Божи нэртэй гудамжны нохой усан онгоц, метро, автобусаар хотыг тойрон аялдаг Истанбулын алдартай нэгэн болжээ.
Түүний адал явдал хэдхэн сарын өмнө ил болж, хотын захиргааны ажилтнууд түүний хөдөлгөөнийг хянаж эхлэв. Тэд түүний авхаалж самбааг гайхаж байв.
“Тэр хаашаа явахаа мэддэг. Тэр хаанаас гарахаа мэддэг” гэж Метро Стамбулын үйлчлүүлэгчтэй харилцах албаны дарга Авлин Эрол хэлэв.
Божи өдөрт 30 км (18.6 миль) замыг туулж, олон арван метроны буудлаар дайрч, дор хаяж хоёр удаа усан онгоцоор аялдаг гэж тооцоолжээ.
Саяхан Божитой хамт хотыг тойрон нэг өдрийг өнгөрөөсөн Getty Images-ийн гэрэл зурагчин Крис МакГрат “Түүний хийхийг хүсдэг зүйл бол унаанд суух явдал юм. Тэр автобус, микроавтобус эсвэл ямар нэгэн тээврийн хэрэгслийн хажуугаар өнгөрөх болгондоо зүгээр л суухыг хүсдэг. Энэ үнэхээр хачин юм” гэжээ.
