Ерөнхий сайд Л.Оюун-Эрдэнэ ХБНГУ-ын Канцлер Олаф Шольцын урилгаар тус улсад айлчилж байна. Түүний айлчлал энэ сарын 12-нд эхэлсэн юм.
Айлчлалын бүрэлдэхүүнд Гадаад хэргийн сайд Б.Батцэцэг, Эдийн засаг хөгжлийн сайд Ч.Хүрэлбаатар, Зам тээврийн хөгжлийн сайд С.Бямбацогт болон УИХ-ын гишүүн Ц.Мөнх-Оргил, Ц.Мөнхцэцэг, Ерөнхий сайдын зөвлөх А.Ариунзаяа, М.Бадамлянхуа нар багтсан юм.
Ерөнхий сайд болон дагалдан явагсад ХБНГУ-ын нийслэл Берлин рүү МИАТ-ын онгоцоор явсан байна. Ингэхдээ Улаанбаатар-Франкфурт чиглэлд нисэх хуваарьтай байсан онгоцоор явжээ. Иймд онгоц эхлээд Берлинд газардан, айлчлалын бүрэлдэхүүнийг буулгаад, Франкфуртад иржээ. Хуваарьт цагаас хоёр цаг хоцорч газардсан, зорчигчдын ачаа саатсан тул Франкфуртаас цааш дамжин нисэхээр төлөвлөсөн иргэдийн зарим нь онгоцноосоо хоцорсон байна.
МИАТ компани УБ-Франкфурт чиглэлийн дээрх онгоцны зорчигчдод хохирлыг барагдуулна гэж мэдэгджээ.
МИАТ компани дараах мэдэгдлийг гаргажээ:
Энэ сарын 12-нд Улаанбаатар-Франкфурт чиглэлийн ОМ137 аяллаар Ерөнхий сайд Л.Оюун-Эрдэнэ Холбооны Бүгд Найрамдах Герман Улсын Канцлер Олаф Шольцын урилгаар тус улсад албан ёсны айлчлал хийх болсон. Иймд тухайн чиглэл нь Улаанбаатар-Берлин-Франкфурт болон өөрчлөгдөх шийдвэр энэ сарын 3-ны өдөр МИАТ ТӨХК-аас гарсан юм.
ОМ137 аялалд ийнхүү өөрчлөлт орсон тул тус нислэгээр зорчих 217 зорчигчод “тухайн нислэгийн чиглэл Улаанбаатар-Берлин-Франкфурт болон өөрчлөгдсөн” тухай мэдээллийг энэ сарын 4-нд хүргүүлж, дамжин нисэх 37 зорчигчийг хамгийн түрүүнд буухаар хаалганд ойрхон суулгаж, вагоноор цааш зорчих 31 зорчигчдийн тээшийг түрүүлж буулган саадгүй вагонд нь суулгасан.
Нэг ч зорчигч цааш дамжин явах нислэг, галт тэргээсээ хоцроогүй. Мөн “Чингис Хаан” ОУНБ дахь МИАТ ТӨХК-ийн бүртгэлийн цэгт тухайн нислэгийн мэдээллийг “Улаанбаатар-Берлин-Франкфурт” гэж зарлан, зорчигч тухай бүрт энэ сарын 3-ны өдөр тухайн нислэгт гарсан өөрчлөлтийн мэдээллийг баталгаажуулж өгсөн.
Гэвч гадаад улсаас цахимаар тийз захиалсан зарим зорчигч системийн ялгаатай байдлаас шалтгаалан нислэгийн өөрчлөлтийн талаарх мэдээлэл очоогүй байсан. Нислэг эхлэхээс өмнө тодорхой зохицуулалт хийж, дамжин тээврийн асуудлыг шийдсэн болно.
Иймд МИАТ ТӨХК нийт зорчигч, үйлчлүүлэгчдээ бухимдуулсандаа гүнээ хүлцэл өчье.
Цаашид МИАТ ТӨХК онлайнаар тийз авсан зорчигчдод мэдээллийг шуурхай хүргүүлэх чиглэлээр онцгой анхааран хичээн ажиллах болно.
