Авлигатай тэмцэх үндэсний хөтөлбөрийг хэрэгжүүлэхэд Баянхонгор аймгийн удирдлага анхаарч ажиллахаар болов

 

Авлигатай тэмцэх газрын ажлын хэсэг Баянхонгор аймагт 2016 оны 11 дүгээр сарын 13- 15-ны өдрүүдэд ажиллав. Ажлын хэсэг аймгийн удирдах албан тушаалтан, орон нутгийн төрийн байгууллагуудын эрх бүхий албан тушаалтан, хувийн ашиг сонирхлын болон хөрөнгө, орлогын мэдүүлэг гаргагч төрийн албан хаагчид, шинээр томилогдсон буюу сонгогдсон сумдын ИТХ-ын дарга, Засаг дарга нар, нийт 293 хүнд УИХ-ын 2016 оны 51 дүгээр тогтоолоор баталсан Авлигатай тэмцэх үндэсний хөтөлбөрийн талаар танилцуулга хийж, \”Авлигаас урьдчилан сэргийлэх асуудал”, \”Хувийн ашиг сонирхлын болон хөрөнгө, орлогын мэдүүлгийн бүрдүүлэлт, орон нутгийн удирдлагын хэмжээнд гарч буй зарим асуудал” сэдвээр сургалт, мэдээлэл өглөө.

Түүнчлэн аймгийн хэмжээнд жижиг дунд үйлдвэрлэл эрхэлдэг хувиараа хөдөлмөр эрхлэгч нартай уулзалт зохион байгуулж, хэлэлцүүлэг өрнүүлэв. Уг хэлэлцүүлэгт мод, модон эдлэл үйлдвэрлэгч, худалдаа эрхлэгч, сүү цагаан идээ үйлдвэрлэгч, барилгын компанийн төлөөлөл нийт 20 орчим жижиг, дунд үйлдвэрлэгч оролцлоо.

Тэдний зүгээс Авлигатай тэмцэх хөтөлбөрийг хэлэлцэх хуралдааныг зурагтаар харсан, тэр үеэр Авлигатай тэмцэх газрын дарга ажлын хэсэг гаргаж орон нутагт ажиллуулна гэж хэлж байсандаа хүрч Та бүхнийг орон нутагт явуулж, бидэнтэй уулзуулж, ярилцаж байгаад баяртай байгаагаа илэрхийлэхийн зэрэгцээ жижиг, дунд үйлдвэрлэгч нарт төрөөс үзүүлдэг дэмжлэг эзэндээ ирэхгүй байгаа, төрөөс олгодог жижиг, дунд үйлдвэрлэлийн хөнгөлөлтэй зээлд бид хамрагдаж чаддаггүй, хэний ч мэдэхгүй, дөнгөж байгуулагдсан аж ахуйн нэгж тендер авдаг, Улаанбаатараас ирсэн компани удирдлагуудтай хэлцэл хийгээд л ажил авч байна, тэгээд ажлаа хийлгүй зугтдаг, мэргэжлийн хяналтын дарамт их байгааг шүүмжлэн ярьж байв.

Мөн \”Та бүхний зүгээс хүүхдийг бага наснаас нь авлигаас урьдчилан сэргийлэх, шударга хүн болгох асуудлыг нэн даруй эхлүүлэхгүй бол болохгүй нь ээ. Өнөөдөр гэрийн хаалганаас гараад л авлигатай тулгарч байна, ард түмэн цөхөрч байна. Иймд буруутай этгээд, ялангуяа өндөр албан тушаалтнуудыг зоригтой шийтгээч ээ. Яг 10 жил бизнес эрхэлсэн хүн, 10 жил төрийн албанд ажилласан хүнээс ядуу байна, яг анх ямар байсан тэр хэвээрээ байна, гэтэл төрийн албаны хүн нүдэн дээр баяжаад байна, энэ чинь өөрөө хүнийг буруу сэдэл төрөх боломжийг олгоод байна. Жижиг, дунд үйлдвэрлэл эрхлэхэд дэмжлэг олгох зээл хөтөлбөрийн сонгон шалгаруулалтыг иргэд бид өөрсдөө хийдэг болмоор байна, хэн нь юу хийж чадна, чадахгүйг мэдэх тул энэ асуудлыг иргэд гүйцэтгэдэг болгох, төр хэтэрхий их юманд анхаарал хандуулж хүч зарцуулах юм, зарим асуудлыг хувийн хэвшил, иргэндээ өгдөг болох хэрэгтэй” гэж санал бодлоо хэллээ.

Авлигатай тэмцэх газрын ажлын хэсэг Баянхонгор аймгийн ИТХ-ын дарга буюу Гэмт хэргээс урьдчилан сэргийлэх зохицуулах зөвлөлийн дарга, аймгийн Засаг дарга нартай уулзаж ярилцсанаар Авлигатай тэмцэх хөтөлбөрийн хэрэгжилт, авлигын эсрэг хууль тогтоомжийн хэрэгжилт, хувийн ашиг сонирхлын болон хөрөнгө, орлогын мэдүүлэг бүртгэх, хадгалах чиг үүрэг бүхий ажлыг хариуцан гүйцэтгэх орон тооны ажилтныг Засаг даргын Тамгын газарт ажиллуулах, 2017 оны орон нутгийн төсөвт уг хөтөлбөрийг хэрэгжүүлэхэд зарцуулагдах хөрөнгийг тусгах, хөтөлбөрийг хэрэгжүүлэх чиглэлээр орон нутагтаа төлөвлөгөө гарган ажиллахаар тогтлоо.