ХӨСҮТ-ийн ерөнхий захирал Ц.Билэгтсайхан ковидын нөхцөл байдлын талаар мэдээллээ.
Тэрбээр, Дэлхий нийтээр ковидын цар тахалтай нүүр тулаад гурван жил боллоо. Дэлхий дахинд нийт 657 сая хүн коронавирусийн халдвар авч, 6.6 сая хүн цар тахлын улмаас хорвоог орхижээ.
Дэлхий дахинд омикроны тархалт сүүлийн долоо хоногт 21 хувиар буурсан. Коронавирусийн ВА5 хувилбарын тархалт 63 хувьтай байна.
БНХАУ-Д:
Манай урд хөрш 2022 оны 12-р сарын 24-нөөс хойш цар тахлын талаарх тоон мэдээллийг бүрэн нийтлэхгүй байгаа. Гэхдээ ДЭМБ-ын мэдээгээр сүүлийн 24 цагт БНХАУ-д 34 мянга гаруй тохиолдол бүртгэгдсэн. Өнгөрсөн долоо хоногт 210 мянган хүн халдвар авсан. Тохиолдлын тоо өмнөх долоо хоногоос энэ долоо хоногт тохиолдол, өвчлөлийн тоо 45 хувиар нэмэгдсэн, нас баралт 648 бүртгэгдсэн нь өмнөх долоо хоногоос 50 гаруй хувиар өссөн мэдээлэл байна.
12-р сарын 19-24-нд 85 хувь нь омикроны BF7 хувилбарын дэгдэлт үүсээд байна. Барууны орны эрдэмтдийн судалгаагаар БНХАУ-д цар тахлын давлагаа нэгдүгээр сарын дундуур тохиолдоно. Хоногт 3.6 сая хүн халдвар авна. Үүнээс хойш 10-14 хоногийн дараа тохиолдож эхэлнэ. Ингэхдээ хоногт 25 мянга орчим хүн нас барах эрсдэлтэй гэсэн тооцоолол хийсэн.
МОНГОЛД:
2023 оны 1-р долоо хоногт коронавирусийн халдварын 67 шинэ тохиолдол бүртгэгдсэн нь өмнөх долоо хоногоос 50 хувиар буурсан үзүүлэлт. Сүүлийн өдрүүдэд батлагдсан тохилдлын тоо 10-аас багассан. Өнөөдрийн байдлаар 34 хүн ковидын шалтгаанаар эмнэлэгт хэвтэж байна.
БНХАУ хилээ нээсэн. Хил нээсэнтэй холбоотой ХӨСҮТ-өөс 12-р сарын 27-нд санал дүгнэлтээ ЭМЯ, УОК болон холбогдох байгууллагуудад хүргүүлсэн. Зорчигч тээврийн хөдөлгөөнтэй холбоотойгоор манай улм хилээр орж ирэх иргэдэд урд хөрштэй ижил тэгш шаардлага тавина гэдгээ саналд тусгасан.
Хоёрдугаарт, Урд хөршид ковидын нөхцөл байдал амаргүй байгаа учир энэ байдал Монголд яаж нөлөөлөх вэ гэж олон салбарын эрсдэлийн үнэлгээг хийсэн. ЭМЯ, ХӨСҮТ, УОК, НЭМҮТ, ЗӨСҮТ, ДЭМБ, Гаалийн ерөнхий газартай хамтарч ковидын олон салбарын 29 дэх удаагийн эрсдэлийн үнэлгээ хийсэн.
Нэгдүгээр сарын 4-нд үнэлгээг гаргахад “Өндөр эрсдэлтэй” гэсэн үнэлгээ гарсан. Дүгнэлтээ ЭМЯ, УОК болон холбогдох бусад байгууллагуудад хүргүүлээд байна гэлээ.
