Төв талбайд өчигдөр болсон жагсаалыг цагдаагийн алба хаагчид 03:40 цагт албадан тараасан.
Ингэхдээ жагсаж байсан иргэдийн биед халдаж, чирч өшиглөх гэх зэрэг зохисгүй үйлдэл нь дүрс бичлэгт тод үлдсэн байсан. Энэ талаар ЦЕГ-аас тайлбарлав.
ЦЕГ-ын дэд дарга Р.Отгонжаргал:
-Өчигдөр өглөө 10.00 цагаас залуус Төв талбайд тайван жагсаалыг эхлүүлсэн. Урьдчилж мэдэгдсэн жагсаал биш байсан. Жагсаал хийж буй иргэдэд үзэл бодлоо тайвнаар илэрхийлэх, иргэдийн эрх чөлөөнд халдахгүй байх талаар удаа дараа сануулсан. Цагдаагийн байгууллага өнгөрсөн шөнө тасралтгүй хянаж ажиллаа.
18.00-19.00 цагийн үед жагсаалын бүтэц өөрчлөгдөж, мэдээлэл хийхээр гарч ирсэн хүн рүү ус, ундааны сав, талх шидэх үйлдэл гаргасан.
Жагсагч нэг эмэгтэйн толгой хагарч, хоёр оёдол тавиулсан. Нийтийг хамарсан эмх замбараагүй байдалд бусдыг уриалах, цагдаагийн алба хаагчийн шаардлагыг хүлээж аваагүй. Улсын онцгой объект Их тэнгэрт очиж жагсаалыг үргэлжлүүлсэн. Цагдаагийн алба хаагчийн толгойг хагалсан. Хүний тоо буураагүй, жагсаал намжаагүй тул шөнийн 03.40 цагт албадлагаар жагсаалыг тараасан.
Жагсагчдыг тарахыг шаардаж, 20 гаруй иргэнийг түр саатуулан шалгаж байна. Эсэргүүцлийн зэргийг шалгахад 18 хүн согтууруулах ундааны зүйл хэрэглэсэн нь илэрсэн.
ЦЕГ-ын хэвлэл мэдээллийн төвийн дарга Б.Баатархүү:
-Цагдаагийн 7 алба хаагчийн хөл, гар хугарч, толгой нь хагарсан учраас эмнэлгийн тусламж аваад байна. Жагсагчид шаардлагыг эсэргүүцсэн тул цагдаагийн алба хаагчид хуулийн дагуу арга хэмжээ авсан.
Залуусыг уриалж, буруу зүйлс рүү чиглүүлээд байгаа иргэдийг тусгаарлах, түр саатуулах арга хэмжээ авсан. Улаанбаатар хотын төв замыг хааж жагсагчид явсан.
Цагдаагийн алба хаагчид шаардлага тавьж явган хүний замаар алхахыг зөвлөхөд цагдаагийн машин руу чулуу шидсэн.
Нэг ч нохой тавиагүй, ус шүршээгүй…
Жагсаал цуглааныг тараах явцын талаар цахим хуудаснаа нийтлэгдсэн зарим зургаас хүргэж байна.
