Нэгэн судалгаагаар үсийг шулуун хэвд оруулагч бүтээгдэхүүн тодорхой давтамжтай хэрэглэдэг хүмүүсийн дунд умайн хүзүүний хавдраар өвчлөх эрсдэл харьцангуй өндөр байдгийг тогтоожээ.
Судалгааны ахлагч Александра Уайтын мэдээлснээр, “Бидний тооцоолсноор үс шулуун хэвд оруулагч бүтээгдэхүүн нэг ч удаа хэрэглэж байгаагүй эмэгтэйчүүд 70 насандаа умайн хүзүүний хавдраар өвчлөх эрсдэл 1.64 хувьтай байдаг бол тухайн бүтээгдэхүүнийг тодорхой давтамжтай хэрэглэдэг бүсгүйчүүд 70 насандаа умайн хүзүүний хавдраар өвчлөх эрсдэл 4.05 хувьтай байна. Гэхдээ умайн хүзүүний хавдар бол хавдрын бусад төрөлтэй харьцуулахад хамаагүй ховор төрлийн хавдар гэдгийг мэдэж байх нь чухал” гэсэн юм.
Хэдий тийм ч гэлээ АНУ-д умайн хүзүүний хавдар нь эмэгтэйчүүдийн нөхөн үржихүйн эрхтэн тогтолцооны хүрээнд хамгийн түгээмэл илэрдэг хавдар гэнэ. АНУ-ын Өвчнийг хянах, урьдчилан сэргийлэх төвөөс мэдээлж байгаагаар энэ төрлийн хавдар өнгөт арьст эмэгтэйчүүдэд нийтлэг илэрдэг ажээ.
Судалгааг зохион байгуулагчдын зүгээс өнгөрөгч 11 жилийн турш 35-74 насны 33,947 эмэгтэйг хяналтдаа оруулсан бөгөөд тэдний 378 эмэгтэй нь судалгааны хугацаанд умайн хүзүүний хавдраар өвчилсөн байна. Тийнхүү судалгааны баг хавдар үүсгэгч бусад хүчин зүйлийг авч үзсэний дараа үс шулуун хэвд оруулагч бүтээгдэхүүн хэрэглэдэг бүсгүйчүүдийн умайн хүзүүний хавдраар өвчлөх магадлал 2.5 дахин өндөр байгааг тогтоожээ.
Үүний шалтгаан нь үс шулуун хэвд оруулагч бүтээгдэхүүнүүд дотоод шүүрлийн системийг тасалдуулах химийн бодисууд агуулдагтай холбоотой гэнэ. Энэ төрлийн бүтээгдэхүүнүүд өмнө нь хөх болон өндгөвчний хавдраар өвчлөх эрсдэлийг нэмэгдүүлдэг нь тогтоогдож байсан юм.
Судалгааны багийн зүгээс судалгааны дүнг арьс өнгөтэй холбон тайлбарлаагүй байна. Гэвч судлаач Чан Че Жуны хэлснээр, “…өнгөт арьст эмэгтэйчүүд нь бусад эмэгтэйчүүдээс эрт үс шулуун хэвд оруулагч бүтээгдэхүүн хэрэглэж эхэлдэг тус эрсдэлийг нэмдэг байж магадгүй” гэжээ.
Эх сурвалж: The Reuters
