Украины Ерөнхийлөгч Владимир Зеленский тус улс дахь байлдааны ажиллагаанд цэг тавихын тулд зарим талаар буулт хийх асуудлыг авч үзэхэд бэлэн гэдгээ дахин илэрхийлжээ. Энэ талаар Украины ZN.ua сайт мэдээлсэн байна.
Эх сурвалжийн мэдээлснээр, Зеленский дайн эхэлсэн үеэс л ийм байр суурьтай байгаа ч Украинаас “урвахгүй ” гэж онцолж байгаа гэнэ. Энэ талаар Украины Ерөнхийлөгч Bild TV-д өгсөн ярилцлагадаа онцолжээ.
“Нөгөө тал ч мөн адил буулт хийхэд бэлэн байх ёстой. Тэгэж байж л үүнийг буулт гэж нэрлэнэ. Энэ талаарх дэлгэрэнгүй мэдээллийг одоо хараахан ярих боломжгүй” хэмээн Зеленский өгүүлжээ.
Түүнчлэн Оросын Ерөнхийлөгч Владимир Путинтэй шууд хэлэлцээ хийгээгүй, “гагцхүү хоёр ерөнхийлөгчийн хоорондын шууд хэлэлцээний дараа л бид дайнд цэг тавьж чадна” хэмээн Зеленский мэдэгдсэн байна.
Энд дуулгахад, ОХУ, Украины төлөөлөгчид гурван шатны хэлэлцээр хийсэн ч төдийлөн үр дүнд хүрээгүй байгаа. Өнөөдөр буюу гуравдугаар сарын 10-ны өдөр ОХУ, Украины Гадаад хэргийн сайд нар Туркийн зуучлалтайгаар тус улсын Анталья хотод уулзахаар болсон юм.
