Б.Аззаяа: Нөхөрлөл гэдэг хүсэл сонирхол нэгтэй хүмүүсийн нандин холбоо

 

Өвөрмөц дуу хоолойгоороо үеийнхнээ манлайлж чадсан авъяслаг охин Б.Аззаяатай цөөн хором ярилцлаа.

-Цас өдрүүд үргэлжилж буй өдрийн мэнд хүргэе. Манай уншигчдад өөрийгөө танилцуулаач хаана сурдаг вэ?

Таньд болон танай сайтнаас мэдээ дэлээлэл авдаг бүх монголчууддаа энэ өдрийн мэнд хүргэе. Би Гончигсумлаагийн нэрэмжит Хөгжим бүжгийн коллежийг 2015 онд \”Хийлч” мэргэжлээр төгссөн. Одоо Шихихутуг дээд сургуулийн Эрх зүйн хоёрдугаар дамжаанд сурдаг.

-Яагаад хийлийн ангийг сонгон орсон вэ. Хийл тоглож уран бүтээл гаргах уу?

Хатан хөгжим гэсэн утгаар сонгосон. Өөрөө ч бас сонирхолтой. Хийлээ тоглож уран бүтээл гаргах бодол бий.

-Дуулсан дуунууд чинь хандалт сайтай байгаа. Одоо ямар уран бүтээл дээр ажиллаж байна?

Оюутны амьдрал маш завгүй байдаг. Тэр тусмаа хуулийн сургуулийн оюутных. Зав зай гаргаад уран бүтээлээ мөн алдалгүй авч явахыг хичээж байгаа. Сүүлд дуулж клипжүүлсэн \”Сүүн далай ээж\” дуу маш олон хүний сэтгэлд нийцсэнд их баяртай байгаа. Хэд хоногийн өмнө мөн \”Төрсөн өдөр\” дуундаа 2016 студээр клип хийлгэсэн. Хүмүүст таалагдана гэж найдаж байгаа. Арван хоёр сард \”Төгсгөлийн бүжиг” гэсэн уран бүтээл гаргах гэж байна.

-Цаашдаа энэ маягаараа хуучин дууг шинэчлэж дуулах уу эсвэл өөр шинэлэг дуу гаргах уу?

Залуу дуучин болохоороо эхлээд хүмүүст хүрсэн, хоногшсон дуунуудыг анхных нь хувилбараар хүргэе гэж бодсон. Удахгүй өөрийн гэсэн хэв маяг бүхий шинэ уран бүтээлийн ажилдаа орох төлөвлөгөөтэй байгаа.

2004 онд 6 настайдаа \”Бяцхан мисс\” тэмцээнд оролцож \”Дууч бяцхан мисс\”-ээр шалгарч өөрийн цомог бичүүлэх эрхээр шагнуулж, анхны \”Өхөөрдөм аяз\” цомгоо гаргаж байлаа. Тухайн үедээ цөөхөн хувь хэвлүүлээд дууссан. Хүмүүс хүүхдүүддээ сонсгохоор их асууж байсан тул \”Тавтай нойрсоорой\” зэрэг хэд хэдэн дуугаараа баяжуулаад дахин цөөн хувь хэвлүүлж HiFi cd shop-д байршуулаж худалдаалж байгаа. 

-Skyline хамтлаг уран бүтээл хийх гэж байгаа гэж сонссон. Уран бүтээлийн ажилдаа орсон уу?

2014 онд Хөгжим Бүжгийн коллежийн ангийн найз Э.Сэвжиддуламтай нийлээд Skyline хамтлагийг байгуулсан. Цаашдаа хамтлагийнхаа уран бүтээлд ч бас анхаарлаа хандуулах төлөвлөгөөтэй байна. Бид хоёр \”Sing like Pro” студитэй гэрээтэй ажилладаг. Гадаадын дуучдын дууг коверлон дуулж байгаа.

-Нөхөрлөлийг юу гэж боддог вэ?

Нөхөрлөл гэдэг бол найзаар нь хүнийг таньдаг гэдэг болохоор үзэл бодол, хүсэл сонирхол нэгтэй хүмүүсийн хоорондын хамгийн нандин холбоо гэж хэлэх байна.

-Аззаяа хэр зарчимч вэ?

Би зарчимч. Зарчимч байхыг хичээдэг. Хүн өөрийгөө, өрөөл бусдыг хүндэлдэг, үүрэг хариуцлагаа мэдэрдэг байх ёстой гэж боддог.

-Уран бүтээлдээ хэрэгжүүлэх гэж байгаа ойрын болон холын зорилгоосоо дуулгаач.

Уран бүтээлтэй холбоотой ойр, холын төлөвлөгөө, зорилго бий. Тэр бүрийг ярихаасаа илүү зорилгодоо алхам алхамаар хүрээд хийсэн бүтээсэн тухайгаа ярих нь илүү сонин байна гэж бодож байна.

Танай сайтаар дамжуулж үе тэнгийн найзууддаа хандаж миний дууг сонсдог, намайг дэмжиж урам зориг нэмдэгт тань баярлаж, та нарынхаа итгэлийг дааж улам сайхан дуугаар сонорыг тань мялаана гэж хэлье. Бас хичээл сургуулийнхаа хажуугаар өөрийгөө авьяас чадвараа хөгжүүлэхийг хичээж цаг заваа зохицуулаарай. Ээж аав, багш нарынхаа итгэл найдвар нь гэдгийгээ байнга санаарай л гэж дамжуулья.

 

-Ярилцлага өгсөнд баярлалаа. Хичээл, уран бүтээлийн өндөр амжилт хүсье

Намайг сайтдаа зочиноор урьсанд баярлалаа. Танай сайтын хамт олны ажилд амжилт хүсье.

 

Ю.Нямгэрэл