Авлигын гэмт хэргийн хохирол нөхөн төлүүлэлтийн талаар Авлигатай Тэмцэх Газар (АТГ)-аас тойм мэдээлэл танилцуулав. Тодруулбал,
- 2020 онд 35 тэрбум төгрөг
- 2021 онд 96 тэрбум төгрөг
- 2022 оны эхний есөн сарын байдлаар 2.3 их наядын хохирлыг тус тус нөхөн төлүүлсэн байна.
АТГ-ын Урьдчилан сэргийлэх, соён гэгээрүүлэх хэлтсийн ажилтан, комиссар О.Эрдэнэбүрэн “Энэ оны есдүгээр сарын байдлаар мөрдөн шалгах ажиллагааны явцад 2.3 их наяд төгрөгийн хохирлыг улсад нөхөн төлүүлсэн. Энэ хэмжээний мөнгөөр ямар боломжит бүтээн байгуулалт хийж болох талаар олон тооцооллыг гаргаж болох юм. Тухайлбал, 2.3 их наяд төгрөг нь өнгөрсөн жилийн улсын төсвийн 20 хувьтай тэнцэх хэмжээний мөнгө юм” гэдгийг хэллээ.
2022 оны эхний есөн сарын байдлаар нөхөн төлүүлсэн 2.3 их наядыг нарийвчлан задалбал,
- Сангийн яамны төрийн сангийн дансанд 2.9 тэрбум
- Монгол Улсын Хөгжлийн банканд 766 тэрбум
- Дархан төмөрлөгийн үйлдвэр ТӨХК-д 721 тэрбум
- Хөтөлийн “Цемент-Шохой” ТӨХК-д 235 тэрбум
- Эрдэнэт үйлдвэр ТӨХК-д 647 тэрбум
- Төрийн байгууллагын дансанд 148 сая
- Улсын орлогод оруулсан хөрөнгө, барилга байгууламж, газар 244 сая
- Иргэн аж ахуйн нэгжүүдэд 72 сая төгрөг тус тус нөхөн төлүүлж ажилласан талаар мэдээлэв.
Хөгжлийн банканд мөрдөн шалгах ажиллагааг энэ оны нэгдүгээр сарын 31-ний өдөр эхлүүлснээс хойш нийт 48 зээлдэгчээс 766.5 тэрбум (үүнээс 86.6 тэрбум төгрөгийг үлд хөдлөх хөрөнгөөр) төгрөгийн хохирлыг нөхөн төлүүлжээ.
Одоогоор Хөгжлийн банкны эрх бүхий албан тушаалтнуудад холбогдох 25 хэрэгт мөрөн шалгах ажиллагаа явуулж байна.
“Хөгжлийн банканд нөхөн төлөгдсөн 766.5 тэрбум төгрөг нь зээл үү эсвэл хохирол уу гэдэгт ойлголтын зөрүү гарч байна. Хөгжлийн банкны бүх зээл чанаргүй байгаа юм биш тодорхой хэмжээнд амжилттай яваа төслүүд бий.
Эрх мэдэл, албан тушаалын байдлаа ашиглаж, бусдад давуу байдал бий болгон барьцаа хөрөнгө хангалтгүй, зээл олгох боломжгүй байхад Эрүүгийн хуулиар хамгаалсан тодорхой төрлийн нийгмийн харилцааг зөрчиж, зээл нэрээр олгосон хууль бус санхүүжилтийг хохирол хэмээн ойлгоод байгаа юм. Өөрөөр хэлбэл, эрх мэдлийн байдлаа ашиглаж байгааг нь хохирол хэмээн үздэг. Дээрх хохирлын дүнгээс харвал, 766.5 тэрбум төгрөгийг буцаан төлүүлж чадсан” хэмээн АТГ-ын Хэвлэл, олон нийттэй харилцах ажилтан, комиссар Н.Тэмүүлэн хэлэв.
