Хууль зүй, дотоод хэргийн сайдаар ажиллахаар болоод буй С.Амарсайхан салбартаа хэрхэн ажиллах талаараа ийнхүү танилцууллаа.
Тэрбээр шүүхээр гэм буруутай нь тогтоогдоогүй байхад хэн нэгнийг яллаж, зэмлэдэг, гүтгэдэг байдлыг таслан зогсоохоо мэдэгдлээ.
УИХ-ын гишүүн Г.Очирбат чуулганы хуралдааны үеэр түүнээс “МАН-ынхан хоёр тал болоод нэгнийгээ хулгайч гээд сүүлийн орон даяар зарлалаа. Б.Энхбаяр сайдыг 110 сая доллар авсан гэдэг. Хүн шатаагаад алчихсан шахуу юм ярьдаг. Бие биенийхээ хулгай луйвартай холбоотой асуудлыг хэзээ ард түмэндээ үнэн мөнийг нь олж өгөх вэ” гэсэн асуултыг асуусан юм.
Үүний хариуд С.Амарсайхан
Нэгдүгээрт, Ерөнхий сайдын үүрэг болгосны дагуу иргэн, аж ахуйн нэгжийн эрхийг хамгаална. Хууль бус үйлдлийг таслан зогсооно. Аж ахуйн нэгж, иргэдээ элдэв дарамт шахалт, хууль бус шаардлагаар шахан хавчдагийг зогсооно.
Хоёрдугаарт, хууль шүүхийн байгууллагын хууль хэрэгжүүлэх эрхийг хамгаална.
Гуравдугаарт, улс төрчид ямар нэг байдлаар хууль, шүүхийн байгууллага, ажилтан албан хаагчдыг улс төрийн зодооны зэр зэвсэг болохыг хатуу шаардаж, таслан зогсооно.
Дөрөвдүгээрт, хууль хяналтын байгууллага улс төрийн бүх шатны байгууллага хууль шүүхийн үйл ажиллагаатай холбоотой хэн нэгнийг шүүхээр гэм буруутай нь тогтоогдоогүй байхад хэн нэгнийг яллаж, зэмлэдэг, гүтгэдэг байдлыг таслан зогсооно.
Хамгийн сүүлд бид нэг зүйлийг тодорхой болгох хэрэгтэй.
Энэ улс үнэхээр гэмт хэрэгтнээр дүүрчихсэн юм уу эсвэл гүтгэгчдээр дүүрчхээд байгаа юм уу, эсвэл хуулийн байгууллага нь ажлаа хийхгүй байгаа юм уу гэдгийг хариуцлагатайгаар ялгаж салгана.
Үүний тулд хамтарч ажиллах ёстой. Хууль хяналтын байгууллагын бие даасан байдлыг хангахад анхаарч ажиллана. Яагаад гэвэл төрийн хууль цаазын мөн чанар нь гэм бурууг үнэн бодитоор тогтооход оршдог.
Тиймээс тогтолцооны стандартыг нэвтрүүлж ажиллахыг хангана, шаардана.
