![\"\"](\"http://mongolianarmynews.com/wp-content/uploads/2016/11/ider.jpg" "\\"\\"")
Улаанбаатар цэргийн хүрээний ангиудын цэргийн алба хаагчдын цэргийн дүрэмт хувцасны үзлэг өнгөрсөн долоо хоногт явагдсан. Энэ тухай ЗХЖШ-ын Ар талын газрын Материал хэрэгслийн төлөвлөлт хангалтын хэлтсийн мэргэжилтэн, ахмад М.Идэрээс зарим зүйлийг тодрууллаа.
-Тус үйл ажиллагааг яагаад зохион байгуулах болов?
-ЗХЖШ-ын даргын 2016 оны тушаалаар өвлийн хувцсанд шилжсэнтэй холбогдуулан ЗХЖШ, ХЗЦК, АЦК болон \”Бөртэ” ТӨҮГ-аас томилогдсон тусгай комисс цэргийн алба хаагчдын хувцас хэрэглэлийн чанар байдал, цэргийн дүрэмт хувцас өмсөх дүрмийн биелэлтэд хяналт тавих зорилгоор Улаанбаатар цэргийн хүрээний 25 ангид дүрэмт хувцасны үзлэг, шалгалт явууллаа. Үзлэгээр цэргийн алба хаагчид цэргийн дүрэмт хувцсаа цэвэр нямбай, өнгө үзэмжтэй өмсөж байгаа болон хангалтаар олгогдож байгаа хувцасны чанар байдал нь эдэлгээний хугацаа нь хүрч байгаа эсэхийг шалгаад тодорхой дүгнэлтэд хүрлээ. Мөрдэс зүүн цэргийн албанд хүчин зүтгэж, төрийн нүүр царай болж л байгаа бол дүрэмт хувцас, бусад эд хэрэглэлээ зохих дүрмийн дагуу бүрэн, цэвэр цэмцгэр өмсч явах шаардлагатай.
-Үүнтэй холбогдуулаад ангиудад албан шаардлага хүргүүлээд байгаа гэсэн, энэ талаар?
-Манай цэргийн алба хаагчид хээрийн нөхцөлд үүрэг гүйцэтгэх зориулалттай хувцас, хэрэглэлийг иргэд, олон нийтийн газар, худалдаа, үйлчилгээний төвүүдээр өмсөж байгаа нь тун буруу. Хээрийн хувцсыг үүрэг гүйцэтгэхэд чөлөөтэй, биед эвтэйхэн, өнгөлөн далдлалтыг тооцож хийдэг болохоос загвар, дизайн, гадаад үзэмжийг чухалчилдаггүй. Тиймээс бид хувцас, хэрэглэлийг цэргийн дүрэмт хувцас өмсөх дүрмийн дагуу хэрэглэж, хэвшүүлэх, нэн ялангуяа хээрийн хувцас хэрэглэлийг дүрэмт хувцас өмсөх дүрэмд заагдсан хээрийн гаралт, дадлага, сургууль, жижүүр, хоногийн манаанд үүрэг гүйцэтгэх үед, ажлын цагаар ангийн байрлалд албаны хувцасыг өмсөж хэвшүүлэх зорилгоор албан даалгавар хүргүүлсэн байгаа.
Тэгэхээр хотоор хээрийн хувцастай алхаж болохгүй нь ээ?
-Тийм, цэргийн алба хаагчид өглөө энгийн хувцастай ажилдаа очиж тухайн өдрийн хичээл, сургалт, хээрийн бэлтгэл, сургууль, жижүүр манааг харгалзан ёслолын, албаны, хээрийн хувцсаа өмсөн үйл ажиллагаандаа оролцох юм. Тэгээд ажлын цаг дуусахаар буцаад энгийн хувцас өмсөнө гэсэн үг.
-Одоогоор үүнийг хэвшүүлсэн анги бий юу?
-Зарим хөдөө, орон нутгийн анги, салбарууд энэ дүрмийг мөрдөөд үйл ажиллагаагаа явуулж байна. Улаанбаатар цэргийн хүрээний ангиудаас гэвэл Зэвсэгт хүчний 310, 326 дугаар анги дээрх үйл ажиллагааг хэрэгжүүлж ажилдаа ирж, буцахдаа энгийн хувцас өмсөж хэвшээд жил гаруй болсон.
-Хотын гудамжаар явж байхад зарим иргэд хээрийн дүрэмт хувцас өмсчихсөн байхтай нэлээдгүй таарч байсан. Энэ байдлыг таслан зогсооход ч энэ журам эерэг нөлөө үзүүлэх байх?
-Тэгэлгүй яахав, өмнө нь дүрэмт хувцас хэрэглэлийг энгийн ард иргэд ихээр өмсөж хэрэглэдэг ба худалдааны газруудад зарж борлуулагдаж байсныг зогсоох үүднээс харьяа дүүргийн цагдаагийн байгууллагатай хамтран удаа дараа цэргийн хувцас борлуулж байгаа газруудаас хураан авч, шуурхай арга хэмжээ авч байсны дүнд зах, дэлгүүрүүдээр дүрэмт хувцас зарагдах нь зогсоод байгаа. Мөн хамгаалалтын албанд ажиллаж байгаа ажилтнууд өмсөж байсныг албан шаардлага хүргүүлснээр цэргийн дүрэмт хувцас өмсөхийг зогсоосон.
Цаашид ч гэсэн бид иймэрхүү асуудлуудтай тэмцэнэ. Дашрамд дурдахад, 2016 оны 12 дугаар сарын 01-ний өдрөөс эхлэн Зэвсэгт хүчний 032 дугаар ангийн Цэргийн цагдаагийн бүлэгтэй хамтран Улаанбаатар цэргийн хүрээний ангиудын цэргийн алба хаагчдын дээрх үүрэг, чиглэлийн хэрэгжилтийг шалгаж, цэргийн дүрэмт хувцасны зөрчилтэй болон хээрийн хувцастайгаар олон нийтийн үйлчилгээний газар, гудамж талбайгаар явж байгаа цэргийн алба хаагчдын зөрчлийг илрүүлж, холбогдох арга хэмжээг тооцон бүртгэж, дүгнэх болсныг нийт бие бүрэлдэхүүнд танай сониноор дамжуулан хүргэе.
Эх сурвалж: \”Соёмбо” сонин, дэслэгч М.Мөнхзориг
