НҮБ-ын Гамшгийн эрсдэлийг бууруулах газраас Австралийн Холбооны Улстай хамтран тус улсын Брисбэн хотноо 2022 оны 9 дүгээр сарын 19-22-ны өдрүүдэд Гамшгийн эрсдэлийг бууруулах Ази, номхон далайн сайд нарын бага хурлыг зохион байгуулж байна.
Тус бага хурал нь гамшгийн эрсдэлийг бууруулах Ази, номхон далайн бүс нутгийн платформ бөгөөд Хямралаас гамшгийг даван туулах чадавх руу сэдвийн дор зохион байгуулагдаж байна.
Монгол Улсын Засгийн газраас НҮБ-ын Гамшгийн эрсдэлийг бууруулах газартай хамтран 2018 онд Гамшгийн эрсдэлийг бууруулах Азийн сайд нарын 2 дугаар бага хурлыг Улаанбаатар хотод бүс нутгийн 50 гаруй улс, 100 орчим олон улсын байгууллагын 3000 гаруй зочид төлөөлөгчид амжилттай зохион байгуулж, Монгол Улсын гамшгаас хамгаалах үйл ажиллагааны ололт амжилт, хүндрэл бэрхшээл, шийдэх арга замын талаар хэлэлцэж Улаанбаатарын тунхаг болон Гамшгийн эрсдэлийг бууруулах Сендайн үйл ажиллагааны баримт бичгийг хэрэгжүүлэх Ази, номхон далайн төлөвлөгөө 2018-2020 баримт бичгийг гаргаж байсан билээ.
Энэ удаагийн хуралд Монгол Улсын Шадар сайд С.Амарсайхан болон холбогдох албаныхан оролцож байгаа билээ.
Шадар сайд С.Амарсайхан хурлын үеэр НҮБ-ын Ерөнхий нарийн бичгийн даргын гамшгийн эрсдлийг бууруулах асуудлаарх тусгай төлөөлөгч хатагтай Мами Мизүторитай уулзсан байна. Хатагтай Мами Мизүторид гамшгийн эрсдлийг бууруулахад бүс нутгийн хамтын ажиллагаа, санхүүжилт, хөрөнгө оруулалтыг хийх тухай дурдаж, дараах асуудлуудыг хөндлөө.
Үүнд:
– НҮБ-аас санаачлан гамшгийн эрсдлийг бууруулах санхүүгийн платформыг Олон улсын банк санхүүгийн байгууллагын төлөөлөлтэй хамтран байгуулж, хөгжиж буй орнуудтай хамтран ажиллах
– Дэвшилт техник технологи, инновацийг гамшгийн эрсдлийг бууруулахад өргөнөөр нэвтрүүлэх
– Зүүн хойд Азийн бүс нутагт төв Азийн улс орнуудыг багтаасан хамтын ажиллагааны механизмыг байгуулах. Үүнд Монгол Улс манлайлан ажиллахад бэлэн байна.
– Монгол Улсад хүмүүнлэгийн төвийг байгуулж, Зүүн хойд Азид хүмүүнлэгийн тусламж дэмжлэгийг хүргэхэд дэд бүтэц, бусад зүйлээр туслахад бэлэн байна.
Хатагтай Мами Мизүтори гамшгийн эрсдлийг бууруулахад Монгол Улсын Засгийн газрын хэрэгжүүлж байгаа үйл ажиллагааг өндрөөр үнэлж, улс төрийн манлайлал буйгаа онцлон тэмдэглэлээ.
