4-р сарын 30-нд Дэлхийн эдийн засгийн форумаас гаргасан судалгааны тайлангаас үзвэл шинэ технологи, эдийн засгийн өсөлтийн удаашрал зэрэг хүчин зүйлийн улмаас ирэх таван жилд дэлхийн хөдөлмөрийн зах зээлд өөрчлөлт гарч, ажлын байр 14 саяар багасах төлөвтэй байгаа юм байна.
2027 он гэхэд дэлхий даяар 69 сая шинэ ажлын байр нэмэгдэж, 83 сая ажлын байр алга болно гэж Дэлхийн эдийн засгийн форумын уг тайланд таамаглаж байгаа бөгөөд энэ нь 14 сая ажлын байрыг шууд алдана гэсэн үг юм.
Энэхүү тайланг дэлхийн 803 компанид явуулсан судалгаа, 673 сая ажлын байрны мэдээллийн санд хийсэн дүн шинжилгээнд үндэслэн гаргасан байна.
Уг тайланд дурдсанаар, хөдөлмөрийн зах зээлд олон хүчин зүйл нөлөөлж байгаа бөгөөд тухайлбал эрчим хүчний шинэ салбар бий болсонтой холбоотойгоор ажлын байр нэмэгдэнэ, гэхдээ эдийн засгийн өсөлт удааширч, инфляц өндөр байгаа нь ажлын байрны хомстолд хүргэнэ гэжээ. Түүнчлэн хиймэл оюун ухаан зэрэг шинэ технологийг ашиглах нь дэлхийн ажил эрхлэлтийн хэтийн төлөвт эерэг ба сөрөг нөлөө зэрэг үзүүлэх гэнэ. Бүх салбаруудад илүү олон ажлын байр бий болгохын тулд AI технологийг удирдаж, хэрэглэж ажиглуулж чадах хүмүүсийг ажилд авах аж.
2027 он гэхэд мэдээллийн дүн шинжилгээ, ML, сүлжээний аюулгүй байдалтай холбоотой ажлын байр дунджаар 30%-иар өсөх төлөвтэй байна. Нөгөөтэйгүүр, хиймэл оюун ухааны технологийг ашигласнаар зарим мэргэжлүүд устах эрсдэлтэй ба 2027 он гэхэд 26 сая захиргааны болон бусад ажлын байр цөөрнө. Түүнчлэн мэдээлэл оруулахтай холбоотой захиргааны нарийн бичгийн дарга нарын карьерын хэтийн төлөв “бүрхэг” байгаа аж.
