Засгийн газрын хэрэг эрхлэх газрын дарга Д.Амарбаясгалан цаг үеийн асуудалд тайлбар өглөө.
Тэрээр “Эрх мэдэл, бүлэглэлийн эрхшээлд орж, ард түмний боломжийг хулгайлсан хэсэг бүлэгтэй тэмцэж байна. Энэ цагаас хойш Монгол Улсын Ерөнхий сайдыг ч, түүнтэй хамтран тэмцэж, зүтгэж байгаа хэсгийг харлуулах, нэр хүндийг нь унагаах, олон нийтийн дунд үл итгэх байдлыг бий болгох ажлуудыг хийж байна. Хамгийн сүүлд гэхэд “Эрдэнэс Тавантолгой” ХК дээр бүрэн эрхт төлөөлөгч томилогдож, олон жилийн турш хулгайн замаар явж ирсэн үйл ажиллагаа хянаж эхэлсэн. Үүнтэй холбогдуулан Ерөнхий сайдын ажилд саад учруулж, хэвлэл мэдээллээр зохион байгуулалттай юмнууд маш их явуулж байна.
Миний хувьд ЗГХЭГ-ын даргаар ажиллах богино хугацаанд зохион байгуулалттай байхаар олон зүйл хэвлэлээр явж байна. Эрх мэдэлтэй, эд хөрөнгөтэй хүмүүсийн эрх ашиг газар бүр хөндөгдөх нь тодорхой. Гэвч төрд үнэнчээр, чиг шугамаар зүтгэдэг улстөрчид, албан тушаалтанд тодорхой дарамт шахалт үзүүлдэг байсан нь надад ч мэдрэгдэж байна. Жишээлбэл, “МАН дотроо хагарлаа, Амарбаясгалан, Оюун-Эрдэнэ хоёр хагарчээ, Амарбаясгалан нь Оюун-Эрдэнийгээ Ерөнхий сайдын суудлаас унагааж өөрөө ерөнхий сайд болох нь ээ” зэрэг өнцгийг явуулж байна. Үүнийг дотоод учраа олоогүй, эрх мэдэлдээ улайрсан Ардчилсан намын зарим нөхдийн хийж буй ажил гэж харж байна. МАН-ыг эв нэгдэлгүй болгож, Засгийн газрын үйл ажиллагааг алдагдуулснаар сөрөг хүчний хүсэл хангагддаг болов уу.
Өнөөдрийн эдийн засгийн нөхцөл байдал, дэлхийн эдийн засгийн хямралаас үүдэлтэй улс оронд ирж буй дарамтыг амь нэгтэй байж л даван туулна. Энэ бидний зорилго. Тэрнээс биш албан тушаал, эрх мэдлийн төлөө тэмцэлдэж, нэг нь Ерөнхий сайдаас бууж нөгөөх нь Ерөнхий сайд болж явах үеийн төлөөлөл бид биш. МАН эв нэгдлээрээ бусад улс төрийн намд үлгэр дуурайлал болох нам.
Манай үе буюу намын дарга Л.Оюун-Эрдэнэ, миний зүгээс хоорондоо эрх мэдэл албан тушаалын төлөө тэмцэлдэх шалтгаан байхгүй. Харин ч хоёр дараалан Засгийн эрх барьж буйгаа ард түмнээс өгсөн үүрэг даалгавар хэмээн гүнээ ухамсарлаж, ард иргэдэд учирч буй алдаа дутагдал, хүнд суртал, завхрал, авлигаас ангид байлгахын төлөө зүтгэнэ. Энэ бүгдийг зохион байгуулж буй нэр бүхий этгээд байна. Тэдний ард эрх ашиг нь хөндөгдөж буй томоохон бизнес эрхлэгчид байгаа нь тодорхой байна. Эзэмшлийнх нь хэвлэл мэдээллийг байгууллагаар энэ нь харагдаж байгааг анзаарах ёстой” гэлээ.
