Зам, тээврийн хөгжлийн сайд Л.Халтар: Арваннэгдүгээр сарын 24-нд УБТЗ-ын Ерөнхий хороо хуралдана. Энэ хурлаар УБТЗ-ын удирдлагын асуудлыг эцэслэн шийдвэрлэнэ.
УИХ-ын гишүүн Т.Энхтүвшин: Зээлийн үлдэгдлээр дүрмийн санг нэмэгдүүлж байгаа юм байна. Дүрмийн сангаа зээлийн эргэлтээр нэмэгдүүлэх юм уу эсвэл үндсэн хөрөнгөөр нэмэгдүүлэх үү.
Зам, тээврийн хөгжлийн сайд Л.Халтар: Дүрмийн сангийн нэмэгдлийг эргэлтийн хөрөнгөд оруулахгүй. Үл хөдлөх, хөдлөх хөрөнгө болгоно. Нэвтрүүлэх чадварыг нэмэгдүүлэх талд энэ хөрөнгийг зарцуулна.
УИХ-ын гишүүн Ц.Туваан: УБТЗ-ын хэлэлцээр анх 1949 онд байгуулагдсан. Хоёр тал хувь эзэмшдэг ч манай улсын нутаг дэвсгэр дээгүүр явж байгаа төмөр зам. Бусад социалист тогтолцоотой байсан улс орнуудын төмөр зам 100 хувь тухайн улсын өмчид шилжсэн байдаг. Гэтэл манайх 70 гаруй жил 50:50 хувьтай явж ирлээ. Үүнийг шийдэх ямар ажил хийж байна вэ. Мөн өнөөдөр хэлэлцэж байгаа УБТЗ-ын зээл ирэх оны төсөвт хэрхэн суусан бэ. Тавантолгой-Зүүнбаян, Тавантолгой-Гашуунсухайт чиглэлийн төмөр замын ажилд Оросын талтай ойлголцсон уу. Богдхан төмөр замын асуудалд Оросын талтай тохиролцсон уу. Оросын тал зөвшөөрөхгүй байгаа гэдэг яриа байгаа.
Зам, тээврийн хөгжлийн сайд Л.Халтар: 1949 оны хэлэлцээрийг өөрчлөх Монголын талын санал үндсэндээ дууссан. Оросын талтай энэ ажлыг эхлүүлэх ажлын хэсгийг байгуулъя гэдэг шатанд явж байгаа. Энэ яриа, хэлцэл цаашид үргэлжлээд явна.
УБТЗ-ын дүрмийн санг нэмэгдүүлэх асуудалд 2023 оны төсөвт сууна. Тиймээс ирэх оны төсөвт үүнтэй холбоотой асуудал тусгагдаагүй.
Тавантолгой-Зүүнбаян, Тавантолгой-Гашуунсухайт чиглэлийн төмөр замын ажилд Оросын талтай ойлголцсон уу гэж байна. Холболтын цэгүүд дээр УБТЗ-тай тохиролцоод асуудал шийдэгдсэн. Энд 100 хувь Монголын аж ахуйн нэгжүүд ажиллана гэдэг дээр ойлголцсон.
Богдхан төмөр замын тухайд энэ асуудал Оросын талд нээлттэй байгаа. Энэ төмөр замын ажилд Оросын тал хэзээ ч оролцсон бүрэн нээлттэй.
Ер нь техник технолгийн хувьд Богдхан төмөр зам УБТЗ-ын үргэлжлэл байх нь хамгийн тохиромжтой учир Оросын тал энэ ажил оролцох нь нээлттэй байх юм.
Сангийн сайд Б.Жавхлан: Энэ аж ахуйн нэгж нь өөрийн ашиг орлогоор дүрмийн сангаа нэмэгдүүлэх ямар ч боломжгүй явж ирсэн. Ачаа тээврийнх нь эргэлт нэмэгдэж байгаа учраас өөрөө өөрийгөө авч яваад байгаа юм. Цаашид УБТЗ-ын хүчин чадлыг нэмэгдүүлье гэвэл дүрмийн сангаа л нэмэгдүүлэх шаардлагатай. Тэгэхээр хоёр тал 50, 50 хувиар нэмэгдүүлнэ.
Энд яригдаж байгаа 131 тэрбум төгрөгийн 83.7 тэрбумийг дүрмийн санд нь оруулахаар Засгийн газар шийдвэрлэсэн.
Тийм учраас ойрын 1-2 жилийн хугацаанд Монголын төр энэ аж ахуй нэгжийн дүрмийн санг өөрт ногдсон хувь хэмжээгээр зайлшгүй нэмэгдүүлэх шаардлага байгаа юм. Харин төсвөөс нэмж мөнгө авалгүйгээр одоо байгаа авлагаа дүрмийн санд нь шилжүүлээд өгнө.
Үүнд ямар нэгэн хөнгөлөлт, чөлөөлөлт байхгүй, төсвөөс мөнгө гарахгүй.
Үлдэгдэл 47 тэрбум төгрөгийн тухайд Оросын талтай хэлэлцээр хийгээд 2025 он хүртэл урт хугацаанд төлнө.
