амстердам аяллыг маань хамгийн амттай болгосон хот байв. Бид МакДоналдс орж бургер идээд, чемоданаа ачаа түр хадгалах газарт байрлууллаа. Энд 10 евро төлдөг юм билээ. Ингээд л найз бүсгүйнхээ хамтаар хөлийн улаа эргэтэл Амстердамаар явав.

Би аль ч орноор орсон зөвхөн музей, дурсгалт газрууд, сонин содон зүйлсийг л үзэхийг тэмүүлж байсан учир секс музей, лааны тосон баримлын музей, Анна Франкын музейг сонирхов. Аан тийм, энд хар тамхи, биеэ үнэлэхийг хуулиар нь зөвшөөрсөн байдаг. Хар тамхи татаж үзээгүй ч, \”Улаан дэнлүү”-ны гудамжаар явж үзлээ. Зураг авахыг хориглох бөгөөд энд надтай адил зүгээр л сонирхож яваа хүмүүс их байх аж. Шилэн хоргоны ард бикини өмссөн, нүүрээ их тод будаж, ихэнх нь л хөх, өгзгөндөө силикон шахуулсан европ хүүхнүүд байв.

Энэ гудамжаас гараад нэгэн бааранд орж пиво уухаар тухаллаа. 0,25 мл пиво 2,20 евро. Монголтой харьцуулахад хамаагүй үнэтэй. Эндээс гараад бид Cher-ийн гэр рүү метрогоор явж урт удаан өдөр минь өнгөрсөн юм даа. Бид сайн амрахгүй бол маргааш орой нь дурлалын хот Парисыг зорих төлөвлөгөөтэй байлаа.

BONJOUR! PARIS

Интернэтээр Амстердамаас Парис хүрэх автобусны билет захиаллаа (нэг хүний 90 евро төлөв). Бид хоёр 6 цагийн турш автобусаар явсаар дурлалын хот Парист ирлээ.

Хамгийн түрүүнд Эйфелийн цамхгийг үзэхээр газрын зураг дээрээс хайгаад, тийш очих метронд суулаа. Метро урагшлах тусам Эйфелийн цамхаг улам л томорч, бүр л үзэсгэлэнтэй харагдаж, би хурдхан шиг дэргэд нь очоод харах юмсан гэж тэсч ядан байлаа.

\”Сайн уу? Эйфел. Би Монголоос ирсэн. Намайг Ундрал гэдэг.\” гээд дэргэд нь очингуут би маш чангаар орилчихсон. Найз Cher маань нүдээ том болгож ирээд л одоо болиосой гэж бодсон маягтай над руу харж билээ.

Парис хотын гудамжаар маш олон жижиг дэлгүүр, зураачид, дуу дуулж байгаа хүмүүс, шарвингийн газар байв. Энэ хүмүүс бүгд янз бүрийн үнэ хэлнэ. Чи өөрийгөө зуруулмаар байна уу? гэсээр нэгэн настай ах надаас асуув. Хэдээр вэ? Гэтэл 20 евро гэнэ. Үгүй ээ гээд явах гэтэл, За тэгвэл 15 гэх зэргээр үнээ тохиролцохыг оролдсон юм.

Бид хоёр эндээс Франц шарвин авч идээд, алдарт Мона Лизаг үзэхээр \”The Louvre”-ын музейг зорилоо. 2км гаран хүмүүс дугаарлан зогсох бөгөөд бид 1 цаг гаран хүлээсний эцэст Louvre-ын музей руу орлоо. 35 еврог төлдөг юм билээ.

Парис хотын бүх зүйл үнэ ихтэй. Харин гудамж дунд байрлах жижиг дэлгүүрээс хүзүүний зүүлт, бугуйн цаг, түлхүүрийн оосор зэргийг харьцангуй хямд үнээр авч болно. Шахуу төлөвлөгөөтэй явж байсан учраас нэг газартаа удаан байж чадалгүй, хамгийн сүүлд \”Парисын дарь эхийн сүм”-ийг үзээд л Нидерланд улс руу буцаж явахаар боллоо.

HEJ, SWEDEN

Парисаас Нидерландад буцаж ирсний дараа Швед улсын нийслэл Стокхольм хот хүртэл 2 цаг гаруй нислээ. Энэ нислэгийн зардлыг миний ах Нараа төлсөн бөгөөд 788 Швед крон болсон юм.

Стокхольм хот маш цэвэрхэн бас хаа ч явсан Монгол хүмүүстэй их тааралдана. Юмны үнэ ч \”сайхан” өндөр газар. Над мэтийн явуулын хүн ах, эгч маань байгаагүй бол үлдсэн хэдэн евро маань юунд ч хүрэхгүй дуусах байсан биз.

Стокхольм хот музей, дурсгалт газрууд маш ихтэй. Би алдарт АББА хамтлагийн музей, VASA хөлөг онгоцны музей, Нобелийн музей, Хатан хааны ордон музей, Шведийн хамгийн нарийхан гудамж, хамгийн өндөрлөг цэг зэргээр орлоо, зургаа авахууллаа. Стокхольм хотыг ахынхаа тусламжтайгаар харин ч нэг нүх сүв юу ч үлдээлгүй бүгдийг нь үзэж, бүрэн дүүрэн танилцах шиг болсон юм даа.

Тэнгис дээгүүрх Entertainment аялал

Ах Нараа, бэр эгч Аадай нарынхаа хамт Балтийн тэнгисээр аялах хөлөг онгоцны билет захиалж, 2 өдрийн турш тэнгис дээр амьдрах боллоо доо. Швед улс баруун өмнө талаараа Балтын тэнгистэй хил залгаа оршдог учир тэнгисийн дунд хүртэл удаан аяллаа. Хөлөг онгоцонд бүх зүйл байх юм. Диско бар, ресторан, татваргүй барааны дэлгүүр, free wi fi, тоглоомын төв, саун, тоглолтын танхим, казино гээд л хүн яаж амарч наргихыг хүсэж байна, тэр бүхэн нэг дор бүрдсэн байлаа.

Бид явсаар нар жаргахтай зэрэгцэн тэнгис дунд ирлээ. Хөлгийн тавцан дээр зураг авахаар гартал их усыг зүсэн урагш тэмүүлэх хүчит хөлгийн ширүүн салхинд золтой л хийсчихсэнгүй. Гэхдээ өмнө нь хэзээ ч мэдэрч байгаагүй гайхалтай мэдрэмж, үзэсгэлэнт төрхийг эндээс л олж харсан юм даа.

ЛАТВИ УЛСАД ХӨЛ ТАВИЛАА

Бидний суусан хөлөг онгоц аялсаар Балтийн тэнгисийн эрэгт байрлах, 1991 онд ЗХУ-аас тусгаар тогтносон хүн ам 2 сая гаруйтай Латви улсын нийслэл Рига хотод ирлээ. Хөлөг онгоц маань 8 цагийн дараагаар хөдлөх учир бид 3 Рига хоттой танилцаж амжив. Орос улсыг санагдуулам хэлбэртэй байшингууд, хуучны трамбайнууд, худалдааны төвүүд, гудамжны жижиг худалдаа ихтэй хот байв. Харин хүнсний захаас нь тун боломжийн үнэтэй жинхэнэ орос технологиор хийсэн пирошки, хиам зэргийг авч идлээ. Энд Оросын жижиг хотоор аялж байгаа мэт л сэтгэгдэл төрөхөөр байлаа.

Латвиас гараад Швед улсад ирэхэд би гэрээсээ гараад яг 14 хоносон байв. 14 хоногийн турш үргэлж л шинэ содон бүхэнтэй танилцаж, нислэгээс нислэг, автобуснаас автобусанд гэж явсаар нилээдгүй ядарсан ч залуу хүний эрч хүчээрээ сэтгэл дүүрэн, олон ч зүйлийг олж, мэдсэн, дэлхийн алдарт бүтээлүүдтэй танилцсан цоо шинэхэн бодолтой Ундрал гэртээ ирсэн юм.

Би хэрэв аялалд гарахаар зориглоогүй, зээл авч өөртөө хөрөнгө оруулалт хийхээр шийдээгүй байсан бол өдийд дэлхийн 5 шинэ улстай танилцаж, шинэ бүхнийг нээхээргүй байлаа. Танд л гэж хэлэхэд бидэнд асар их боломж нээлттэй байдаг. Гэвч энэ бүхнийг олж харахгүй, боломж байгаа гэдгийг мэдсэн ч түүнийгээ ашиглахыг хүсдэггүй, мөнгөгүй гэж бүхнийг хойш нь тавьж, ажил ихтэй байна, дараа дараа гэсээр өөртөө цаг гаргадаггүй юм шүү. Хүсвэл та ч гэсэн Европт байгаа найз нөхөд, ах дүү нартайгаа уулзаж, хямд зардлаар аялаад ирэх боломжтой. Харин таньдаг хүнгүй бол олон улсын аялагчидтай танилцдаг вебсайтууд олон бий. Энд аль оронд аялах гэж байгаагаа бичээд тухайн улсын аялагчидтай харилцан бартер хийж аялдаг юм.

Энд нэг зүйлийг нэмж бичих хэрэгтэй боллоо. Хүмүүс визний талаар их асуусан байна. Би Голланд найз Cher-ээсээ урилга авч, Германы элчинд Шенгений виз 15 хоногоор даруулсан.

Виз мэдүүлэхэд аялахдаа зарцуулах хангалттай хэмжээний мөнгөтэй гэдгээ батлах хөрөнгийн баталгааг мөнгө хүүлэгчээс 7 сая төгрөг авч баталгаа гаргуулаад 70.000 төгрөг өгсөн.

АСУУХ СОНИРХОХ ЗҮЙЛ БАЙВАЛ МЕССЭЖ ХЭСГЭЭР ХОЛБОГДОЖ БОЛНО ШҮҮ! БАЯРЛАЛАА….

Фэйсбүүк пэйж: Undral Dorj

эх сурвалж: unuudur.mn